[Post khmer] - រដ្ឋមន្ត្រី ដកមន្ត្រី ៦ នាក់ ក្រោយពិនិត្យឃើញការជួសជុលផ្លូវខ្វះគុណភាព
2019-07-26
ទៅកាន់ទំព័រចុះផ្សាយក្នុង Post khmer
ភ្នំពេញ: មន្ត្រីត្រួតពិនិត្យបច្ចេកទេស ៦ រូបត្រូវបានរដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល ដកចេញពីតួនាទីជាអ្នកត្រួតពិនិត្យនិងគ្រប់គ្រងការងារស្ថាបនាកំណាត់ផ្លូវជាតិលេខ ៧ ឲ្យប្រសើរឡើងវិញ បន្ទាប់ពីរកឃើញចំណុចខ្វះខាតក្នុងការងារខណៈក្រុមហ៊ុនមួយចំនួនត្រូវបានព្រមានដាក់ក្នុងបញ្ជីខ្មៅប៉ុន្តែតម្រូវឲ្យដោះស្រាយគុណភាពផ្លូវបន្ទាន់។
លោក ហ៊ាង សុទ្ធាយុត្ត អ្នកនាំពាក្យក្រសួងនេះ បានថ្លែងថា ការផ្លាស់ប្ដូរមន្ត្រីទាំង ៦ រូបនេះ ដោយសារពួកគាត់គ្រប់គ្រង ការស្ថាបនាផ្លូវជាតិលេខ ៧ មានការខ្វះចន្លោះធ្វើឲ្យក្រុមហ៊ុនធ្វើការមិនប្រក្រតីច្រើន។
លោកបន្តថា ក្នុងអំឡុងពេលជិះកង់ត្រួតពិនិត្យផ្លូវនោះ លោកទេសរដ្ឋមន្ត្រី ស៊ុន ចាន់ថុល មិនបានពេញចិត្តទេ នៅពេលលោកឃើញផ្លូវដែលសាងសង់ក្នុងកម្រិត AC មួយនេះរងការខូចខាតច្រើនកន្លែងទាំងដំណើរការសាងសង់មិនទាន់ចប់។
លោកថា៖ «យើងបានណែនាំដល់ក្រុមហ៊ុនសាងសង់ និងក្រុមហ៊ុនពិនិត្យបច្ចេកទេស ត្រូវតែកែលម្អឡើងវិញត្រង់ចំណុចដែលរងការខូចខាតនោះ ហើយឯកឧត្តមរដ្ឋមន្ត្រីក៏គាត់លើកឡើងដែរថា ការធ្វើផ្លូវមិនបានល្អប្រសើរនេះ វាធ្វើឲ្យប៉ះពាល់ខ្លាំងដល់កិត្តិយសរបស់កម្ពុជា ក៏ដូចជារដ្ឋាភិបាលចិនដែរ អ៊ីចឹងក្រុមហ៊ុនត្រូវពង្រឹងគុណភាព»។
បើតាម លោក សុទ្ធាយុត្ត មន្ត្រីគម្រោង ៦ រូប ដែលក្រសួងសម្រេចប្តូរនោះរួមមាន៖ ប្រធានក្រុមទីប្រឹក្សាបច្ចេកទេសម្នាក់ អនុប្រធានក្រុមទីប្រឹក្សាបច្ចេកទេសម្នាក់ និងសមាជិកក្រុមទីប្រឹក្សាបច្ចេកទេស ៤ នាក់ ប៉ុន្ដែលោកមិនអាចបង្ហាញឈ្មោះ ឬអត្តសញ្ញាណបានទេ។
