នៅថ្ងៃសុក្រ ទី២៧ ខែវិច្ឆិកា ឆ្នាំ២០២០ អគ្គលេខាធិការដ្ឋានក្រុមប្រឹក្សាជាតិគាំពារសង្គម បានរៀបចំវគ្គបណ្តុះបណ្តាលស្តីពី “ទំនាក់ទំនងសាធារណៈ និងប្រព័ន្ធផ្សព្វផ្សាយគាំពារសង្គម”នៅសណ្ឋាគារភ្នំពេញ ដោយមានវាគ្មិនសំខាន់ៗចូលរួមធ្វើបទបង្ហាញ ដូចជាលោក Scott Neeson ស្ថាបនិកអង្គការមូនិធិកុមារកម្ពុជា ព្រមទាំងវាគ្មិនមកពីនាយកដ្ឋានព័ត៌មានវិទ្យា និងទំនាក់ទំនងសាធារណៈ រួមមាន លោក ហ៊ាង សុទ្ធាយុត្តិ ប្រធាននាយកដ្ឋាន និងជាអ្នកនាំពាក្យក្រសួង លោក ទេស តារារ័ត្ន អនុប្រធាននាយកដ្ឋាន និងជាប្រធានមណ្ឌលប្រឹក្សាយោបល់លើសេវាសាធារណៈ លោកស្រី ប៉ុន សុគន្ធារ៉ា អនុប្រធាននាយកដ្ឋាន។ កម្មវិធីនេះមានគោលដើម្បីចែករំលែកចំណេះដឹង បទពិសោធន៍ពាក់ព័ន្ធ ក្នុងការរៀបចំអង្គភាព និងប្រតិបត្តិលើការងារទំនាក់ទំនងសាធារណៈ និងផ្សព្វផ្សាយក្នុងស្ថាប័នឱ្យទទួលបានជោគជ័យ បញ្ជ្រាបការយល់ដឹង និងបង្កើនទំនាក់ទំនងល្អជាមួយគ្រប់ភាគី ជំរុញការអភិវឌ្ឍ និងគាំពារសង្គមជាតិឱ្យកាន់តែមានភាពប្រសើរឡើង។ វាគ្មិនចូលរួមកម្មវិធីបានបង្ហាញពីវិធីសាស្ត្រ ដែលជាបទពិសោធន៍បានអនុវត្តជោគជ័យនាពេលកន្លងមកក្នុងស្ថាប័នរបស់ខ្លួន ទៅលើកិច្ចការគ្រប់គ្រងអង្គការ អង្គភាពទំនាក់ទំនង ការបង្កើតទំនាក់ទំនងល្អជាមួយសាធារណជន អ្នកសារព័ត៌មាន ក្រសួងស្ថាប័ន ដៃគូអភិវឌ្ឍន៍ និងវិស័យឯកជន ជាពិសេសគឺបច្ចេកទេសល្អ ក្នុងការផលិតខ្លឹមសារ រូបភាព វីដេអូ ដែលចំគោលដៅមានប្រសិទ្ធភាពខ្ពស់ ព្រមទាំងវិធីសាស្ត្រក្នុងការរៀបចំកម្មវិធី និងសន្និសីទផ្សេងជាដើម..។ល៕