ភ្នំពេញ: សាលារាជធានីភ្នំពេញ រៀបចំដាំបង្គោលភ្លើងចំនួន៤៤០បង្គោល អោយបានរួចរាល់មុនថ្ងៃចូលឆ្នាំប្រពៃណីខ្មែរខាងមុខនេះ លើកំណាត់ផ្លូវសម្តេចអគ្គមហាសេនាបតី ហ៊ុន សែន ឬផ្លូវ៦០ម៉ែត្រ ដោយចាប់ពីផ្លូវលេខ២៧១ច្រមុះជ្រូកក្បាលថ្នល់ដល់ផ្លូវជាតិលេខ២។ លោក សាំ ពិសិដ្ឋ ប្រធានមន្ទីរសាធារណៈការ និងដឹកជញ្ជូនរាជធានីភ្នំពេញ ប្រាប់ទូរទស្សន៍ហង្សមាស នៅថ្ងៃទី២៧ ខែមីនា ឆ្នាំ២០១៨នេះថា “ការដាំបង្គោលភ្លើង និងបំពាក់អំពូលភ្លើងបំភ្លឺលើកំណាត់ផ្លូវ៦០ម៉ែត្រនេះ ដើម្បីអោយកំណាត់ផ្លូវនេះរិតតែមានសោភណ្ឌភាព និងកាត់បន្ថយអោយបានការគ្រោះថ្នាក់ចរាចរនិងបទល្មើសផ្សេងៗទៀត”។ លោកបន្តថា រដ្ឋបាលរាជធានីភ្នំពេញបានសម្រេចដាក់បង្គោលភ្លើងបំភ្លឺនៅពេលយប់ ស្របពេលដែលកំណាត់ផ្លូវថ្មីមួយនេះត្រូវបានប្រជាពលរដ្ឋធ្វើចរាចរយ៉ាងមមាញឹកដែរនោះ។ លោកប្រធានមន្ទីរ បញ្ជាក់ថា ខណៈនេះមន្ទីរសាធារណការនិងដឹកជញ្ជូនរាជធានីភ្នំពេញបាននឹងកំពុងធ្វើសកម្មភាពតម្លើងបង្គោលភ្លើងបំភ្លឺផ្លូវចំនួន ៤៤០បង្គោល នៅមហាវិថីសម្តេចអគ្គមហាសេនាបតី ហ៊ុន សែន ចាប់ពីផ្លូវលេខ ២៧១ ដល់ផ្លូវជាតិលេខ២ ក្នុងខណ្ឌមានជ័យ។ ការតម្លើងបង្គោលភ្លើងបំភ្លឺផ្លូវលើកំណាត់ផ្លូវខាងលើនេះ កន្លងមកធ្លាប់មានគ្រោះថ្នាក់ និងមានបទល្លើសប្លន់កើតឡើង ដោយសារតាមបណ្តោលផ្លូវ៦០ម៉ែត្រ មិនមានផ្ទះប្រជាពលរដ្ឋស្របតាមដងផ្លូវនេះទេ ជាហេតុនាំអោយមានបទល្មើសកើតឡើង។ លោក ម៉េត ភក្តី អ្នកនាំពាក្យសាលារាជធានីភ្នំពេញ អោយដឹងថា កំណាត់ផ្លូវសម្តេចអគ្គមហាសេនាបតីតេជោហ៊ុន សែន ឬផ្លូវ៦០ម៉ែត្រ គឺជាកំណាត់ផ្លូវថ្មីមួយចាប់ពីផ្លូវលេខ២៧១ (ច្រមុះជ្រូកក្បាលថ្នល់) រហូតដល់ផ្លូវជាតិលេខ២ ដែលមានប្រវែងជាង៩គីឡូម៉ែត្រដោយបានចាក់កៅស៊ូយ៉ាងស្អាត ដើម្បីបំរើដល់ការធ្វើចរាចររបស់ប្រជាពលរដ្ឋ បញ្ជៀសចរាចរនៅផ្លូវជាត់លេខ២ ចាប់ពីក្បាលថ្នល់ដល់ក្រុងតាខ្មៅ។ មហាវិថី សម្តេចតេជោ ហ៊ុន សែន ចាប់ពីចំណុចច្រមុះជ្រូកក្បាលថ្នល់ ប្រសព្វគ្នារវាងផ្លូវលេខ២៧១ និងមហាវិថីព្រះមុនីវង្ស កាត់តាមតំបន់អភិវឌ្ឍន៍បឹងទំពុន និងតំបន់ជើងឯកឆ្ពោះទៅកាន់ផ្លូវជាតិលេខ២ កាត់ត្រង់ចំណុចព្រែកកំពឹស ខណ្ឌដង្កោ រាជធានីភ្នំពេញ ត្រូវបានក្រុមអ្នកជំនាញអចលនទ្រព្យអះអាងថា ពីជួយរំដោះការកកស្ទះចរាចរណ៍ដ៏មមាញឹកក្នុងទីក្រុងភ្នំពេញ មហាវិថីដ៏ធំជាងគេនៅក្នុងទីក្រុងភ្នំពេញមួយនេះ ក៏ជាច្រកសេដ្ឋកិច្ចដ៏សំខាន់ និងជាតំបន់ដែលនឹងមានការអភិវឌ្ឍលឿនសម្រាប់អនាគត។ ចំពោះតម្លៃដីនៅតាមបណ្តោយមហាវិថីសម្តេច តេជោ ហ៊ុន សែន ត្រូវបានអ្នកជំនាញអចលនទ្រព្យ បានធ្វើការវាយតម្លៃប៉ាន់ស្មានថា គិតចាប់ពីដើមផ្លូវ គីឡូលេខ១ ដល់គីឡូលេខ៣ តម្លៃចន្លោះពី ៧០០ដុល្លារ ទៅ១០០០ដុល្លារអាមេរិកក្នុងមួយម៉ែត្រការ៉េ ចន្លោះពីគីឡូលេខ៣ ដល់គីឡូលេខ៥ តម្លៃពី ៣០០ដុល្លារ ទៅ ៥០០ដុល្លារក្នុងមួយម៉ែត្រការ៉េ និងពីគីឡូលេខ ៥ ដល់ចុងក្រោយផ្លូវ តម្លៃចាប់ ២៥០ ទៅ ៣៥០ ដុល្លារអាមេរិកក្នុងមួយម៉ែត្រការ៉េ។ ហើយគម្រោងអភិវឌ្ឍន៍តាមមហាវិថីដ៏ធំនេះ បាននិងកំពុងទាក់ទាញអ្នកវិនិយោគិនជាតិនិងអន្តរជាតិ មកបណ្តាក់ទុនវិនិ​​យោគយ៉ាងច្រើនសន្ធឹកសន្ធាប់លើវិស័យអចលនទ្រព្យនិងសំណង់ ដោយសារគេមើលឃើញថា ផ្លូវនេះជាច្រកសេដ្ឋកិច្ចដ៏សំខាន់គឺស្ថិតនៅក្នុងតំបន់បីគឺខណ្ឌមានជ័យ ខណ្ឌដង្កោរ និងក្រុងតាខ្មៅដែលជាតំបន់អភិវឌ្ឍន៍មួយដែលរដ្ឋាភិបាលកម្ពុជាអនុញ្ញាតឲ្យអភិវឌ្ឍគម្រោងអចលនទ្រព្យលើទំហំ ២ពាន់ ៥៧២ហិកតា៕