ករណីគ្រោះថ្នាក់ចរាចរណ៍ឆ្នាំ២០២១បានថយចុះចំនួន៥០៩លើក ស្មើ ១៦% ២៦៧០/៣១៧៩លើក អ្នកស្លាប់ថយចុះចំនួន១៤៩នាក់ ស្មើ៩% ១៤៩៧/១៦៤៦នាក់ និងអ្នករបួសថយចុះចំនួន១០៧១នាក់ ស្មើ ២៣% ៣៦១៥/៤៦៨៦ ប្រៀបធៀបនឹងឆ្នាំ២០២០ ថ្ងៃពុធ ៨រោច ខែជេស្ឋ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២២ ខែមិថុនា ឆ្នាំ២០២២ នៅទីស្តីការក្រសួង លោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និង ជាអគ្គលេខាធិការនៃគណៈកម្មាធិការជាតិសុវត្ថិភាពចរាចរណ៍ផ្លូវគោក បានអញ្ជើញជាអធិបតី ក្នុងពិធី បើកសិក្ខាសាលាស្តីពីការប្រមូលធាតុចូលសម្រាប់ផែនការទសវត្សរ៍ជាតិសុវត្ថិភាពចរាចរណ៍ផ្លូវគោក ឆ្នាំ២០២១-២០៣០។ សមាសភាពចូលរួមសិក្ខាសាលានេះរួមមាន៖ ឯកឧត្តមរដ្ឋ លេខាធិការ អនុរដ្ឋលេខាធិការ អគ្គនាយក អគ្គនាយករង លោក លោកស្រី ប្រធាននាយកដ្ឋាន នៃក្រសួងមហាផ្ទៃ ក្រសួងសាធារណការ និងដឹកជញ្ជូន អគ្គស្នងការដ្ឋាន នគរបាល ជាតិ ស្នងការ ដ្ឋាននគរបាល២៥ រាជធានី-ខេត្ត មន្ទីរ សាធារណការ និងដឹកជញ្ជូន២៥រាជធានី-ខេត្ត តំណាងក្រុមហ៊ុនព្រូដិនសលកម្ពុជា តំណាងសភា ពាណិជ្ជកម្មអន្តរជាតិប្រចាំកម្ពុជា(IBC) ព្រមទាំង សិក្ខាកាមមកពីតំណាងក្រសួង-ស្ថាប័ន អង្គការជាតិ អន្តរជាតិ ក្រុមហ៊ុន និងដៃគូពាក់ព័ន្ធសរុបប្រមាណ១៣២នាក់។ សិក្ខាសាលានេះមានរយៈពេល២ថ្ងៃចាប់ពីថ្ងៃទី២២-២៣ ខែមិថុនា ឆ្នាំ២០២២ សហការរៀបចំឡើង ដោយអគ្គលេខាធិការដ្ឋាននៃគណៈកម្មាធិការជាតិសុវត្ថិភាពចរាចរណ៍ផ្លូវគោក ក្រសួងមហាផ្ទៃ ក្រសួង សាធារណការ និងដឹកជញ្ជូន និងទទួលបានការឧបត្ថម្ភគាំទ្រពី ក្រុមហ៊ុនធានារ៉ាប់រងអាយុជីវិតព្រូដិន សល ក្នុងគោលបំណងបង្ហាញពីលទ្ធផលការងារសម្រេចបាន បញ្ហាប្រឈម និងបទពិសោធន៍ នៃ ផែនការ ទសវត្សរ៍ជាតិសុវត្ថិភាពចរាចរណ៍ផ្លូវគោកលើកទី១ ឆ្នាំ២០១១-២០២០ ព្រមទាំងជាវេទិកាពិភាក្សា ដើម្បីប្រមូលធាតុចូលពីស្ថាប័នជាតិ អន្តរជាតិ និងដៃគូពាក់ព័ន្ធ លើពង្រាងផែនការទសវត្សរ៍ជាតិ សុវត្ថិភាពចរាចរណ៍ផ្លូវគោកថ្មី ឆ្នាំ២០២១-២០៣០សំដៅសម្រេចបាននូវគោលដៅកាត់បន្ថយអ្នកស្លាប់ និងអ្នករបួស ដោយគ្រោះថ្នាក់ចរាចរណ៍ផ្លូវគោកឱ្យបាន៥០% នៅឆ្នាំ២០៣០។ ថ្លែងសុន្ទរកថានាឱកាសនោះ លោក Sanjay CHAKRABARTY នាយកប្រតិបត្តិនៃក្រុមហ៊ុនព្រូដិនសលកម្ពុជា បានមានប្រសាសន៍ថា៖ ក្នុងនាមជាក្រុមហ៊ុនធានារ៉ាប់រងដ៏ធំមួយក្នុងតំបន់ យើងយល់ពី ទំនួលខុសត្រូវរបស់យើងចំពោះបញ្ហាសុវត្ថិភាពចរាចរណ៍ ជាពិសេសក្នុងចំណោមយុវជន។ ដូច្នេះហើយ ទើបយើងបាននាំយកមកនូវកម្មវិធី Safe Step មកកម្ពុជា បន្ទាប់ពីយើងចាប់ផ្ដើមប្រតិបត្តិការក្រុមហ៊ុន របស់យើងនៅនេះ។ នេះជាហេតុផលសំខាន់របស់យើង ដែលយើងសម្រេចគាំទ្រសិក្ខាសិលាប្រមូល ធាតុចូលនេះ។ ថ្លែងក្នុងមតិសំណេះសំណាលក្នុងកម្មវិធីបើក លោកជំទាវ មឹន មាណវី បានមានប្រសាសន៍ថា៖ យោងតាមទិន្នន័យគ្រោះថ្នាក់ចរាចរណ៍ផ្លូវគោករបស់អគ្គស្នងការដ្ឋាននគរបាលជាតិក្នុងឆ្នាំ២០២១បានឱ្យដឹង ថាគ្រោះថ្នាក់ចរាចរណ៍បានកើតឡើងចំនួន២៦៧០លើក បណ្តាលឱ្យស្លាប់ចំនួន១៤៩៧នាក់ និងរបួស ចំនួន៣៦១៥នាក់ របួសធ្ងន់ ២២៤៦នាក់ ក្នុងនោះអ្នកស្លាប់នៅរាជធានីភ្នំពេញមានចំនួន២៤៥នាក់ ខេត្ត កណ្តាលចំនួន១៤១នាក់ និងខេត្តកំពង់ចាមចំនួន៩៦នាក់។ មូលហេតុបណ្តាលឱ្យមានគ្រោះថ្នាក់ រួមមាន៖ បើកបរលើសល្បឿនកំណត់៣៨% មិនគោរពសិទ្ធិ២៤% មិនប្រកាន់ស្តាំ១៤% វ៉ាជែង៨% បត់៨% ស្រវឹង៤% កត្តាយានយន្ត៣% និងងងុយ ១% ប្រៀបធៀប នឹងឆ្នាំ២០២០ ហេតុការណ៍គ្រោះ ថ្នាក់ថយចុះចំនួន៥០៩លើក ស្មើ ១៦% ២៦៧០/៣១៧៩លើក អ្នកស្លាប់ថយចុះចំនួន១៤៩នាក់ ស្មើ៩% ១៤៩៧/១៦៤៦នាក់) និងអ្នករបួសថយចុះចំនួន១០៧១នាក់ ស្មើ ២៣% ៣៦១៥/៤៦៨៦នាក់។ លោកជំទាវរដ្ឋលេខាធិការ បានបន្តថា៖ ទាក់ទងនឹងស្ថានភាពគ្រោះថ្នាក់ចរាចរណ៍ក្នុងត្រីមាសទី១ ឆាំ្ន ២០២២នេះ នៅពេលរាជរដ្ឋាភិបាលបានប្រកាសបើកប្រទេសឡើងវិញលើគ្រប់វិស័យបន្ទាប់ពីរដ្ឋាបាល បានដាក់ចេញវិធានការគ្រប់គ្រងបានយ៉ាងល្អប្រសើរនូវការរីករាលដាលជំងឺកូវីដ-១៩ ការធ្វើចរាចរណ៍នៅទូទំាងប្រទេសមានភាពមមាញឹក ធ្វើឱ្យករណីគ្រោះថ្នាក់កើនឡើង អ្នកស្លាប់ និងអ្នករបួស ធៀបនឹងរយៈពេលដូចគ្នាឆ្នាំ២០២១។ ករណីគ្រោះថ្នាក់ចរាចរណ៍ទាំងនោះបង្កឡើងដោយសារការបើកបរ ក្នុង ល្បឿនហួសកំណត់ ការបើកបរក្រោមឥទ្ធិពលគ្រឿងស្រវឹង ការមិនពាក់មួកសុវត្ថិភាព និងមិនពាក់ខ្សែ ក្រវាត់សុវត្ថិភាព ការជែងដោយប្រថុយប្រថាន បានបង្កឱ្យគ្រោះថ្នាក់ចរាចរណ៍មានសភាពធ្ងន់ធ្ងរ ធ្វើឱ្យ បាត់បង់ជីវិតមនុស្ស ឬរបួស ពិការយ៉ាងអាណោចអាធម រួមជាមួយនឹងការខូចខាតទ្រព្យសម្បត្តិរដ្ឋ និង ឯកជនយ៉ាងច្រើន បន្សល់ទុកនូវកូនកំព្រា ស្ត្រីមេម៉ាយ ពិការភាព សោកនាដកម្ម និងផលវិបាកជាច្រើន មកលើសង្គមកម្ពុជា។ លោកជំទាវរដ្ឋលេខាធិការ បានជំរុញលើកទឹកចិត្តសិក្ខាកាមទាំងអស់ឱ្យយកចិត្តទុកដាក់ផ្តល់នូវ ធាតុចូលដ៏មានសារៈសំខាន់ សំដៅជំរុញឱ្យការរៀបចំផែនការនេះទទួលបានជោគជ័យ៕