កណ្តាល៖ ឯកឧត្តម តូច ចាន់កុសល សមាជិកគណៈកម្មាធិការកណ្ដាលគណបក្សប្រជាជនកម្ពុជា អនុប្រធានទី១ គណៈអចិន្ត្រៃយ៍ក្រុមការងារគណបក្សចុះមូលដ្ឋានស្រុកកោះធំ តំណាងដ៏ខ្ពង់ខ្ពស់ឯកឧត្តមទេសរដ្ឋមន្ត្រី ស៊ុន ចាន់ថុល ប្រធានក្រុមការងារគណៈអចិន្ត្រៃយ៍គណបក្សចុះមូលដ្ឋានស្រុកកោះធំបានថ្លែងក្នុងពិធីបើកយុទ្ធនាការឃោសនាបោះឆ្នោតជ្រើសរើសក្រុមប្រឹក្សា ឃុំ សង្កាត់អាណត្តិទី៥ ឆ្នាំ២០២២ នៅព្រឹកថ្ងៃសៅរ៍ទី២១ ខែឧសភា ឆ្នាំ២០២២នេះថា ថ្ងៃនេះគឺជា ទិវាមហានក្ខត្តឫក្ស នៃការចាប់ផ្ដើមបើកយុទ្ធនាការបោះឆ្នោតជ្រើសរើសក្រុមប្រឹក្សា ឃុំសង្កាត់ អាណត្តិទី៥ ឆ្នាំ២០២២ នៅទូទាំងប្រទេស ដោយឡែកនៅស្រុកកោះធំ នាឱកាសនេះដែលជាព្រឹត្តិការណ៍នយោបាយជាប្រវត្តិសាស្ត្រដ៏មានសារៈសំខាន់សម្រាប់ប្រជាជនយើង។ ក្នុងឱកាសដ៏វិសេសវិសាលនេះ ឯកឧត្តម តូច ចាន់កុសល បានសំដែងនូវមនុស្សសញ្ចេតនារំភើបរីករាយក្រៃលែងចំពោះវត្តមានបងប្អូន សមាជិក សមាជិកា គណបក្សប្រជាជនកម្ពុជាមកពីឃុំទាំង១១ ក្នុងស្រុកកោះធំ និងអ្នកគាំទ្រគណបក្សប្រជាជនទាំងឡាយដែលបានមកជួបជុំយ៉ាងច្រើនកុះករនាពេលនេះដើម្បីសម្ដែងនូវឆន្ទៈគាំទ្រយ៉ាងក្លៀវក្លាត្រៀមគ្រប់លក្ខណៈសម្បត្តិដើម្បីចូលរួមបោះឆ្នោតជូនគណបក្សប្រជាជនកម្ពុជាដែលមាន «រូបសញ្ញាទេវតាបាចផ្កា» ជានាបានសុខសន្តិភាពនិងការអភិវឌ្ឍឃុំសង្កាត់របស់យើង។ ឯកឧត្តមសមាជិកគណៈកម្មាធិការកណ្ដាលគណបក្សប្រជាជនកម្ពុជា អនុប្រធានទី១ គណៈអចិន្ត្រៃយ៍ក្រុមការងារគណបក្សចុះមូលដ្ឋានស្រុកកោះធំបានរំលឹកដែរថា រយៈពេលពីរឆ្នាំកន្លងមកនេះគឺជាឆ្នាំដ៏លំបាកបំផុតក្នុងប្រវត្តិសាស្ត្រទំនើបរបស់កម្ពុជា ដោយសារផលប៉ះពាល់អវិជ្ជមាន បញ្ហាប្រឈម និងហានិភ័យជាច្រើនដែលមិនធ្លាប់មានពីមុនមក បណ្ដាលមកពីជម្ងឺកូវិដ-១៩ រាតត្បាតជាសកល ជាមួយស្ថានភាពភូមិសាស្ត្រនយោបាយក្នុងតំបន់ និងពិភពលោកដែលកាន់តែឡើងកម្ដៅ និងកាន់តែវិវត្តស្មុគស្មាញឈានដល់សង្គ្រាមឈ្លានពានរវាងរូស្សី និងអ៊ុយក្រែន មិនអាចដោះស្រាយបាន ការប្រកួតប្រជែងរវាងមហាអំណាច ជាពិសេសសង្គ្រាមពាណិជ្ជកម្ម និងបច្ចេកវិទ្យា ព្រមទាំងនិន្នាការធ្លាក់ចុះនៃពហុនិយម និងនិន្នាការកើនឡើងនៃឯកតោភាគីនិយម ប្រជានិយម និងគាំពារនិយម រួមទាំងចេតនាជ្រៀតជ្រែកកិច្ចការផ្ទៃក្នុងពីសំណាក់ប្រទេសមួយចំនួនទៀតក្រោមរូបភាពផ្សេងៗ។ ជាមួយគ្នានេះ ការប្រែប្រួលអាកាសធាតុដែលជាបញ្ហាប្រឈមរបស់មនុស្សជាតិក៏វិវឌ្ឍន៍កាន់តែអាក្រក់ និងមានសភាពធ្ងន់ធ្ងរជាងមុននិងគ្រោះមហន្តរាយនានាដែលកំពុងបន្តគំរាមកំហែងលើពិភពលោក។ ឯកឧត្តម តូច ចាន់កុសល បានគូសបញ្ជាក់ថា សម្រាប់ប្រទេសកម្ពុជាយើងក្នុងពេលបច្ចុប្បន្នសភាពការណ៍ទូទៅនៅតែវិវត្តជាវិជ្ជមាន បង្កលក្ខណៈសម្បត្តិល្អប្រសើរដល់ដំណើរការអភិវឌ្ឍលើគ្រប់វិស័យបើទោះបីស្ថិតក្នុងបរិបទសភាពការណ៍អន្តរជាតិមានភាពស្មុគស្មាញយ៉ាងណាក្ដី ស្ថានភាពអំណោយផលនេះ បានធ្វើឱ្យជីវភាពគ្រប់យ៉ាងនៅក្នុងសង្គមជាតិកាន់តែប្រសើរឡើង ស្ថិតនៅក្រោមដំបូលនៃសុខសន្តិភាព និងការអភិវឌ្ឍតាមរយៈនយោបាយ ឈ្នះ ឈ្នះ ត្រូវបានចារឹកទុកក្នុងប្រវត្តិសាស្ត្រកម្ពុជាក្រោមការដឹកនាំប្រកបដោយភាពឈ្លាសវៃរបស់សម្ដេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា ជាបិតាស្ថាបនិកសន្តិភាព បង្កើតនូវការបង្រួបបង្រួមជាតិ ឯកភាពជាតិ ប្រជាជនរស់នៅយ៉ាងសុខសាន្តប្រកបដោយសុភមង្គលដែលបានមកពីទឹកដមនៃសុខសន្តិភាព និងផ្លែផ្កានៃការអភិវឌ្ឍដោយសារកត្តាអំណោយផលនេះ យើងបានធ្វើការវាយតម្លៃយ៉ាងខ្ពស់ប្រកបដោយភាពត្រឹមត្រូវចំពោះការអភិវឌ្ឍន៍ដ៏ល្អប្រសើរនៃសភាពការណ៍ទូទៅនិងលទ្ធផលដែលស្រុកកោះធំយើងសម្រេចបានជាទីមោទនៈ។ ជាមួយគ្នានោះដែរ ឯកឧត្តមបានអំពាវនាវជូនបងប្អូនសមាជិក សមាជិកាគណបក្សប្រជាជនកម្ពុជា និងអ្នកគាំទ្រគណបក្សប្រជាជនកម្ពុជាទាំងឡាយក្នុងស្រុកកោះធំ សូមប្រកាន់ខ្ជាប់និងប្រតិបត្តិឲ្យបានត្រឹមត្រូវនូវក្រមសីលធម៌ទាំងឡាយដែលមានចែងក្នុងបទបញ្ជានិងនីតិវិធីសម្រាប់ការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី ៥ ឆ្នាំ២០២២ ដើម្បីធានាឲ្យបរិយាកាសនៅក្នុងដំណើរការឃោសនាបោះឆ្នោត ថ្ងៃស្ងប់ស្ងាត់ ថ្ងៃបោះឆ្នោត រាប់សន្លឹកឆ្នោត រហូតដល់ថ្ងៃប្រកាសលទ្ធផលបោះឆ្នោតផ្លូវការប្រព្រឹត្តទៅដោយរលូននិងប្រកបដោយសុខសុវត្ថិភាព។ ជាថ្មីម្ដងទៀតឯកឧត្តម តូច ចាន់កុសល សូមថ្លែងអំណរគុណយ៉ាងជ្រាលជ្រៅបំផុតដល់ ឯកឧត្តម លោកជំទាវ លោក លោកស្រី អ្នកនាងកញ្ញា សមាជិក សមាជិកា នៃអង្គពិធីទាំងមូល អញ្ជើញចូលរួមក្នុងពិធីបើកយុទ្ធនាការឃោសនាបោះឆ្នោតជ្រើសរើសក្រុមប្រឹក្សាឃុំអាណត្តិទី ៥ ឆ្នាំ២០២២នេះ និងសូមជូនពរជួបប្រទះសុខភាពល្អ កម្លាំងរឹងមាំបរិបូណ៌ និងទទួលបានជោគជ័យគ្រប់ភារកិច្ច៕