ភ្នំពេញៈ ការសាងសង់ផ្លូវបេតុងឆ្អឹងដែកលើខ្នងទំនប់អាងត្រពាំងថ្មដោយក្រសួងធនធានទឹកនិងឧតុនិយមគិតមកដល់ថ្ងៃទី៩ខែមីនាសម្រេចបានលទ្ធផលប្រមាណជា៩៨ភាគរយនៃគម្រោងផ្លូវប្រវែងជាង១៧គីឡូម៉ែត្រទទឹង៦ម៉ែត្រកម្រាស់២តឹកនោះហើយ រីឯកំណាត់ផ្លូវនេះត្រូវធ្វើបន្តដោយក្រសួងអភិវឌ្ឍន៍ជន បទដែលត្រូវចាក់កៅស៊ូក៏កំពុងតែចាប់ផ្តើមធ្វើដែរ។ លោក យឹម ប៊ុនរ៉ុម ប្រធានមន្ទីរធនធានទឹកនិងឧតុនិយមខេត្តបន្ទាយមានជ័យបានប្រាប់ឱ្យរស្មីកម្ពុជាដឹងនៅថ្ងៃទី៩ខែមីនា២០២៣ថាគម្រោងសាងសង់ផ្លូវបេតុងឆ្អឹងដែកលើខ្នងទំនប់អាងត្រពាំងថ្មគិតត្រឹថ្ងៃទនេះ(៩មីនា)សម្រេចបានលទ្ធផលការងារប្រមាណជា៩៨ភាគរយនៃគម្រោងផ្លូវទាំងមូលហើយ ដោយការចាក់បេតុងពេញទទឹងផ្លូវ៦ ម៉ែត្របានប្រវែង១៦.៦០០ម៉ែត្រនិងចាក់បេតុងមួយចំហៀងផ្លូវទទឹង៣ម៉ែត្របានប្រវែង១៧.៤៦០ម៉ែត្រ គឺបានដល់គោលដៅហើយ។ លោក ប្រធានមន្ទីរខាងលើបាននិយាយឱ្យដឹងទៀតថាការសាងសង់ផ្លូវបេតុងឆ្អឹងដែកលើទំនប់អាងត្រពាំងថ្មកម្រាស់ពីរតឹកនេះអាងនឹងរួចរាល់ក្នុងរយៈពេល១០ថ្ងៃទៀតដោយ ក្នុងមួយថ្ងៃចាក់បានក្នុងរង្វង់១០០ម៉ែត្រទទឹង៣ម៉ែត្រ ហើយផ្លូវដែលត្រូវចាក់នៅសល់ទទឹង៣ម៉ែត្រប្រវែង៨៦០ម៉ែត្របន្ថែមទៀត។ គម្រោងចាក់បេតុងពីមុនប្រវែង២១គីឡូម៉ែត្រ តែនៅពេលនេះបានកាត់ចេញប្រវែងប្រមាណជា៣គីឡូម៉ែត្រវិញ ដោយសារវាជាន់លើគម្រោងរបស់ក្រសួងអភិវឌ្ឍន៍ជនដែលត្រូវសាងសង់បន្តដោយចាក់កៅស៊ូដោយនៅពេលនេះគេកំពុងតែចាប់ផ្តើមធ្វើការសាងសង់ឡើងដែរ។ គម្រោងសាងសង់ផ្លូវបេតុងដោយក្រសួងធនធានទឹកនិងឧតុនិយមនៅលើខ្នងទំនប់អាងទឹកត្រពាំងថ្មនេះ កើតមានឡើងបន្ទាប់ពីប្រជាពលរដ្ឋនៅក្នុងខេត្តបន្ទាយមានជ័យ ជាពិសេសអ្នករស់នៅនិងប្រើប្រាស់ផ្លូវនេះផ្ទាល់ បានស្នើសុំសម្តេចតេជោ នៅក្នុងឱកាសសម្តេចអញ្ជើញចូលរួមក្នុងកម្មវិធី ទិវាមច្ឆាជាតិ នៅអាងត្រពាំងថ្មកាលពីថ្ងៃទី១ ខែកក្កដា ឆ្នាំ២០២២ កន្លងទៅរួចមក។ គម្រោងខាងលើនេះ តាមពិតត្រូវចាក់កៅស៊ូ តាំងពីឆ្នាំ២០១៣មកម្ល៉េះ តែដោយសារមាន ការប្រទាញប្រទង់គ្នា ជាមួយនឹងស្ថាប័នជំនាញផ្សេងទៀត ទើបធ្វើឱ្យការសាងសង់ផ្លូវនេះខកខានរហូតដល់ពេលសព្វថ្ងៃ៕