កែប៖ នាព្រឹកថ្ងៃទី០១ ខែមិថុនា ឆ្នាំ២០២២ គណៈកម្មការរៀបចំគម្រោងខេត្ត បានរៀបចំពិធីបើកការដ្ឋាន ស្ថាបនា ផ្លូវកៅស៊ូ មួយខ្សែថ្មីបន្ថែមទៀត ស្ថិតនៅ ភូមិអំពេង ឃុំអង្កោល ស្រុកដំណាក់ចង្អើរ ខេត្តកែប ក្រោមអធិបតីភាព ឯកឧត្តមបណ្ឌិត សោម ពិសិដ្ឋ អភិបាល នៃគណៈអភិបាលខេត្តកែប និងមានការអញ្ជើញចូលរួមពី ឯកឧត្ដម សមាជិក ក្រុមប្រឹក្សាខេត្ត ប្រធាន អនុប្រធានមន្ទីរ អង្គភាពជុំវិញខេត្ត កងកម្លាំងទាំងបី រួមទាំងប្រជាពលរដ្ឋជាច្រើន រយនាក់។ បើតាមរបាយការណ៍របស់លោក អុឹង វុទ្ធី នាយករដ្ឋបាលសាលាខេត្ត បានឱ្យដឹងថា សម្រាប់ឆ្នាំ២០២២នេះ ខេត្តកែប មានគម្រោងធំៗប្រចាំឆ្នាំចំនួន ៨គម្រោង ក្នុងនោះ ក្រុងកែប មាន៤គម្រោង និងស្រុកដំណាក់ ចង្អើរចំនួន៤គម្រោង ដែលគម្រោងមួយចំនួន ត្រូវបានអនុវត្តរួចរាល់ និងមួយចំនួនទៀតកំពុងដំណើរការអនុវត្តគម្រោង ។ លោកនាយរដ្ឋបាលបញ្ជាក់ថា សម្រាប់គម្រោងស្ថាបនាផ្លូវ កៅស៊ូ DBST ដែលកំពុងបើកការដ្ឋាននាពេលនេះ មានប្រវែង៩៨០ម៉ែត្រ ទទឹង៦ម៉ែត្រ រួមទាំងសំណង់សិល្បការ្យមួយចំនួនផងដែរ ដែលផ្លូវនេះតភ្ជាប់ ពីផ្លូវ ១៣៣២ ឆ្ពោះទៅកាន់ ផ្លូវទៅព្រំដែនព្រែកចាក ស្រុកកំពង់ត្រាច ខេត្តកំពត ដោយឆ្លងកាត់ ភូមិចំនួនពីរ គឺភូមិ ទូលសាង៉ាំ និងភូមិព្រៃតាកុយ ខេត្តកែប ហើយគម្រោងស្ថាបនា ផ្លូវនេះ មានរយៈពេលបីខែ គ្រោងនឹងបញ្ចប់ នាចុងសីហា ឆ្នាំ២០២២ខាងមុខ។ មានប្រសាសន៍សំណេះសំណាលជាមួយបងប្អូនប្រជាពលរដ្ឋនាឱកាសនោះ ឯកឧត្តម បណ្ឌិត សោម ពិសិដ្ឋ អភិបាលខេត្តកែប បានគូសបញ្ជាក់ថា ផ្លូវកៅស៊ូDBST មួយខ្សែនេះ ជាចំណងដៃថ្មីមួយទៀត សម្រាប់បងប្អូនប្រជាពលរដ្ឋនៅភូមិ អំពេងនេះ បន្ទាប់ពីផ្លូវបេតុងមួយខ្សែប្រវែង ២៧០០ម៉ែត្រ ទទឹង៨ម៉ែត្រ ត្រូវបានសម្ពោធដាក់ជូនបងប្អូនភូមិអំពេង ប្រើប្រាស់កាលពីថ្ងៃទី១៣ ខែឧសភា ឆ្នាំ២០២២ ក្រោមអធិបតីភាពឯកឧត្តមបណ្ឌិត ហ៊ុន ម៉ាណែត កន្លងទៅថ្មីៗនេះ។ ឯកឧត្តមបណ្ឌិតបន្ថែមថា សមិទ្ធផលដែលយើងទទួលបានជាបន្ដបន្ទាប់នេះ កើតឡើង ដោយសារប្រទេសជាតិយើង នៅតែរក្សាបាននូវសុខសន្តិភាព ស្ថិរភាពនយោបាយ ក្រោមការដឹកនាំប្រកបដោយគតិបណ្ឌិត របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលធ្វើឱ្យយើងមានឱកាសគ្រប់គ្រាន់ ក្នុងការអភិវឌ្ឍន៍មូលដ្ឋាន ក៏ដូចជាសេដ្ឋកិច្ចគ្រួសាររបស់យើងទាំងអស់គ្នា ឱ្យកាន់តែមានជីវភាពធូរធារសម្បូរសប្បាយ។ ឯកឧត្តមបន្តថាគម្រោងស្ថាបនាផ្លូវកៅស៊ូប្រវែង៩៨០ម៉ែត្រ ជាគម្រោងសម្រាប់ឆ្នាំ២០២២ប៉ុណ្ណោះ ដោយសារ គម្រោងថវិកាប្រចាំឆ្នាំរបស់ខេត្តមានកំណត់ តែគម្រោងនេះនឹងសិក្សាបន្ត អនុវត្តរហូតដល់តភ្ជាប់តាមផែនការ។ ក្នុងឱកាសនោះដែរឯកឧត្តមបណ្ឌិត ក៏បានអំពាវនាវដល់បងប្អូនដែលរស់នៅតាមដងផ្លូវ សូមចូលរួមបរិច្ចាគដីចំណីផ្លូវ ដើម្បីឱ្យផ្លូវមានលក្ខណៈធំទូលាយ មានសោភ័ណភាព និងមានសុវត្ថិភាពក្នុងការធ្វើដំណើរ។ ឯកឧត្តម ក៏បានណែនាំបងប្អូនចូលរួមគោរពច្បាប់ចរាចរណ៍ផ្លូវគោគ ដើម្បីធានាឱ្យបាននូវគ្រោះថ្នាក់ដែលអាចនឹងកើតឡើងជាយថាហេតុ ជាពិសេសសូមឱ្យបងប្អូន ទៅទទួលវ៉ាក់សាំង ជាបន្តបន្ទាប់ សំដៅការពារពីការវាយលុកយាយី នៃជំងឺកូវីដ-១៩ ។ក្រៅពីនេះ សូមឱ្យបងប្អូនទៅបោះឆ្នោតជ្រើសរើស ក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ នាថ្ងៃទី៥ ខែមិថុនាឆ្នាំ២០២២ ឱ្យបានគ្រប់ៗគ្នា ដើម្បីបន្តនិរន្តរភាព នៃការអភិវឌ្ឍន៍ប្រទេសជាតិរបស់យើង៕