[Kampucheathmey] - ទីបំផុតស្ពានឆ្លងកាត់ទន្លេទៅអរិយក្សត្រ គ្រោងឈានទៅបើកការដ្ឋានសាងសង់
2022-01-03
ទៅកាន់ទំព័រចុះផ្សាយក្នុង Kampucheathmey
ប្រមុខរដ្ឋាភិបាលកម្ពុជាសម្តេចតេជោ ហ៊ុន សែនបានបញ្ជាក់នៅក្នុងពិធីបើកការដ្ឋានសាងសង់ផ្លូវជាតិលេខ ៤៨ នៅព្រឹកនេះ ពីការឈានទៅបើកការដ្ឋានសាងសង់ស្ពានឆ្លងកាត់ទន្លេមេគង្គទៅតំបន់អរិយក្សត្រ ក្រោយក្រុមហ៊ុនរបស់កូរ៉េបានសិក្សាចប់សព្វគ្រប់។
គម្រោងនៃការសាងសង់ស្ពានឆ្លងកាត់ទន្លេទៅតំបន់អរិយក្សត្រ នឹងប្រែក្លាយតំបន់នោះក្លាយជាទីក្រុងរណប ខណៈទីនោះកំពុងមានការអភិវឌ្ឍលើហេដ្ឋារចនាសម្ព័ន្ធ រួមទាំងគម្រោងបុរីជាច្រើន។
បើតាមប្រមុខរដ្ឋាភិបាលស្ពានមិត្តភាពកម្ពុជា-កូរ៉េ ឆ្លងកាត់ទន្លេមេគង្គ ភ្ជាប់ទៅតំបន់អរិយក្សត្រ ត្រូវបានភាគីកូរ៉េខាងត្បូង ដាក់ជូនរាជរដ្ឋាភិបាលកម្ពុជា ដើម្បីពិនិត្យមុនឈានទៅបើកការដ្ឋានសាងសង់។
គម្រោងហេដ្ឋារចនាសម្ព័ន្ធជាច្រើនកំពុងការសាងសង់ប្រើប្រាស់ថវិការដ្ឋាភិបាលកូរ៉េ ដូចជាគម្រោងស្តារផ្លូវជាតិលេខ ២ និងការបើកការដ្ឋានសាងសង់ផ្លូវជាតិលេខ ៤៨ ទៅខេត្តកោះកុង។
បើតាមមន្រ្តីរបស់ក្រសួងសាធារណការបានឲ្យដឹងថា ការសាងសង់ស្ពានមិត្តភាពកម្ពុជា-កូរ៉េ ឆ្លងកាត់ទន្លេមេគង្គទៅតំបន់អរិយក្សត្រ អាចនឹងបើកការដ្ឋានសាងសង់នៅឆ្នាំ២០២២នេះ៕
