នៅថ្ងៃទី ១៦ តុលា ២០២០ នេះ ឯកឧត្តមទេសរដ្ឋមន្រ្តី ស៊ុន​ ចាន់ថុល បានដឹកនាំក្រុមការងារបច្ចេកទេសក្រសួងចុះពិនិត្យ ផ្លូវជាតិលេខ២ ផ្លូវជាតិលេខ៣ ផ្លូវលេខ២២ ផ្លូវលេខ៤១ និងផ្លូវជាតិលេខ៤ ដោយផ្ទាល់ និងចុះជួយយ៉ាងសកម្ម មិនប្រកាន់តួនាទី បុណ្យស័ក្តិអ្វីឡើយ បន្ទាប់ពីផ្លូវទាំងនោះរងផលប៉ះពាល់ដោយជំនន់ទឹកភ្លៀង ។ ក្នុងឱកាសចុះពិនិត្យស្ថានភាពទឹកជន់លិចផ្លូវនេះ ឯកឧត្តម ទេសរដ្ឋមន្ត្រី ស៊ុន ចាន់ថុល បានអំពាវនាវដល់ម្ចាស់យានយន្តដឹកជញ្ជូនធុនធ្ងន់គ្រប់ប្រភេទ សូមកុំបើកបរនៅលើផ្លូវទាំងឡាយដែលកំពុងទទួលរងការជន់លិច និងសូមស្ដាប់តាមការណែនាំរបស់អាជ្ញាធរមាន សមត្ថកិច្ច ដើម្បីបង្ការកុំឱ្យហេដ្ឋារចនាសម្ព័ន្ធផ្លូវថ្នល់ការខូចខាតកាន់តែធ្ងន់ធ្ងរថែមទៀត ។ បន្ថែមពីនេះឯឧត្តម ក៏បានបានណែនាំឱ្យក្រុមហ៊ុនសាងសង់ ដែលកំពុងសាងសង់ផ្លូវជាតិលេខ៣ ត្រូវយកដុំថ្ម និងបាវខ្សាច់មកទប់ទឹកដែលកំពុងហូរច្រោះកាត់កំណាត់ផ្លូវជាតិលេខ៣ នៅកំពង់ទួល ស្ថិតក្នុងភូមិសាស្ត្រខេត្តកណ្តាល ដើម្បីទប់ស្កាត់កុំឱ្យទឹកហូរកាត់ផ្ដាច់ផ្លូវ និងបង្កការការជន់លិចទៅដល់ផ្ទះប្រជាពលរដ្ឋរាប់ពាន់ខ្នងដែលស្ថិតនៅខាងក្រោមផ្លូវនោះផងដែរ ។ សូមជំរាបផងដែរ ឥទ្ធិពលនៃជំនន់ទឹកភ្លៀងនេះបានធ្វើឱ្យថ្នល់ចំនួន១០១ខ្សែ មានចំនួន២៤៩កំណាត់ និងមានប្រវែងសរុបចំនួន ៣២៤,២៩ គីឡូម៉ែត្រត្រូវបានទទួលរងនូវការលិចលង់ និងខូតខាត ក្នុងនោះមានផ្លូវជាតិលេខ២ ផ្លូវជាតិលេខ៣ ផ្លូវជាតិលេខ៤ ផ្លូវជាតិលេខ៥ រួមទាំងបណ្ដាផ្លូវជាតិសំខាន់ៗជាច្រើនខ្សែផ្សេងទៀត ក្នុងបណ្តាមួយចំនួនដែលរងគ្រោះដោយសារជំនន់ទឹកភ្លៀងនេះ ៕