ផ្លូវល្បឿនលឿនមួយខ្សែទៀតនៅក្នុងប្រទេសកម្ពុជា នឹងត្រូវបើកការដ្ឋានសាងសង់នៅឆ្នាំក្រោយនេះហើយ។ បើតាមការបញ្ជាក់ពីលោកស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន ឱ្យដឹងថា ផ្លូវល្បឿនលឿនភ្នំពេញ-បាវិត នឹងបើកការដ្ឋានសាងសង់នៅឆ្នាំ២០២៣ខាងមុខ ដោយគ្រោងចំណាយថវិការជាង១.៦៣៨ លានដុល្លារអាម៉េរិក។ ផ្លូវល្បឿនលឿនមួយខ្សែថ្មីនេះ មានចម្ងាយជាង១៣៨គីឡូម៉ែត្រ។​ ការថ្លែងរបស់លោកទេសរដ្ឋមន្រ្តីនេះធ្វើឡើងក្នុងពិធីចុះហត្ថលេខាលើកិច្ចព្រមព្រៀងក្របខ័ណ្ឌសម្រាប់គម្រោងសាងសង់ផ្លូវល្បឿនលឿន តភ្ជាប់ពីភ្នំពេញទៅក្រុងបាវិត រវាងរាជរដ្ឋាភិបាលកម្ពុជា និងក្រុមហ៊ុនសាជីវកម្មស្ពាន និងថ្នល់ចិន (CRBC)នៅទីស្តីការក្រសួងនាថ្ងៃទី១០ ខែវិច្ឆិកា ឆ្នាំ២០២២។ លោកទេសរដ្ឋមន្ត្រីស៊ុន ចាន់ថុល បានថ្លែងថាក្នុងចម្ងាយជាង១៣៨គីឡូម៉ែត្រនេះ ផ្លូវល្បឿនលឿនភ្នំពេញ-បាវិត នឹងត្រូវឆ្លងកាត់ស្ពានឆ្លងទន្លេមេគង្គដ៏វែងមួយ គិតទាំងស្ពាននិងផ្លូវមានប្រវែងប្រហែលជា៥គីឡូម៉ែត្រ។ លោកក៏បានអះអាងថា ផ្លូវល្បឿនលឿន ថ្មីទី២នៅកម្ពុជានេះ គ្រោងនឹងបញ្ចប់ការសាងសង់នៅចុងឆ្នាំ២០២៦ ឬដើមឆ្នាំ២០២៧ ដើម្បីធ្វើឱ្យបានរួចរាល់ដំណាលគ្នានឹងផ្លូវល្បឿនលឿនពីក្រុងហូជីមិញមកម៉ុកបៃប្រទេសវៀតណាម ងាយស្រួលតភ្ជាប់ជាមួយផ្លូវល្បឿនលឿនជាមួយគ្នាតែម្ដង។ លោកបញ្ជាក់ថាផ្លូវល្បឿនលឿនភ្នំពេញ-បាវិត មានសារៈសំខាន់ណាស់ក្នុ ងការតភ្ជាប់ពីប្រទេសចិន មកមីយ៉ាន់ មកថៃ មកកម្ពុជា និងតទៅប្រទេសវៀតណាម តាមរយៈផ្លូវអាស៊ានលេខ១ដែលកម្ពុជាកំពុងតែចាប់ផ្តើមពង្រីកពី ២គន្លង ទៅ៤គន្លង ពីក្រុងប៉ោយប៉ែត មករាជធានីភ្នំពេញ និងតភ្ជាប់ពីភ្នំពេញទៅបាវិតតាមផ្លូវល្បឿនលឿនខ្សែទី២នេះ ដើម្បីធ្វើឱ្យទំនាក់ទំនងទំនិញ និងអ្នកដំណើរតាំងពីចិន រហូតដល់វៀតណាម អាចឆ្លងកាត់បាន។ គួរបញ្ជាក់ថា កាលពីពេលកន្លងទៅ ពោលក្នុងសន្និសីទសារព័ត៌មាន ស្ដីពី “សមិទ្ធផលសម្រេចបានរយៈពេល ៥ឆ្នាំកន្លងមក របស់ក្រសួងសាធារណការ និងដឹកជញ្ជូន លោកស៊ុន ចាន់ថុល បានឱ្យដឹងថាផ្លូវភ្នំពេញបាវិត គឺជា ផ្លូវថ្មីសុទ្ធសាធអត់មានយកផ្លូវចាស់កែច្នៃហើយថាជាផ្លូវល្បឿនលឿនទេ។ ក្នុងនោះ គម្រោងសាងសង់ផ្លូវល្បឿនលឿនភ្នំពេញ- ក្រុងបាវិត បានបង្កើនកិច្ចសហប្រតិបត្តិការ រវាងប្រទេសទាំងពីរ ពោលគឺកម្ពុជា-វៀតណាម ជាពិសេសលើការតភ្ជាប់វិស័យហេដ្ឋារចនាសម្ព័ន្ធដឹកជញ្ជូន សំដៅចូលរួមចំណែកក្នុងការលើកកម្ពស់វិស័យសេដ្ឋកិច្ច និងទេសចរណ៍ផងដែរ។ សូមជម្រាបថា យោងតាមសេចក្តីសម្រេចចុះថ្ងៃទី១៦ ខែកញ្ញា ឆ្នាំ២០២២ បានឱ្យដឹងថា ប្រមុខរាជរដ្ឋាភិបាលកម្ពុជា បានឯកភាពឱ្យក្រុមហ៊ុនសាជីវកម្មស្ពាន និងថ្នល់ចិន(CRBC) ដែលសាង សង់ និងវិនិយោគលើផ្លូវល្បឿនលឿនភ្នំពេញ-ព្រះសី ហនុ បន្តធ្វើការវិនិយោគសាង សង់ផ្លូវល្បឿនលឿនភ្នំពេញ- បាវិត ក្រោមក្របខណ្ឌសាង សង់-ធ្វើអាជីវកម្ម-ផ្ទេរ៕