ភ្នំពេញ៖ ថ្ងៃព្រហស្បតិ៍ ១១កើត ខែមិគសិរ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី២៦ ខែវិច្ឆិកា ឆ្នាំ២០២០ នៅទីស្ដីការក្រសួង ឯកឧត្តម កឹម បូរី អនុរដ្ឋលេខាធិការក្រសួងសាធារណការ និងដឹកជញ្ជូន តំណាងឯកឧត្តមរដ្ឋលេខាធិការ ប៉ាល់ ចន្ទតារា បានអញ្ជើញដឹកនាំកិច្ចប្រជុំពិភាក្សាបន្តលើសេចក្តីព្រាង ច្បាប់ស្តីពីទឹកកខ្វក់ និងប្រព័ន្ធលូ ដោយមានការអញ្ជើញចូលរួមពីថ្នាក់ដឹកនាំ និងមន្ត្រីជំនាញបច្ចេកទេសពាក់ព័ន្ធ។ កិច្ចប្រជុំនេះធ្វើឡើងដើម្បីពិភាក្សាបន្តលើសេចក្តីព្រាងច្បាប់ស្ដីពីទឹកកខ្វក់និងប្រព័ន្ធលូ ក្នុងមាត្រា ២៧ (២៤ថ្មី) មាត្រា ២៨ (២៥ថ្មី) និងមាត្រា២៩ ដោយផ្ដោតជាសំខាន់លើការប្រើប្រាស់ពាក្យពេចន៍ ឃ្លា ប្រយោគ និងការកំណត់និយមន័យឱ្យបានច្បាស់លាស់ ជាក់លាក់ ស៊ីជម្រៅ គ្រប់ជ្រុងជ្រោយ និងមានខ្លឹមសារឆ្លើយតបទៅនឹងកម្មវត្ថុនៃច្បាប់។ ឯកឧត្ដមអនុរដ្ឋលេខាធិការបានថ្លែងអំណរគុណយ៉ាងជ្រាលជ្រៅដល់ក្រុមការងារដែលបានខិតខំប្រឹង ប្រែងប្រមូលធាតុពាក់ព័ន្ធ ដើម្បីមានមូលដ្ឋានគ្រឹះគ្រប់គ្រាន់ក្នុងការរៀបចំសេចក្ដីព្រាងច្បាប់នេះឱ្យមានខ្លឹមសារ និងវិសាលភាពគ្រប់ជ្រុងជ្រោយតាមកម្មវត្ថុច្បាប់ ក៏ដូចជាដើម្បីឱ្យការរៀបចំសេចក្ដីព្រាងច្បាប់នេះឆាប់លេចចេញជារូបរាងឡើង៕