ព្រៃវែង៖ កំណាត់ផ្លូវខេត្ដលេខ៣១២ (សំរោង-កគោ ព្រំប្រទល់កម្ពុជា-វៀតណាម) ត្រូវបានបើកការដ្ឋានលើកកម្រិត និងជួសជុល នាព្រឹកថ្ងៃទី០៩ ខែមិថុនា ឆ្នាំ២០២៣ ក្រោមអធិបតីភាពរដ្ឋមន្ត្រីក្រសួងមហាផ្ទៃ សម្តេចក្រឡាហោម ស ខេង។ ផ្លូវខេត្ដលេខ៣១២ (សំរោង-កគោ ព្រំប្រទល់កម្ពុជា-វៀតណាម) មានប្រវែងសរុបជាង ២៨គីឡូម៉ែត្រ ស្ថិតក្នុងស្រុកព្រះស្ដេច ខេត្ដព្រៃវែង ដែលជាគម្រោងលើកកម្រិតបណ្តាញផ្លូវថ្នល់ ជំហានទី២ ក្រោមឥណទានសម្បទានរបស់ធនាគារអភិវឌ្ឍន៍អាស៊ី (ADB)។ រដ្ឋមន្ត្រីក្រសួងសាធារណការ និងដឹកជញ្ជូន ទេសរដ្ឋមន្ត្រី ស៊ុន ចាន់ថុល បានបញ្ជាក់ថា ផ្លូវខេត្តលេខ៣១២ ចាប់ផ្តើមសាងសង់ ឡើងនៅក្នុងឆ្នាំ២០១១ ក្រោមជំនួយឥណទានពីប្រទេសវៀតណាម ហើយផ្លូវមួយនេះបានខូចខាតទ្រុឌទ្រោមដោយសារការដឹកជញ្ជូន ក៏ត្រូវបានជួសជុលជាច្រើនលើកមកហើយផងដែរ។ ទេសរដ្ឋមន្ត្រី ស៊ុន ចាន់ថុល បានបញ្ជាក់ថា គម្រោងជួសជុលផ្លូវខេត្ត នឹងជួយសម្រួលការដឹកជញ្ជូនទៅទីផ្សាក្នុងខេត្ត និងទៅតំបន់ផ្សេងទៀត សម្រួលដល់ការធ្វើដំណើរទៅសាលារៀន ផ្សារ និងទីតំបន់ផ្សេងក្នុងខេត្ត។ ជាពិសេសផ្លូវខេត្តមួយនេះ និងផ្តល់ភាពងាយស្រួលក្នុងការផ្លាស់ប្តូរពាណិជ្ជកម្មរវាងកម្ពុជា និងវៀតណាមឱ្យកាន់តែប្រសើរបន្ថែមទៀត។ សម្តេចក្រឡាហោម ស ខេង បានលើកឡើងថា ផ្លូវមួយនេះគ្រោងចំណាយថវិកាសម្រាប់លើកកម្រិត និងជួសជុលចំនួនជិត២៥លានដុល្លារ ចំណាយពេលជួសជុលចំនួន១៨ខែ ដែលផ្លូវមួយនេះគឺជាចំណងដៃសម្រាប់សម្រួលពលរដ្ឋខេត្តព្រៃវែងធ្វើដំណើរប្រកបដោយសុវត្ថិភាព៕