កិច្ចប្រជុំអនុគណៈកម្មការសម្របសម្រួលបទអន្តរាគមន៍ ដើម្បីបូកសរុបបទអន្តរាគមន៍ទាំងអស់ដែលទទួលបានពីអង្គភាពពាក់ព័ន្ធក្រោមឱវាទក្រសួងសម្រាប់សន្និបាតបូកសរុបលទ្ធផលការងារឆ្នាំ២០២១ និងលើកទិសដៅការងារបន្តឆ្នាំ២០២២ ត្រូវបានដឹកនាំដោយលោកជំទាវរដ្ឋលេខាធិការ កុយ សុដានី ថ្ងៃព្រហស្បតិ៍ ៣រោច ខែបុស្ស ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី២០ ខែមករា ឆ្នាំ២០២២ នៅទីស្តី ការក្រសួង លោកជំទាវ កុយ សុដានី រដ្ឋលេខាធិការក្រសួងសាធារណការ និងដឹកជញ្ជូន និងជាប្រធាន អនុគណៈកម្មការសម្របសម្រួលបទអន្តរាគមន៍ បានដឹកនាំកិច្ចប្រជុំអនុគណៈកម្មការ ដើម្បីបូកសរុបបទ អន្តរាគមន៍ទាំងអស់ ដែលទទួលបានពីអង្គភាពពាក់ព័ន្ធក្រោមឱវាទក្រសួង ក៏ដូចជាដើម្បីពិភាក្សាអំពីតួនាទី និងភារកិច្ចទទួលខុសត្រូវរបស់សមាជិកសមាជិកាអនុគណៈកម្មការបទអន្តរាគមន៍ ដោយមានការ ចូលរួមពីសមាជិកសមាជិកាក្រុមការងារពាក់ព័ន្ធ។ ថ្លែងក្នុងអង្គប្រជុំនាឱកាសនោះ លោកជំទាវរដ្ឋលេខាធិការ បានថ្លែងអំណរគុណយ៉ាងជ្រាលជ្រៅដល់ សមាជិកសមាជិកានៃអនុគណៈកម្មការបទអន្តរាគមន៍ទាំងអស់ ដែលបានចូលរួម និងអនុវត្តតួនាទីភារកិច្ចរបស់ខ្លួនប្រកបដោយការទទួលខុសត្រូវខ្ពស់ និងបានស្នើឱ្យឯកឧត្តម សឿន ប៊ុនលី អគ្គនាយកនៃអគ្គ នាយកដ្ឋានផែនការ និងគោលនយោបាយ រាយការណ៍អំពីវឌ្ឍនភាពនៃការរៀបចំបទអន្តរគមន៍ថាតើ សម្រេចបានកម្រិតណា ដើម្បីពន្លឿនការងារដែលនៅសេសសល់ឱ្យបានចប់សព្វគ្រប់ និងទាន់ពេលវេលា សម្រាប់សន្និបាតត្រឹមថ្ងៃទី២៤ ខែមករា ឆ្នាំ២០២២ខាងមុខនេះ ដើម្បីទុកពេលវេលាជូនអគ្គនាយកដ្ឋានផែនការ និងគោលនយោបាយពិនិត្យ និងចងក្រងសម្រាប់ដំណើរការអង្គសន្និបាត។ ជាមួយគ្នានោះផងដែរ លោកជំទាវរដ្ឋលេខាធិការ បានណែនាំឱ្យតំណាងទទួលធ្វើបទអន្តរាគមន៍ទាំងអស់ រៀបចំបទអន្តរាគមន៍របស់ខ្លួនឱ្យស៊ីសង្វាក់ជាមួយប្រធានបទគោល ជាពិសេសត្រូវសិក្សាឃ្លាប្រយោគឱ្យ បានច្បាស់លាស់ ដោយផ្ដោតលើចំណុចសំខាន់ៗដូចជា៖ ចំណុចខ្លាំង ចំណុចខ្សោយ បញ្ហាប្រឈម ដំណោះស្រាយ និង សំណូមពរ សមស្របទៅនឹងពេលវេលាកំណត់ត្រឹមរយៈពេល១០នាទី សម្រាប់បទអន្តរាគមន៍នីមួយៗដែលមានចំនួន១៥ស្លាយ។ សូមជម្រាបជូនថា៖ សន្និបាតបូកសរុបលទ្ធផលការងារឆ្នាំ២០២១ និងលើកទិសដៅការងារបន្តឆ្នាំ ២០២២របស់ក្រសួងសាធារណការ និងដឹកជញ្ជូន នឹងប្រព្រឹត្តទៅនៅថ្ងៃទី២៧-២៨ ខែមករា ឆ្នាំ២០២២ ខាងមុខ ក្រោមប្រធានបទ៖ “ការធ្វើឱ្យប្រសើរឡើងហេដ្ឋារចនាសម្ព័ន្ធដឹកជញ្ជូន ដែលធន់នឹងការបម្រែបម្រួលអាកាសធាតុ ការគ្រប់គ្រង ការសាងសង់ ការថែទាំផ្លូវ ស្ពានឱ្យមានគុណភាពដោយផ្ដោតលើការងារប្រើប្រាស់បច្ចេកវិទ្យាទំនើប” ដែលប្រធានបទនេះនឹងត្រូវផ្សារភ្ជាប់ជាមួយបទអន្តរាគមន៍ចំនួន១៧សម្រាប់សន្និបាតនេះ៕