ឯកឧត្តម ទេសរដ្ឋមន្រ្តី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន និងជាប្រធានក្រុមការងារថ្នាក់ជាតិចុះស្រុកកោះធំ រួមជាមួយក្រុមការងារបាននាំគ្នាជិះកង់ដោយផ្ទាល់ទៅបើកការដ្ឋានកសាងផ្លូវបេតុងមួយខ្សែនៅស្រុកកោះធំ នៅព្រឹកថ្ងៃទី២៨ខែសីហា ឆ្នាំ២០១៨នេះ។ ឯកឧត្តមទេសរដ្ឋមន្រ្តី និងក្រុមការងារបានធ្វើដំណើរដោយកង់ចេញពីទីស្នាក់ការគណបក្សប្រជាជនកម្ពុជាឆ្ពោះទៅការដ្ឋានសាងសង់ផ្លូវស្ថិតនៅក្នុងភូមិចាស់ និងភូមិចុងព្រែក ឃុំព្រែកស្តី ស្រុកកោះធំ ខេត្តកណ្តាល ដែលមានការចូលរួមពីប្រជាពលរដ្ឋប្រមាណ៥៣៩នាក់។ ការបោះឆ្នោតជ្រើសតាំងតំណាងរាស្រ្តអាណត្តិទី៦ទើបបានបញ្ចប់ទៅថ្មីៗ ដោយរដ្ឋាភិបាលថ្មីមិនទាន់បានបង្កើតជាផ្លូវការនៅឡើយ មិនបង្អង់យូរ ឯកឧត្តមទេសរដ្ឋមន្រ្តី ស៊ុន ចាន់ថុល បានបន្តការយកចិត្តទុកដាក់គិតគូរចំពោះអ្នកស្រុកកោះធំជាបន្តដោយបានកសាងផ្លូវបេតុងមួយខ្សែប្រវែង២០០០ម៉ែតជូនអ្នកស្រុកកោះធំ។ ផ្លូវមួយខ្សែនេះនឹងអាចជួយសម្រួលបានយ៉ាងច្រើនដល់ការលំបាករបស់បងប្អូនប្រជាពលរដ្ឋស្រុកកោះធំ ជាពិសេស សិស្សានុសិស្សអាច ធ្វើដំណើរទៅសាលារៀនបានងាយស្រួល និងអាចដឹកកសិផលទៅកាន់ទីផ្សារបានឆាប់រហ័សផងដែរ៕