ភ្នំពេញ៖ លោក ស៊ុន ចាន់ថុល ទេសរដ្ឋមន្ដ្រី រដ្ឋមន្ដ្រីក្រសួងសាធារណការ និងដឹកជញ្ជូន បានក្រើនរំលឹកថា ធ្វើជាមន្ត្រីក្រសួងសាធារណការ មិនត្រូវមានជំងឺតួឯកឡើយ ត្រូវសហការជាមួយមន្ទីរ ឬស្ថាប័នពាក់ព័ន្ធ នៅជុំវិញខេត្តនីមួយៗ។ ក្នុងពិធីប្រកាសផ្ទេរ សម្រួលភារកិច្ច និងចូលកាន់មុខតំណែងប្រធានមន្ទីរថ្មី នៃមន្ទីរសាធារណការ និងដឹកជញ្ជូន ខេត្តព្រះសីហនុ នៅថ្ងៃទី១៩ ខែកក្ដដា ឆ្នាំ២០១៩ លោក ស៊ុន ចាន់ថុល បានថ្លែងថា វិស័យសាធារណការ ជាវិស័យមួយដែលដើរតួយ៉ាងសំខាន់ក្នុងការទ្រទ្រង់ និងអភិវឌ្ឍសេដ្ឋកិច្ចឲ្យមានភាពរឹងមាំ។ លោកមានប្រសាសន៍ថា “ធ្វើជាមន្ត្រី មិនត្រូវមានជំងឺតួឯកឡើយ ពោលគឺត្រូវសហការគ្នាយ៉ាងស្អិតរមួតជាមួយមន្ទីរ ស្ថាប័នពាក់ព័ន្ធនៅជុំវិញខេត្ត ដើម្បីអនុវត្តផែនការ គោលនយោបាយរបស់រាជរដ្ឋាភិបាល ដែលបានដាក់ជូន”។ ឆ្លៀតឱកាសនោះដែរ រដ្ឋមន្ដ្រីសាធារណការ បញ្ជាក់ថា បើគ្មានហេដ្ឋារចនាសម្ព័ន្ធរឹងមាំនោះទេ ក៏គ្មានការអភិវឌ្ឍដែរ។លោកថា ជាក់ស្ដែង ខេត្តព្រះសីហនុ មាន ផ្លូវទឹក ផ្លូវគោក ផ្លូវដែក និងផ្លូវអាកាស ដែលធ្វើឲ្យខេត្តមួយនេះ ជាខេត្តប្រកបដោយសក្ដានុពល អាចពង្រីកវិសាលភាពរបស់ខ្លួន មិនត្រឹមតែជាខេត្តទេសចរណ៍ប៉ុណ្ណោះទេ តែថែមទាំងជាខេត្តបោះជំហាន ទៅជាខេត្តឧស្សាហកម្ម ពាណិជ្ជកម្មដ៏មានសន្ទុះ រីកចម្រើនផងដែរ៕