កិច្ចប្រជុំបូកសរុប នៃបេសកកម្មគាំទ្រដល់ការអនុវត្តគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ ថ្ងៃអង្គារ ៤រោច ខែជេស្ឋ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី០២ ខែមិថុនា ឆ្នាំ២០២០ នៅការិយាល័យកណ្តាលធនាគារពិភពលោកប្រចាំកម្ពុជា ឯកឧត្តម កឹម បូរី អនុរដ្ឋលេខាធិការ នៃក្រសួងសាធារណការ និងដឹកជញ្ជូន បានដឹកនាំអង្គភាពគ្រប់គ្រងសមាសភាព គម្រោង (Component Management Unit) របស់ក្រសួងសាធារណការ និងដឹកជញ្ជូន អញ្ជើញចូលរួមកិច្ចប្រជុំបូកសរុប នៃបេសកកម្មគាំទ្រដល់ការអនុវត្តគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ (Implementation Support Mission) និងភាគីសមាសភាពគ្រប់គ្រងគម្រោងរបស់ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ ដឹកនាំដោយឯកឧត្តម យា ប៊ុនណា អនុរដ្ឋលេខាធិការ និងភាគីធនាគារពិភពលោក ។ គម្រោងលើកកម្ពស់ការផ្គត់ផ្គង់ទឹកស្អាត និងអនាម័យ នេះស្ថិតក្រោមឥណទានសម្បទានរបស់ធនាគារពិភពលោក ដើម្បីអភិវឌ្ឍវិស័យទឹកស្អាត និងអនាម័យ ធានាសុខុមាលភាពប្រជាពលរដ្ឋ និងលើកកម្ពស់ជីវភាពរស់នៅរបស់ប្រជាពលរដ្ឋឱ្យបានមួយកម្រិតទៀត។ កិច្ចប្រជុំនេះផ្ដោតជាសំខាន់លើស្ថានភាពនៃវឌ្ឍនភាពការងារដែលសម្រេចបាន និងការពិនិត្យ និងឯកភាពលើការកំណត់ផែនការសកម្មភាពដែលបានពិភាក្សាចាប់ពីថ្ងៃចាប់ផ្តើមបេសកកម្ម ដែលនឹងត្រូវសម្រេចឱ្យបានតាមកាលកំណត់ទៅតាមសកម្មភាពអាទិភាពដែលបានជជែកកន្លងទៅ ចាប់ពីថ្ងៃទី០២ ដល់ថ្ងៃទី០៨ ខែមិថុនា ឆ្នាំ២០២០។ ក្នុងនោះ មានការងារលទ្ធកម្ម ហិរញ្ញវត្ថុ ពិនិត្យ តាមដាន និងវាយតម្លៃ សង្គម និងបរិស្ថាន និងការងារពាក់ព័ន្ធផ្សេងៗ។ គួរកត់សម្គាល់នោះ គឺការពិភាក្សាពីគោលនយោបាយជាតិស្តីពីការផ្គត់ផ្គង់ទឹកស្អាត និងអនាម័យ (២០០៣) យន្តការនៃការរក្សានិរន្តរភាពការវិនិយោគ និងលិខិតបទដ្ឋានគតិយុត្តក្នុងការសម្រួលដល់ការស្នើសុំតភ្ជាប់បណ្តាញលូតាមផ្ទះមកបណ្តាញលូសាធារណៈ ។ល។ ឯកឧត្ដមអនុរដ្ឋលេខាធិការ បានផ្ដាំផ្ញើឱ្យភាគីទាំងអស់ខិតខំប្រឹងប្រែងបំពេញការងារឱ្យអស់ពីសមត្ថភាព ប្រកបដោយប្រសិទ្ធភាព និងតម្លាភាព រិះរកគ្រប់មធ្យោបាយ និងយុទ្ធសាស្ត្រ ដើម្បីបន្តអនុវត្តវឌ្ឍនភាពគម្រោង ដែលកំពុងមានភាពល្អប្រសើរ ហើយគ្រប់ភាគីបានឯកភាពលើរបៀបវារៈ ដែលបានរៀបចំឡើងសម្រាប់អនុវត្តបន្តនាពេលខាងមុខ៕