[Khmer times] - ការខាតបង់ថវិកាដោយសារគ្រោះថ្នាក់ចរាចរណ៍កើនឡើងដល់ ៤៥០ លានដុល្លារក្នុងមួយឆ្នាំ
2022-02-02
ទៅកាន់ទំព័រចុះផ្សាយក្នុង Khmer times
លោកទេសរដ្ឋមន្ត្រី ស៊ុន ចាន់ ថុល រដ្ឋមន្ត្រីក្រសួងសាធារណការ និងដឹកជញ្ជូតាម បានមានប្រសាសន៍ថា តាមការសិក្សាស្រាវជ្រាវរបស់អង្គការ UNDP គ្រោះថ្នាក់ចរាចរណ៍បានបណ្តាលឱ្យកម្ពុជាខាតបង់ថវិកាកើនឡើងជាបន្តបន្ទាប់ គឺប្រមាណ ពី៤២០ លានដុល្លារ កើនដល់៤៥០លានដុល្លារក្នុងមួយឆ្នាំ។ថ្លែងនៅក្នុងពិធីសំណេះសំណាលជាមួយមន្ត្រីរាជការដែលប្រើប្រាស់ទោចក្រយានយន្តរបស់ក្រសួងសាធារណការនិងដឹកជញ្ជូននៅព្រឹកថ្ងៃទី២ ខែកុម្ភៈ នេះ លោកទេសរដ្ឋមន្ត្រី បានបន្តថា ថវិកាខាតបង់ទាំងនោះ ត្រូវបានចំណាយលើការស្លាប់ ចំណាយលើមន្ទីរពេទ្យ និង ការខូចខាតទ្រព្យសម្បត្តិឯកជន និងសាធារណៈរបស់រដ្ឋជាដើម។
លោកទេសរដ្ឋមន្ត្រីបានបន្ថែមថា បច្ចុប្បន្ននេះជាមធ្យមអត្រាស្លាប់ដោយសារគ្រោះថ្នាក់ចរាចរណ៍ក្នុង១ថ្ងៃមានប្រមាណ៥នាក់។ ប៉ុន្តែបន្ទាប់ពីកម្ពុជាបានបើកប្រទេសឡើងវិញដោយសារ ស្ថានភាពជំងឺកូវីដបានធូរស្រាលចំនួនអ្នកស្លាប់ដោយគ្រោះថ្នាក់ចរាចរណ៍បានកើនឡើងដល់៦នាក់លើសជាងការស្លាប់ដោយសារជំងឺកូវីដ១៩ទៅទៀតដែលរយៈពេល២៨ថ្ងៃនេះមិនមាន អ្នកស្លាប់ដោយសារជំងឺកូវីដ១៩ឡើយ។
លោកទេសរដ្ឋមន្ត្រីក៏បានអំពាវនាវដល់អ្នកប្រើប្រាស់ផ្លូវ ទាំងអស់ ទាំងអ្នកបើកបរម៉ូតូ និង រថយន្ត ត្រូវគោរពច្បាប់ចរាចរណ៍ឱ្យបានខ្ជាប់ខ្ជួនយល់ពីច្បាប់ចរាចរណ៍ទាំងអស់គ្នា ។ ចំណែកក្រុម ហ៊ុនដឹកជញ្ជូនត្រូវមានកម្មវិធីបណ្តុះបណ្តាលដល់បុគ្គលិករបស់ខ្លួនពីច្បាប់ចរាចរណ៍ឱ្យបានទូលំទូលាយកុំពឹងផ្អែកតែទៅលើគណៈកម្មការជាតិសុវត្ថិភាពចរាចរណ៍ផ្លូវគោកទៅជួយផ្សព្វផ្សាយ ត្រូវជួយផ្សព្វផ្សាយទាំងអស់គ្នាមិនត្រូវបើកបរលើសល្បឿនកំណត់និងកុំប្រជែងក្នុងស្ថានភាពគ្រោះថ្នាក់ដើម្បីចូលរួមចំណែកកាត់បន្ថយ ការស្លាប់ និងរបួស ដោយសារគ្រោះថ្នាក់ចរាចរណ៍នៅ កម្ពុជាឱ្យកាន់តែប្រសើរឡើងថែមទៀត ។
លោកទេសរដ្ឋមន្ត្រី បានបន្តថា ក្នុងការ ទប់ស្កាត់ គ្រោះ ថ្នាក់ចរាចរណ៍នេះដែរក្រសួងបានចែកមួកសុវត្ថិភាពដោយឥតគិតថ្លៃជូនដល់ប្រជាពលរដ្ឋបានប្រមាណ៨០ម៉ឺនមួក និងបាន ផ្សព្វផ្សាយពីច្បាប់គ្រោះថ្នាក់ចរាចរណ៍ដល់ពួកគាត់បានយល់ដឹង និង ចែកចំណាំងផ្លាតដល់អ្នកបើកបរម៉ូតូ អ្នកដឹករ៉ឺម៉ក អ្នកបើកបរគោយន្តសម្រាប់មើលពេលយប់បានប្រមាណ៣,៤លាន៕
