ថ្លែងនៅព្រឹកថ្ងៃទី១៧ ខែមិថុនានេះ លោក ទេសរដ្ឋមន្ត្រី ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសូងសាធារណការ និងដឹកជញ្ជូន បានមានប្រសាសន៍ថា មជ្ឈមណ្ឌលបណ្ដុះបណ្ដាលបច្ចេកទេសហ្វដ ធី អេស អាយ ជាសមទ្ធិផលមួយថ្មីទៀតរបស់ ក្រសួងសាធារណការ និងដឹកជញ្ជូន ក្នុងការបណ្តុះបណ្តាលសមត្ថភាព និងកសាងធនធានមនុស្សប្រកបដោយគុណភាពខ្ពស់ ដើម្បីបំពេញតម្រូវការទីផ្សារការងារ ដែលមានជាលំដាប់។ លោកទេសរដ្ឋមន្ត្រីបានលើឡើងថា៖ “តាមរយៈមជ្ឈមណ្ឌលបណ្ដុះបណ្តាលបច្ចេកទេសនេះ បញ្ហាកង្វះខាតធនធាន មនុស្សលើបច្ចេកទេសជួសជុលយានយន្ត ក៏ដូចជាកង្វះខាតធនធានមនុស្សតាមយានដ្ឋាននានា នឹងត្រូវបានដោះស្រាយ។ ពេលដែលមានជំនាញវិជ្ជាជីវៈ និងបច្ចេកទេសយានយន្ត ច្បាស់លាស់នេះ ក៏នឹងអាចចូលរួម ចំណែកដល់ការកាត់បន្ថយការកែច្នៃ ការដំឡើងយានយន្តខុសបច្ចេកទេសគ្មានគុណភាព និងកាត់បន្ថយគ្រោះថ្នាក់ចរាចរណ៍តាមដងផ្លូវ ព្រោះថា នៅពេលដែលយានយន្តត្រូវបានដំឡើង ត្រូវបានជួសជុល និងត្រូវបានថែទាំ ដោយអ្នកជំនាញវិជ្ជាជីវៈ នោះបញ្ហាបច្ចេកទេស ដែលអាចមានជាយថាហេតុនៅលើដងផ្លូវ ក៏ត្រូវបានកាត់បន្ថយបណ្ដើរៗ”។ លោក ហឿន សំនៀង នាយកវិទ្យាស្ថាន តេជោសែន សាធារណការ និងដឹកជញ្ជូន បានមានប្រសាសន៍ឱ្យដឹងថា តាមរយៈមជ្ឈមណ្ឌលបណ្ដុះបណ្ដាលបច្ចេកទេសនេះ វិទ្យាស្ថាន តេជោសែន នឹងមានលទ្ធភាពកាន់តែច្រើនក្នុងការពង្រីកសកម្មភាពបណ្ដុះបណ្ដាលផ្នែកបច្ចេកទេសដល់និស្សិត និងសិក្ខាកាម ក្នុងគោលបំណងកសាងធនធានមនុស្សប្រកបដោយគុណភាពខ្ពស់ ដើម្បីបំពេញតម្រូវការទីផ្សារការងារ និងការប្រកួតប្រជែង ដែលនឹងជួយជម្រុញដល់ការអភិវឌ្ឍក្នុងសង្គម និងសេដ្ឋកិច្ចប្រទេសជាតិ។ ជាពិសេស ចូលរួមដោះស្រាយដល់បញ្ហាកង្វះខាតអ្នកបច្ចេកទេស កម្មករជំនាញក្នុងវិស័យឧស្សាហកម្មយានយន្ត ឬអ្នកបច្ចេកទេសនៅតាមយានដ្ឋាននានា៕