អគារថ្មីរបស់ក្រសួងសាធារណការ និង ដឹកជញ្ជូន បានសាងសង់ស្ទើរតែទាំងស្រុងហើយ នឹងគ្រោងដាក់សម្ពោធឱ្យប្រើប្រាស់ជាផ្លូវការក្នុងពេលឆាប់ៗខាងមុខ ដែលមានទីតាំងនៅសង្កាត់ច្រាំងចំរេះ២ ខណ្ឌប្ញស្សីកែវ រាជធានីភ្នំពេញ (ផ្លូវឯកឧត្តមជា សុផារ៉ា) ។ បើក្រឡេកទៅមើលទិដ្ឋភាពអគារក្រសួងសាធារណការ និង ដឹកជញ្ជូនថ្មី ដែលសាងសង់បាន ៩៥ ភាគរយនេះ ឃើញថាមានធំទូលាយ អគារមានលឿងល្អល្អះ មានទេសភាពស្អាត ខ្យល់អាកាសល្អបរិសុទ្ធគួរឱ្យចង់អង្គុយធ្វើការ ជាពិសេសបន្តិចទៀត នឹងមានដាំស្មៅក្នុងសួនបង្កើនសោភ័ណភាព ដាំដើមឈើ និង ក្រាលកៅស៊ូបេតុងផ្លូវចេញ-ចូលទៀតផង ។ គួរបញ្ជាក់ថា អគារទីស្តីការក្រសួងសាធារណការ និងដឹកជញ្ជូនថ្មីនេះ ត្រូវបានប្រារព្ធពិធីក្រុងពាលីបើកការដ្ឋានសាងសង់កាលពីថ្ងៃអាទិត្យ ៨រោច ខែពិសាខ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២៦ ខែឧសភា ឆ្នាំ២០១៩ ក្រោមអធិបតីភាព ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ហើយគ្រោងបញ្ចប់ការសាងសង់ជាស្ថាពរនៅដំណាច់ឆ្នាំ ២០២០ ខាងមុខនេះ ៕