[Bayon TV] - ឯកឧត្ដម ស៊ុន ចាន់ថុល ដឹកនាំជំនាញចុះមើលស្ថានភាពផ្លូវជាតិលេខ៤១ ផ្លូវជាតិ៣៣ ផ្លូវជាតិ៣១ និងផ្លូវជាតិលេខ៣
2019-06-13
ទៅកាន់ទំព័រចុះផ្សាយក្នុង Bayon TV
ភ្នំពេញ ៖ នៅថ្ងៃទី១៣ ខែមិថុនា ឆ្នាំ២០១៩នេះ ឯកឧត្ដម ទេសរដ្ឋមន្ដ្រី ស៊ុន ចាន់ថុល រដ្ឋមន្ដ្រីក្រសួងសាធារណការ និងដឹកជញ្ជូន បានដឹកនាំប្រតិភូជំនាញៗ ជាច្រើនរូប នៃកិច្ចការសាធារណការ និងដឹកជញ្ជូន អញ្ជើញពិនិត្យស្ថានភាពពិតដោយផ្ទាល់លើផ្លូវជាតិសំខាន់ៗចំនួន៤ នៅតំបន់ ភាគខាងត្បូង មានដូចជា ផ្លូវជាតិលេខ ៤១ ផ្លូវជាតិលេខ ៣៣ ផ្លូវជាតិលេខ ៣១ និងផ្លូវជាតិលេខ៣ ដែលស្ថិតក្នុងខេត្តកំពង់ស្ពឺ កំពត កែប និងតាកែវ។
ផ្លូវជាតិលេខ៣ កំពុងស្ថាបនាបាន ២០,៨៧% គិតពីចោមចៅ ដល់កំពត មានប្រវែង ១៣៤,៨០km ហើយគិតពីកំពត ទៅដល់រង្វង់មូលស្រុកព្រៃនប់កំពុងស្ថាបនាបាន ៦៧,៥០% ការដ្ឋានផ្លូវជាតិលេខ៣នេះ កំពុងស្ថាបនាដោយក្រុមហ៊ុនចិន ដោយរយៈពេលស្ថាបនា ៤៨ខែ។ ផ្លូវជាតិលេខ ៤១ ឆ្លងកាត់កំពង់ស្ពឺ តាកែវ និងកំពត ជាការជួល ជុលខួប និងថែទាំជាប្រចាំដោយមន្ទីរសាធារណការខេត្តទាំង៣។
ផ្លូវជាតិលេខ ៣១ ជាការជួល ជុលខួប និងថែទាំជាប្រចាំដោយមន្ទីរសាធារណការខេត្តកំពត។ ផ្លូវជាតិលេខ ៣៣ ឆ្លងកាត់ពីកំពត ទៅមកខេត្តកែប ជាការជួល ជុលខួប និងថែទាំជាប្រចាំដោយមន្ទីរសាធារណការខេត្តកំពត និងកែប។
គួរបញ្ជាក់ថា ផ្លូវជាតិទាំង៤ខ្សែនេះ កន្លងមកបានរងការខូចខាតដោយសារជំនន់ទឹកភ្លៀង និងការដឹកជញ្ជូនធ្ងន់ៗឆ្លងកាត់ ខណៈដែលផ្លូវជាតិលេខ៤បានផ្អាកចរាចរណ៍ខ្លះៗ ដោយសារការជន់លិចកាលពីឆ្នាំ២០១៨៕