ខណៈចុះត្រួតពិនិត្យផ្លូវជាតិលេខ ៧ កាលថ្ងៃទី ២៤ ខែ កក្កដា លោក ស៊ុន ចាន់ថុល បានលើកឡើងថា បញ្ហាផ្លូវខូចនេះ គឺមកពីបច្ចេកទេសក្រុមហ៊ុនសាងសង់មិនត្រឹមត្រូវដូចជា ចាក់កៅស៊ូកម្រិត AC មិនត្រូវតាមបច្ចេកទេស។ រីឯការប្រេះស្រការនាគមកពីការលាយបេតុងកៅស៊ូមិនបានត្រឹមត្រូវ ឬអាចពេលចាក់កៅស៊ូកម្តៅមិនគ្រប់គ្រាន់តាមបច្ចេកទេស។
លោកថា៖ «យើងពិនិត្យមើលថា តើគាត់ (ក្រុមហ៊ុន) ខុសលក្ខណៈបច្ចេកទេសឬគាត់កេងប្រវ័ញ្ច។ នេះអាចឈានទៅដល់ការដាក់ក្នុងបញ្ជីខ្មៅមិនឲ្យដេញថ្លៃរាល់គម្រោងក្រោយៗទៀត ប៉ុន្តែខូចលក្ខណៈបច្ចេកទេសអ៊ីចឹង យើងអាចពិភាក្សាគ្នាបាន ហើយពិនិត្យទៀតបើគាត់ចេះតែខុសហើយខុសទៀត អាហ្នឹងគួរពិចារណាពេលដាក់ដេញថ្លៃយើងប្រាប់ទៅធនាគារពិភពលោកថា កុំឲ្យក្រុមហ៊ុនហ្នឹងចូលរួមដេញថ្លៃបន្តសាងសង់ផ្លូវក្នុងស្រុកខ្មែរតទៅទៀត»។
លោក ស៊ុន ចាន់ថុល បានប្រកាសថា អាចនឹងមានវិធានការតឹងរ៉ឹង ចំពោះក្រុមហ៊ុនណាដែលសាងសង់ផ្លូវមិនសូវមានគុណភាពដោយស្នើទៅរដ្ឋាភិបាលចិន និងម្ចាស់កម្ចីដទៃទៀតមិនអនុញ្ញាតឲ្យពួកគេចូលរួមដេញថ្លៃធ្វើផ្លូវទៀតទេ។
មន្ត្រីបច្ចេកទេសម្នាក់ សុំមិនបញ្ចេញឈ្មោះក្នុងចំណោម ៦ នាក់នៃក្រុមហ៊ុនពិនិត្យផ្លូវរបស់កូរ៉េខាងត្បូងឈ្មោះ Korea Consultants International (KCI) បានថ្លែងពីម្សិលមិញថា លោកបានត្រួតពិនិត្យ និងតាមដានការស្ថាបនាផ្លូវជាតិលេខ ៧ នេះជាប្រចាំ ប៉ុន្ដែពេលឃើញកំហុសរបស់ក្រុមហ៊ុនសាងសង់ លោកបានប្រាប់មេការ ប៉ុន្ដែពួកគាត់មិនបានស្ដាប់តាមការណែនាំទេ។
លោកបញ្ជាក់ថា៖ «ពេលខ្ញុំបានឃើញធ្វើខុសអ៊ីចឹង ដល់ពេលខ្ញុំទៅប្រាប់ថា កុំឲ្យគាត់ធ្វើអ៊ីចឹងទៀតគឺធ្វើអ៊ីចឹងខុសបច្ចេកទេសទេ ប៉ុន្ដែបុគ្គលិកក្រុមហ៊ុនសាងសង់ហ្នឹង គាត់អត់ព្រមបញ្ឈប់ធ្វើទេគឺគាត់នៅតែបន្តធ្វើទៀត ហើយខ្ញុំក៏បណ្ដោយឲ្យគាត់ធ្វើតទៀតទៅ»។
តំណាងក្រុមហ៊ុនចិន ឈ្មោះ Sichuan Road and Bridge (Group) Corporation Ltd ដែលជាអ្នកម៉ៅការធ្វើឲ្យផ្លូវជាតិលេខ ៧ ប្រសើរឡើងវិញ មិនអាចទាក់ទងសុំអត្ថាធិប្បាយពីករណីនេះបានទេ កាលពីថ្ងៃម្សិលមិញ ។
