ខេត្តកំពង់ស្ពឺ ៖ លោក ហន ពិសិដ្ឋ អភិបាលស្រុកគងពិសីបានឱ្យដឹងនៅព្រឹកថ្ងៃទី៤ វិច្ឆិកា ឆ្នាំ២០២៤នេះថា កំណាត់ផ្លូវជាតិ៣ ចំនួន២ទីតាំង ប្រវែងជិត២០០០ម៉ែត្រ កំពុងតែរងការជនលិចដោយជំនន់ទឹកភ្លៀង ហើយអាជ្ញាធរស្រុក មន្ត្រីជំនាញពាក់ព័ន្ធកំពុងជួយអន្តរាគមន៍រំដោះទឹកចេញ ដើម្បីពន្លឿនចរន្តទឹកហូរ និងបញ្ចៀសការជន់លិចយូរអង្វែង ។អភិបាលស្រុកគងពិសី លោក ហន ពិសិដ្ឋ បានឱ្យដឹងទៀតថា ជំនន់ទឹកភ្លៀងកំពុងតែជន់លិចកំណាត់ផ្លូវជាតិលេខ៣ត្រង់ចំណុចក្បែរផ្សារប៉ាំងសី ស្ថិតក្នុងឃុំព្រៃវិហារ និងក្បែរផ្សារត្រាំខ្នា ឃុំជង្រុក នៃស្រុកគងពិសី ខេត្តកំពង់ស្ពឺ ។ បច្ចុប្បន្ន អាជ្ញាធរស្រុក និងកម្លាំងសមត្ថកិច្ចកំពុងសម្រួលកកស្ទះ និងបញ្ចៀសចរាចរណ៍ឱ្យបើកបរលើផ្លូវម្ខាងទៀត ដើម្បីកុំឱ្យស្រុតផ្លូវ ។លោក ហន ពិសិដ្ឋ អភិបាលស្រុកគងពិសីបានបញ្ជាក់ផងដែរថា ទឹកអាចនឹងហូរអស់ពីផ្លូវនៅត្រឹមតែប៉ុន្មានម៉ោងទៀតប៉ុណ្ណោះ គ្រាដែលអាជ្ញាធរស្រុកបាទីនៃខេត្តតាកែវ កំពុងជួយដុតដៃដុតជើងអន្តរាគមន៍កាយបើកមុខទឹក ដើម្បីឱ្យហូរបានលឿន ។ទន្ទឹមនេះ លោកក៏បានអំពាវនាវដល់អ្នកបើកបរយានយន្តធំៗទាំងអស់ ដែលមានបំណងឆ្លងកាត់ផ្លូវនេះ អាចបង្វែរចេញទៅផ្លូវផ្សេងសិន រង់ចាំទឹកស្រកទៅវិញ និងដើម្បីបញ្ចៀសការកកស្ទះផងដែរ ៕