ជំនួបពិភាក្សាការងាររវាងគណៈប្រតិភូមជ្ឈមណ្ឌលសហប្រតិបត្តិការសេដ្ឋកិច្ចក្រៅប្រទេសនៃក្រសួងកសិកម្ម និងកិច្ចការជនបទចិន ស្ដីពីគម្រោងការងារផែនការអភិវឌ្ឍន៍វិស័យកសិកម្ម កម្ពុជា-ចិន ទីស្ដីការក្រសួង៖ ថ្ងៃអង្គារ ១២រោច ខែពិសាខ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី១៦ ខែឧសភា ឆ្នាំ២០២៣ ឯកឧត្តម ស៊ឹង សុគង់ អនុរដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញទទួលជួបពិភាក្សាការងារជាមួយគណៈប្រតិភូមជ្ឈមណ្ឌលសហប្រតិបត្តិការសេដ្ឋកិច្ចក្រៅប្រទេស នៃក្រសួងកសិកម្ម និងកិច្ចការជនបទចិន ស្ដីពីគម្រោងការងារផែនការអភិវឌ្ឍន៍វិស័យកសិកម្ម កម្ពុជា-ចិន ដោយមានការចូលរួមពីថ្នាក់ដឹកនាំក្រសួង (តំណាងអគ្គនាយកដ្ឋានភស្ដុភារកម្ម តំណាងអគ្គនាយកដ្ឋានផែនការ និងគោលនយោបាយ តំណាងអគ្គនាយកដ្ឋានផ្លូវទឹក ផ្លូវសមុទ្រ និងកំពង់ផែ តំណាងអគ្គនាយកដ្ឋានរដ្ឋបាល និងហិរញ្ញវត្ថុ និងនាយកដ្ឋានផ្លូវដែក) តំណាងក្រសួងកសិកម្ម និងគណៈប្រតិភូមជ្ឈមណ្ឌលសហប្រតិបត្តិការសេដ្ឋកិច្ចក្រៅប្រទេស និងកិច្ចការជនបទ នៃសាធារណៈរដ្ឋប្រជាមានិតចិន។ ជាកិច្ចចាប់ផ្ដើម ឯកឧត្តមអនុរដ្ឋលេខាធិការ បានសំដែងការស្វាគមន៍យ៉ាងកក់ក្ដៅ និងថ្លែងអំណរគុណយ៉ាងជ្រាលជ្រៅជូនចំពោះប្រជាជន និងរដ្ឋាភិបាលនៃសាធារណរដ្ឋប្រជាមានិតចិន ដែលបានជួយឧបត្ថម្ភគាំទ្រដល់ការអភិវឌ្ឍលើគ្របវិស័យនៅព្រះរាជាណាចក្រកម្ពុជា និយាយជារួម និងដោយឡែកវិស័យសាធារណការ និងដឹកជញ្ជូន បាននឹងកំពុងរីកចំរើនគួរឱ្យកត់សម្គាល់។ តាមរយៈបទបង្ហាញ គណៈប្រតិភូបានវាយតម្លៃខ្ពស់អំពីសមិទ្ធផល នៃការអភិវឌ្ឍហេដ្ឋារចនាសម្ព័ន្ធ និងប្រព័ន្ធភស្ដុភារកម្ម នៅប្រទេសកម្ពុជារួមមានផ្លូវគោក ផ្លូវទឹក ផ្លូវដែក កំពង់ផែ ភស្ដុភារកម្ម ដែលជាមូលដ្ឋានអាចជួយគាំទ្រដល់ការរៀបចំផែនការអភិវឌ្ឍន៍វិស័យកសិកម្ម កម្ពុជា-ចិន ឱ្យមានភាពគ្រប់ជ្រុងជ្រោយ។ គណៈប្រតិភូក៏បានថ្លែងការកោតសរសើរអំពីការអភិវឌ្ឍដ៏គួរឱ្យកត់សម្គាល់របស់កម្ពុជា និងបានបង្ហាញចំណាប់អារម្មណ៍យ៉ាងខ្លាំងលើលទ្ធផលនៃការរៀបចំផែនការមេគ្រប់ជ្រុងជ្រោយស្ដីពីប្រព័ន្ធដឹកជញ្ជូនពហុមធ្យោបាយ និងភស្ដុភារកម្ម ២០២២-២០៣០ ដែលគ្រោងនឹងបញ្ចប់ និងអនុម័តនាពេលដ៏ខ្លីមុខនេះ។ ក្រុមការងារជំនាញ ក្រសួងសាធារណការ និងដឹកជញ្ជូន បានស្វាគមន៍ និងបន្តត្រៀមសហការ ជាមួយប្រតិភូចិន ដើម្បីផ្តល់ទិន្នន័យព័ត៏មានចាំបាច់ប្រសិនបើមានសំណូមពរ៕