ផ្លូវល្បឿនលឿនភ្នំពេញ-ព្រះសីហនុ នឹងធ្វើឱ្យការដឹកជញ្ជូនទំនិញ និងអ្នកដំណើរកាន់តែមានប្រសិទ្ធភាព ខណៈរដ្ឋាភិបាលកំណត់ប្រែខេត្តព្រះសីហនុ ទៅជាតំបន់សេដ្ឋកិច្ចពិសេសចម្រុះ។ លោក ស៊ុន ចាន់ថុល ទេសរដ្ឋមន្ត្រី និងជារដ្ឋមន្ត្រីក្រសួងសាធារណការ និងដឹកជញ្ជូន នៅថ្ងៃទី៧ ខែមិថុនា បាននិយាយថា ការតភ្ជាប់រាជធានីភ្នំពេញ ទៅកាន់ខេត្តព្រះសីហនុ តាមរយៈផ្លូវល្បឿនលឿននេះ នឹងចូលរួមចំណែកក្នុងការអភិវឌ្ឍន៍ខេត្តជាប់មាត់សមុទ្រ។ លោក ចាន់ថុល បានបន្តថា “ផ្លូវល្បឿនលឿននេះនឹងធ្វើឱ្យការដឹកជញ្ជូនទំនិញ ក៏ដូចជាអ្នកដំណើរកាន់តែមានប្រសិទ្ធភាព ចំណាយពេលវេលាតិច កាត់បន្ថយការចំណាយ និងធ្វើឱ្យសេដ្ឋកិច្ចខេត្តព្រះសីហនុកាន់តែរីកចម្រើន”។ លោក​បាន​បន្ថែម​ថា​៖ «​វា​នឹង​ដើរ​តួនាទី​យ៉ាង​សំខាន់​ក្នុង​ការ​លើក​កម្ពស់​កំណើន​សេដ្ឋកិច្ច​របស់​ខេត្ត​ព្រះសីហនុ»។ បច្ចុប្បន្ននេះ រាជរដ្ឋាភិបាលកម្ពុជា កំពុងសហការជាមួយប្រទេសចិន ដែលជាមិត្តដែកថែប ក្នុងការរៀបចំផែនការមេ ដើម្បីប្រែក្លាយខេត្តព្រះសីហនុ ទៅជាតំបន់សេដ្ឋកិច្ចពិសេសចម្រុះ។ លោកបាននិយាយទៀថា រដ្ឋាភិបាលបានស្នើសុំក្រុមហ៊ុន Cambodian PPSHV Expressway Co., Ltd. ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុន China Road and Bridge Corporation ដែលគ្រប់គ្រងផ្លូវល្បឿនលឿនក្រោមកិច្ចសន្យាសាងសង់ អនុញ្ញាតអោយធ្វើដំណើរដោយឥតគិតថ្លៃក្នុងអំឡុងពេលសាកល្បង។ ផ្លូវ​ល្បឿន​លឿន​ភ្នំពេញ​-​ព្រះសីហនុ​ដែលបានបើកដំណើការសាងសង់កាលពីខែមីនា ឆ្នាំ២០១៩ ជាមួយទឹកប្រាក់​២​ពាន់​លាន​ដុល្លារ​ មានប្រវែង​ជាង​១៨៧,៥​គីឡូម៉ែត្រ​ ត្រូវបានគេរំពឹងថានឹងបើកឱ្យប្រើប្រាស់បណ្តោះអាសន្ននៅខែក្រោយ។ Chea Vannak – AKP