(ភ្នំពេញ) ៖ រដ្ឋបាលខណ្ឌពោធិ៍សែនជ័យ នៅថ្ងៃទី២៩ ខែមិថុនា ឆ្នាំ២០១៨នេះ បានចេញសេចក្តីជូនដំណឹង ស្តីពីការផ្អាកចរាចរណ៍ កំណាត់ផ្លូវជាតិលេខ៣ ផ្លូវជាតិលេខ៤ ផ្លូវវេងស្រេង និងមហាវិថីសហព័ន្ធរុស្ស៊ី ដែលឆ្លងកាត់ត្រង់ចំណុចរង្វង់មូលចោមចៅត្រូវផ្អាកជាបណ្តោះអាសន្ន ក្នុងពិធីបើកការដ្ឋានសាងសង់ស្ពានអាកាស និងផ្លូវក្រោមដី រង្វង់មូលចោមចៅ នៅថ្ងៃទី២៩ ខែមិថុនា ឆ្នាំ២០១៨នេះខាងមុខនេះ។ យោងតាមសេចក្តីជូនដំណឹងដែល Swift News ទើបតែទទួលបាននៅរសៀលថ្ងៃទី២៧ ខែមិថុនា ឆ្នាំ២០១៨នេះ ដោយបានបញ្ជាក់ថា នៅព្រឹកថ្ងៃទី២៩ ខែមិថុនា ឆ្នាំ២០១៨នេះ នឹងរៀបចំពិធីបើកការដ្ឋានសាងសង់ស្ពានអាកាស និងផ្លូវក្រោមដីរង្វង់មូលចោមចៅ ស្ថិតនៅភូមិថ្នល់បំបែក សង្កាត់ចោមចៅទី៣ ខណ្ឌពោធិ៍សែនជ័យ ក្រោមអធិបតីភាពដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិពព្រឹទ្ធបណ្ឌិត។ សេចក្តីជូនដំណឹងនោះបានបញ្ជាក់បន្ថែមថា ដើម្បីឲ្យការប្រារព្វពិធីនេះប្រព្រឹត្តទៅដោយរលូន ធានានូវសន្តិសុខ សុវត្ថិភាព សណ្តាប់ធ្នាប់ និងរបៀបរៀបរយសាធារណៈ ព្រមទាំងបញ្ជៀសបាននូវការកកស្ទះចរាចរណ៍ក្នុងដំណើរការកម្មវិធី រដ្ឋបាលខណ្ឌពោធិ៍សែនជ័យ និងធ្វើការផ្អាកចរាចរណ៍ឆ្លងកាត់ផ្លូវរង្វង់មូលចោមចៅ នាព្រឹកថ្ងៃទី២៩ ខែមិថុនា ឆ្នាំ២០១៨នវ វេលាម៉ោង៤ . ០០នាទីព្រឹករហូតដល់ម៉ោង១២.៣០នាទីរសៀលជាបណ្តោះអាសន្ន៕