ពោធិសាត់៖ផ្លូវក្រាលក្រួសក្រហមនៅទីប្រជុំជនឃុំអូរសោម ស្រុកវាលវែង ខេត្តពោធិ៍សាត់ចំនួនប្រាំមួយខ្សែប្រវែង២៨ គីឡូម៉ែត្រត្រូវបានបើកការដ្ឋានស្ថាបនាទៅជាផ្លូវបេតុងដោយប្រើប្រាស់កញ្ចប់ថវិការបស់ខេត្ត។ ការដ្ឋាននេះបានប្រារព្ធបើកកាលពីថ្ងៃទី ២៧ខែវិច្ឆិកា នៅចំណុចសាលាបឋមសិក្សាអូរសោម កក្រោមវត្តមានលោក ខូយ រីដា អភិបាលខេត្ត លោកបណ្ឌិត ទី ថានី អនុប្រធានទី១អាជ្ញាធរអគ្គិសនីកម្ពុជា និងជាប្រធានក្រុមការងាររាជរដ្ឋាភិបាល ចុះជួយមូលដ្ឋានស្រុកវាលវែង។ បណ្ឌិត ទី ថានី បានមានប្រសាសន៍ថា ផ្លូវលំសំខាន់ៗនៅក្នុងទីប្រជុំជនឃុំអូរសោម ស្រុកវាលវែងចំនួនប្រាំមួយខ្សែស្មើនឹង២៨គីឡូម៉ែត្រ នឹងធ្វើទៅជាផ្លូវបេតុងដោយពង្រីកទទឹងផ្លូវ២០ម៉ែត្រនិងតួផ្លូវ១០ម៉ែត្រ។ការដ្ឋានស្ថាបនានេះបានប្រើប្រាស់កញ្ចប់ថវិកា គុណប្រយោជន៍របស់ខេត្តនិងទទួលម៉ៅការដោយក្រុមហ៊ុនគីស៊ីញូនៀនទៅតាមដំណាក់កាលជាជំហានៗ។ ក្នុងឱកាសនោះលោកអភិបាលខេត្តពោធិ៍សាត់បានអំពាវនាវដល ប្រជាពលរដ្ឋ ដែលរស់នៅតាមដងផ្លូវ ដែលមានការ ប៉ះពាល់ របង ផលដំណាំបន្តិច បន្តួចនោះមេត្តាយោគយល់ដល់ក្រុមកាងារស្ថាបនានិងសូមចូលរួមដោយស្មោះស្ម័គ្រ ដើម្បីទទួលបានផ្លូវលំបេតុងដ៏រឹងល្អនេះនៅក្នុងភូមិ ឃុំ ស្រុកសម្រាប់ផលប្រយោជន៍រួមនិងបានប្រើប្រាស់ទាំងអស់គ្នា ។ លោកអភិបាលខេត្តពោធិ៍សាត់បញ្ជាក់ទៀតថាទាំងអស់នេះគឺជាសមិទ្ធផលថ្មីមួយទៀត បន្ទាប់ពីសមិទ្ធផលនានាជាច្រើន ក្រោមដំបូលនៃសុខសន្តិភាពនិងក្រោមការដឹកនាំប្រកបដោយគតិបណ្ឌិតរបស់សម្ដេចតេជោ ហ៊ុន សែន បានផ្តល់ជូនប្រជាពលរដ្ឋក្នុងឃុំអូរសោម ស្រុកវាលវែងក៏ដូចប្រជាពលរដ្ឋទូទាំងខេត្តពោធិ៍សាត់ ។ សូមជម្រាបជូនថា ខេត្តពោធិ៍សាត់គឺជាខេត្តមួយក្នុងចំណោម ២៥រាជធានី ខេត្ត ដែលប្រមុខរាជរដ្ឋាភិបាល បានផ្តោតការយកចិត្តទុកដាក់ក្នុងការអភិវឌ្ឍនូវហេដ្ឋារចនាសម្ព័ន្ធដោយកំពុងធ្វើការស្ថាបនាផ្លូវជាតិលេខ១០ចាប់ពីខេត្តព្រំប្រទល់ខេត្តកោះកុង ឆ្លងកាត់ឃុំអូរសោម ស្រុកវាលវែងដល់សំឡូតខេត្តបាត់ដំបងជិត២០០គីឡូម៉ែត្រនិងផ្លូវមួយខ្សែទៀត ដែលបានស្ថាបនារួចនិងកំពុងដំណើរការចរាចរណ៍សព្វថ្ងៃគឺផ្លូវជាតិលេខ៥៥តភ្ជាប់ពីផ្លូវជាតិ៥ ឆ្ពោះទៅកាន់ឃុំថ្មដា ស្រុកវាលវែង ខេត្តពោធិសាតើជាប់ជាមួយខេត្តត្រាត ប្រទេសថៃ ជិត២០០គីឡូម៉ែត្រ។ សូមបញ្ជាក់ថា ស្រុកវាលវែង បានបង្កើតឡើងនៅឆ្នាំ១៩៩៨ មាន៥ឃុំ ២០ភូមិនិងភូមិឧបស័ម្ពន្ធ២៣។មានប្រជាពលរដ្ឋ៨ ៧៥១គ្រួសារ មនុស្សជាង៣៥ពាន់នាក់។ក្នុងនោះប្រជាពលរដ្ឋមានឈ្មោះក្នុងបញ្ជីបោះឆ្នោតឆ្នាំ២០២២ចំនួន៣០.០០៣នាក់និងចុះឈ្មោះថ្មីបានចំនួន១.៣៧៤នាក់ ៕