លោក សន ជ័យ នាយកប្រតិបត្តិនៃអង្គការសម្ព័ន្ធគណនេយ្យភាពសង្គមកម្ពុជា (ANSA) បានថ្លែងថា ការផ្លាស់ប្ដូរឬបញ្ឈប់មន្ត្រីអ្នកទទួលខុសត្រូវការដ្ឋាននេះ គឺជាចំណុចចាប់ផ្ដើមមួយល្អ ប៉ុន្ដែចំនួនផ្លូវមិនប្រក្រតីមានច្រើនខ្សែទៀត ដែលការត្រួតពិនិត្យរបៀបនេះ គួរមានវិសាលភាពធំទូលាយថែមទៀត។
លោកបញ្ជាក់ថា៖ «យើងបានឃើញគំរូផ្លូវមួយចំនួនដែរ ដូចជា នៅផ្លូវជាតិលេខ ៦ ដែលតម្រូវឲ្យក្រុមហ៊ុនសាងសង់ជាអ្នកទទួលខុសត្រូវឬសងជាសំណង។ទោះយ៉ាងណាការចាប់ផ្ដើមនេះ វាក៏អាចបន្លាចក្រុមហ៊ុនទទួលម៉ៅការផ្សេងៗទៀតឲ្យប្រុងប្រយ័ត្ន ប៉ុន្ដែពាក្យចាក់ស្ដើងស៊ីក្រាស់នេះ ក៏នៅតែមានវិសាលភាពនៅឡើយទេ»។
តាមរបាយការណ៍របស់ក្រសួងសាធារណការ និងដឹកជញ្ជូនបានបង្ហាញថា គម្រោងធ្វើឲ្យប្រសើរឡើងវិញនូវផ្លូវជាតិលេខ ៧ នេះត្រូវបានគេហៅថា Road Asset Management Project II (RAMPII) មានប្រវែងសរុប ៤៦០,៨៣០ គីឡូម៉ែត្រជាប្រភេទបេតុងកៅស៊ូ (AC) ចាប់ពីភូមិស្គន់ផ្លូវជាតិលេខ ៦ (PK៧៥+០០០) ឃុំសូទិប ស្រុកជើងព្រៃ ខេត្តកំពង់ចាមឆ្លងកាត់ខេត្តត្បូងឃ្មុំ ក្រចេះ រហូតទៅដល់តំបន់ត្រពាំងក្រៀល (ព្រំដែនកម្ពុជា-ឡាវ) ក្នុងខេត្តស្ទឹងត្រែង។
របាយការណ៍បន្តថា ក្នុងនោះប្រវែង ២៧៥,៥៦០ គីឡូម៉ែត្រ ត្រូវបានជួសជុល ដោយក្រុមហ៊ុនចិន ឈ្មោះ Sichuan Road and Bridge (Group) Corporation Ltd និងត្រួតពិនិត្យគុណភាពដោយក្រុមហ៊ុនកូរ៉េខាងត្បូងឈ្មោះ Korea Consultants International (KCI) ចាប់ពីបង្គោលគីឡូម៉ែត្រលេខ ១៣៦ ដោយប្រើប្រាស់ថវិកាអន្តរជាតិសរុបចំនួន ៦៩,៨២ លានដុល្លារអាមេរិកពោលគឺចាប់ពីបង្គោលគីឡូម៉ែត្រលេខ PK136-PK300 ក្រោមហិរញ្ញប្បទានពីធនាគារពិភពលោកក្នុងទឹកប្រាក់ចំនួន ៣៦,៤៥ លានដុល្លារអាមេរិកនិងចាប់ពីបង្គោលគីឡូម៉ែត្រលេខ PK332.125 ដល់ PK-424.690 គឺជាជំនួយឥតសំណងរបស់រដ្ឋាភិបាលចិនក្នុងទឹកប្រាក់ចំនួន ៣៣,៣៧ លានដុល្លារអាមេរិក៕
