ភ្នំពេញ៖ សម្តេចក្រឡាហោម ស ខេង ឧបនាយករដ្ឋមន្រ្តីរដ្ឋមន្រ្តីក្រសួងមហាផ្ទៃ បានថ្លែងថា ច្បាប់​ស្តីពីចរាចរណ៍ ផ្លូវគោកថ្មី ​កំណត់ឲ្យអ្នកបើកបរយានយន្តទាំងអស់ ជាពិសេសគឺអ្នកបើក​រថយន្តធំៗ​ដែលដឹកទំនិញ ​និងអ្នកដំណើរត្រូវតែធ្វើតេស្តរកសារធាតុញៀនជាកតព្វកិច្ច ដោយមិន​អាចអត់​បាន​នោះឡើយ ​ហើយមួយវិញទៀត ​ប្រសិនបើអ្នកបើកបរណាមានសារធាតុញៀន​ និង​ស្រវឹងស្រា ​នឹងត្រូវដកប័ណ្ណបើកបរ​ ហើយនឹងចាត់វិធានការទៅតាមផ្លូវច្បាប់ផងដែរ។ ថ្លែងប្រាប់អ្នកសារព័ត៌មានក្រោយបញ្ចប់កិច្ចប្រជុំឆ្លងសេចក្ដីព្រាងច្បាប់ ​ស្ដីពីចរាចរណ៍ផ្លូវគោកថ្មី នៅ​ទីស្ដីការក្រសួងមហាផ្ទៃ នាព្រឹកថ្ងៃទី២៨ ខែធ្នូ ឆ្នាំ២០២២នេះ ​សម្ដេច ស ខេង បានមាន​ប្រសាសន៍​ថា សេចក្ដីព្រាងច្បាប់ស្ដីពីចរាចរណ៍ផ្លូវគោកថ្មីនេះ​ មានភាព​គ្រប់ជ្រុង​ជ្រោយ​ជាងច្បាប់ចាស់ ហើយ​មន្រ្តី​អន្តរក្រសួងជាពិសេសក្រសួងមហាផ្ទៃ​ និងក្រសួងសាធារណការក៏បានឯកគ្នាទាំង​ស្រុងផងដែរ ដើម្បី​បញ្ជូន​ទៅស្ថាប័នរដ្ឋសភា ​នាដើមឆ្នាំ២០២៣ខាងមុខនេះ។ សម្តេចក្រឡាហោម ស ខេង​ បានបញ្ជាក់ទៀតថា ​សេចក្ដីព្រាងច្បាប់​ ស្ដីពីចរាចរណ៍ផ្លូវគោកថ្មី នឹង​បញ្ជូនទៅគណៈរដ្ឋមន្រ្តី ​នាដំណាច់ឆ្នាំ២០២២នេះ ​ហើយបន្ទាប់​នឹងបន្តបញ្ជូនទៅដល់ដៃស្ថាប័ន​សភា ​នាត្រីមាសទី១ឆ្នាំ២០២៣ ខាងមុខ។ច្បាប់ស្តីពីចរាចរណ៍ផ្លូវគោកថ្មីនេះ​ គឺមាន៩ជំពូក និងជាង៩០មាត្រា។ ឯកឧត្តម តូច ចាន់កុសល រដ្ឋលេខាធិការក្រសួងសាធារណការ​ និង​ដឹក​ជញ្ជូន និង​ជាប្រធាន​ក្រុមការងារ​តាក់តែង​សេចក្ដីព្រាងច្បាប់​ស្ដីពីចរាចរណ៍ផ្លូវគោក ​បានរាយការណ៍ជូន​សម្ដេច​ក្រឡា​ហោម ​និងអង្គប្រជុំអំពីហេតុផលសំខាន់ៗ​ដែលនាំ​ឱ្យរៀបចំសេចក្ដីព្រាង​ច្បាប់ថ្មីនេះ ដោយ​នៅក្នុងភាពគ្រប់ជ្រុងជ្រោយនៃច្បាប់នេះ​មានការបន្ថែម​ និង​កំណត់នូវប្រភេទ​បទល្មើស​ចរាចរណ៍​ផ្លូវគោកផងដែរ៕