[Moneaksekar] - លោក សេង ស៊ុង ប្រធានសា្ថនីយ៍ជញ្ជីងថ្លឹងរថយន្តលើផ្លូវជាតិលេខ២ ប្រើអំណាចប្រព្រឹត្តអំពើពុករលួយយ៉ាងកំរោល
2018-01-29
ទៅកាន់ទំព័រចុះផ្សាយក្នុង Moneaksekar
រឿងអាស្រូវពុករលួយរបស់លោក សេង ស៊ុង ដែលជាប្រធានស្ថានីយ៍ជញ្ជីងថ្លឹងរថយន្តលើផ្លូវជាតិលេខ២ ក្នុងភូមិព្រះពុទ្ធ ឃុំព្រះពុទ្ធ ស្រុកកណ្ដាលស្ទឹង ខេត្តកណ្ដាល កំពុងត្រូវបានម្ចាស់រថយន្តដឹកទំនិញ ដឹកដី ដឹកខ្សាច់ លាតត្រដាងជាបន្តបន្ទាប់។ ម្ចាស់រថយន្តដឹកទំនិញមួយចំនួនបានលើកឡើងថា ទោះបីពួកគេដឹកទំនិញលើសទម្ងន់ឬមិនលើសទម្ងន់យ៉ាងណាក៏ដោយ ក៏ត្រូវបង់លុយតាមការកំណត់របស់លោក សេង ស៊ុង ដែរដោយមិនអាចតវ៉ាបានឡើយ។
ប្រការនេះគឺជារឿងដែលលោក ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូនមិនគួរបណ្ដែតបណ្ដោយតទៅទៀតទេ ព្រោះការដែលលោក សេង ស៊ុង ហ៊ានធ្វើអ្វីៗតាមអំពើចិត្ត គឺមានការឃុបឃិតបើកដៃពីសំណាក់លោក ម៉ឹង យូឡេង ជាប្រធានមន្ទីរសាធារណការខេត្តកណ្ដាល ដើម្បីប្រមូលលុយចែកគ្នាធ្វើមានធ្វើបានយ៉ាងសុខស្រួល។ ដូច្នេះលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ ដែលធ្លាប់ប្ដេជ្ញាប្រព្រឹត្តអំពើពុករលួយនៅតាមដងផ្លូវនោះ មិនគួរមើលរំលងអំពើពុករលួយរបស់លោក សេង ស៊ុង ប្រធានស្ថានីយ៍ជញ្ជីងថ្លឹងរថយន្តនៅផ្លូវជាតិលេខ២នោះឡើយ។ បើមិនទប់ស្កាត់ទេលោក សេង ស៊ុង ដែលអាងមានលោក ម៉ឹង យូឡេង ជាបង្អែករឹងមាំអាចបង្កើនសកម្មភាពប្រព្រឹត្តអំពើពុករលួយកាន់តែខ្លាំងជាងសព្វថ្ងៃនេះទៀត។
ថ្មីៗនេះប្រភពពីអ្នកបើកបររថយន្តដឹកទំនិញ ដឹកដី ដឹកខ្សាច់មួយចំនួនបានឲ្យដឹងថា លោក សេង ស៊ុង ប្រើអំណាចគាបសង្កត់យកលុយពីពួកគាត់កាន់តែច្រើនឡើងៗ ចំណែកឈ្មួញធំៗដែលដឹកទំនិញតាមរថយន្តសណ្ដោងកន្ទុយលើសចំណុះ គឺមិនដែលឃើញលោក សេង ស៊ុង និងមន្ត្រីក្រោមឱវាទចាត់វិធានការទប់ស្កាត់នោះទេ។ មានការរិះគន់ចំៗថា លោក សេង ស៊ុង និងបក្ខពួកគឺជាអ្នកឃុបឃិតឲ្យឈ្មួញប្រើប្រាស់រថយន្តធំៗដឹកទំនិញលើសចំណុះឆ្លងកាត់ផ្លូវជាតិលេខ២យ៉ាងអនាធិបតេយ្យ ដោយគ្មានវិធានការទប់ស្កាត់អ្វីទាំងអស់។ ផ្ទុយទៅវិញគេបែរជាគាបសង្កត់ប្រជាពលរដ្ឋ ឈ្មួញ និងអាជីវករ ដែលដឹកជញ្ជូនទំនិញតិចតួចតាមរថយន្តដោយតម្រូវឲ្យបង់លុយថ្លៃក្បាលរថយន្តដោយមិនចាំបាច់ត្រួតពិនិត្យអ្វីទាំងអស់។ លោក ម៉ឹង យូឡេង ប្រធានមន្ទីរសាធារណការនិងដឹកជញ្ជូនខេត្តកណ្ដាល ត្រូវគេដឹងថាជាអ្នកបើកដៃឲ្យលោក សេង ស៊ុង និងមន្ត្រីប្រចាំស្ថានីយ៍ជញ្ជីងថ្លឹងរថយន្តលើផ្លូវជាតិលេខ២ ក្នុងឃុំព្រះពុទ្ធ ស្រុកកណ្ដាលស្ទឹង ធ្វើអ្វីៗស្រេចតែអំពើចិត្តហើយមានការបែងចែកផលប្រយោជន៍យ៉ាងសុខស្រួល។
ក្រុមមន្ត្រីរាជការក្នុងខេត្តកណ្ដាល ក៏បានឲ្យដឹងដែរថា នៅពេលរថយន្តរបស់ឈ្មួញធំៗដឹកទំនិញលើសចំណុះ ក៏ដូចជាដឹកដីដឹកខ្សាច់ ដឹកថ្មលើសចំណុះខុសលក្ខណៈបច្ចេកទេស គឺលោក សេង ស៊ុង និងបក្ខពួកមិនចាត់វិធានការទប់ស្កាត់ឡើយ ហើយគ្រាន់តែម្ចាស់រថយន្តទាំងនោះបង់លុយតាមការកំណត់ គឺជាការស្រេច។ ចំណែកឈ្មួញនិងអាជីវករតូចតាចដែលដឹកទំនិញលើសចំណុះតិចតួចត្រូវបានគេគាបសង្កត់យកលុយតាមរបៀបពុករលួយយ៉ាងគឃ្លើនតែម្តង ព្រោះលោក សេង ស៊ុង ប្រធានស្ថានីយ៍ជញ្ជីងថ្លឹងរថយន្តនៅផ្លូវជាតិលេខ២ អាងមានខ្នងបង្អែករឹងមាំចាំជួយការពារគ្រប់ពេលវេលា។ បញ្ហានេះជារឿងដែលលោក ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូន មិនគួរបណ្ដែតបណ្ដោយតទៅទៀតទេ ព្រោះរឿងអាស្រូវពុករលួយរបស់ក្រុមមន្ត្រីប្រចាំស្ថានីយ៍ជញ្ជីងថ្លឹងរថយន្តលើផ្លូវជាតិលេខ២ ក្នុងឃុំព្រះពុទ្ធ ស្រុកកណ្ដាលស្ទឹង ខេត្តកណ្ដាល កំពុងត្រូវមជ្ឈដ្ឋាននានារិះគន់យ៉ាងខ្លាំងក្លា៕
