ភ្នំពេញ៖ លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញចូលរួមអមដំណើរ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ក្នុងពិធីបើកការដ្ឋានសាងសង់កំណាត់ផ្លួវជាតិលេខ៥ ពីបាត់ដំបង-សិរីសោភ័ណ នៅថ្ងៃទី២៦ ខែមីនា ឆ្នាំ២០១៨ ។ គម្រោងសាងសង់កំណាត់ផ្លូវជាតិលេខ៥ ដំណាក់កាលទី១នេះ មានប្រវែងសរុប៨៤,៧៤គម គឺពីបាត់ដំបងទៅសិរីសោភ័ណ ពោលគឺពីគីឡូម៉ែត្រលេខ ២៨២+០០០ ទៅគីឡូម៉ែត្រលេខ ៣៦៧+៨០៤ ជាប្រភេទផ្លូវចាក់បេតុងកៅស៊ូ (AC) កម្រាស់១៥សម ដែលមានទទឹង២៣ម និងមាន៤គន្លង ខណ្ឌដោយសួនទ្រូងផ្លូវទទឹង៣ម សម្រាប់យានយន្តគ្រប់ប្រភេទធ្វើចរាចរ ។ គម្រោងនេះប្រើរយៈពេល ៣៦ខែ ដោយចាប់ផ្ដើមសាងសង់ពីខែកុម្ភៈ ឆ្នាំ២០១៧ និងគ្រោងបញ្ចប់នៅខែមីនា ឆ្នាំ២០២០ គ្រោងនឹងចំណាយទឹកប្រាក់សរុប ១៩ ៩៨៨ លានយេនជប៉ុន ស្មើនឹង ១៨៥ លានដុល្លារអាមេរិក ក្រោមគម្រោងឥន្ទទានជំនួយ ឥតសំណងរបស់រាជរដ្ឋាភិបាលជប៉ុន សាងសង់ដោយក្រុមហ៊ុន Tekken Taiyu Joint Venture និងក្រុមហ៊ុន Daiho Asanuma Joint Venture និងត្រូវបានត្រួតពិនិត្យ បច្ចេកទេសដោយក្រុមហ៊ុន Katahira & Engineers International ។ សូមបញ្ជាក់ដំណាក់កាលទីពីរ គឺពីព្រែកក្ដាមទៅខេត្តពោធិសាត់ និងដំណាក់កាលទីបី ពីពោធិសាត់ទៅបាត់ដំបង និងពីខេត្តបន្ទាយមានជ័យ ទៅប៉ោយប៉ែត (ព្រំប្រទល់ថៃ) ។ ថ្លែងក្នុងរបាយការណ៍ ជូនសម្ដេចតេជោនាយករដ្ឋមន្ត្រី និងលោក Hidehisa HORINOUCHI ឯកអគ្គរដ្ឋទូតជប៉ុនប្រចាំ ព្រះរាជាណាចក្រកម្ពុជា លោក ស៊ុន ចាន់ថុល បានបញ្ជាក់ថា ដោយសារប្រទេសមានសន្តិភាព និងស្ថេរភាពនយោបាយពេញលេញ បានធ្វើឱ្យផ្លូវជាតិលេខ៥ មានភាពមមាញឹកក្នុងការ ដឹកផលិតផលកសិកម្ម របស់ប្រជាពលរដ្ឋទៅកាន់ ទីផ្សារគោលដៅ និងបានទាក់ទាញវិនិយោគិនគ្រប់វិស័យ និងមានភ្ញៀវទេសចរចូលមក ទស្សនាប្រទេសកម្ពុជា កើនឡើងជាលំដាប់ ។ លើសពីនេះទៅទៀត ផ្លូវនេះគឺជាផ្លូវយុទ្ធសាស្ត្រយ៉ាងសំខាន់ ជាផ្លូវអាស៊ានហាយវេលេខ១ ហើយក៏ជាផ្លូវរបៀងសេដ្ឋកិច្ច កើត-លិចទី២ ដ៏សក្ដានុពល សម្រាប់ប្រកួតប្រជែងពាណិជ្ជកម្ម ទេសចរណ៍ ភស្តុភារកម្ម វិនិយោគ និងសេដ្ឋកិច្ចនៃមហាតំបន់មេគង្គ GMS ដែលតភ្ជាប់រវាងទីក្រុងបាកក ទីក្រុងភ្នំពេញ និងទីក្រុងហូជីមិញ ។ លើសពីនេះទៅទៀត បន្ទាប់ពីសាងសង់រួច ស្របតាមការទទួលផលពី ការអភិវឌ្ឍប្រកបដោយសមធម៌ ផ្លូវជាតិលេខ៥ នឹងជួយឱ្យប្រជាពលរដ្ឋទូទាំងប្រទេស ជាពិសេសប្រជាពលរដ្ឋ ដែលរស់នៅតាមដងផ្លូវនេះ មានឱកាសបង្កើតមុខរបរ ពង្រីកមុខរបរនិងមានការងារធ្វើគ្រប់ៗគ្នា ទៅតាមជំនាញ និងទេពកោសល្យរបស់ខ្លួន ដែលធ្វើឱ្យជីវភាពរបស់គាត់ មានភាពសម្បូរសប្បាយមួយកម្រិតទៀត ស្របតាមប្រសាសន៍របស់ សម្ដេចតេជោនាយករដ្ឋមន្ត្រី “មានផ្លូវ មានសង្ឃឹម” ព្រោះផ្លូវនេះបានភ្ជាប់គ្រប់ច្រកល្ហក ពីតំបន់ភាគខាងលិច មកតំបន់ភាគខាងកើត និងស្របតាមគោល នយោបាយរបស់រដ្ឋាភិបាលគឺ “ប្រែក្លាយប្រទេសកម្ពុជា ពីប្រទេសដែលមានសេដ្ឋកិច្ច ពឹងផ្អែកលើកសិកម្ម ទៅជាប្រទេសដែលមានសេដ្ឋកិច្ច ពឹងផ្អែកលើឧស្សាហកម្ម”។ នាឱកាសនោះផងដែរ លោក ស៊ុន ចាន់ថុល ក៏បានថ្លែងអំណរគុណយ៉ាងជ្រាលជ្រៅ ចំពោះប្រជាជនជប៉ុន និងរាជរដ្ឋាភិបាលជប៉ុន ដែលជានិច្ចជាកាលតែងតែផ្ដល់ ជំនួយដល់ព្រះរាជាណាចក្រកម្ពុជា ទាំងជំនួយហិរញ្ញវត្ថុ និងជំនួយបច្ចេកទេស ជាពិសេសវិស័យហេដ្ឋារចនាសម្ព័ន្ធ ផ្លូវ-ថ្នល់ ៕