(ព្រៃវែង)៖ ដើម្បីធានាគុណភាពផ្លូវ មានគុណភាពប្រើប្រាស់យូរ អង្វែងប្រកបដោយសុវត្ថិភាព ក្រុមការងារក្រសួងសាធារណៈការ និងដឹកជញ្ជូន ដឹកនាំដោយលោក គឹម សាន់ អរដ្ឋលេខាធិការក្រសួង សាធារណការ និងដឹកជញ្ជូន និងជាអនុប្រធានគណៈកម្មការ សម្របសម្រួល ជញ្ជីងថ្លឹងរថយន្តចល័តទូទាំងប្រទេស បានដាក់ជញ្ជីងចល័តដើម្បីត្រួតពិនិត្យ និងឃាត់រថយន្តដឹកលើសទម្ងន់កំណត់ ធ្វើដំណើរ តាមដងផ្លូវជាតិលេខ១១, PK៤៧ ស្ថិតនៅខេត្តព្រៃវែង នាថ្ងៃទី២១ ខែធ្នូ ឆ្នាំ២០២១នេះ។ ក្នុងការត្រួតពិនិត្យនេះ ជាលទ្ធផលមួយព្រឹកក្រុមការងារក្រសួង បានរកឃើញរថយន្តដែលល្មើសដឹកលើស ទម្ងន់កំណត់ចំនួន ១២គ្រឿង និងត្រូវពិន័យរថយន្តចំនួន ០៥គ្រឿងដែលផ្ទុកលើសទម្ងន់កំណត់ចាប់ពី ៥-១៨តោន ត្រូវឃាត់ចំនួនមួយឆ្នាំទាំង៣គ្រឿង។ ស្ថិតក្នុងប្រតិបត្តិការនេះ ក៏មានវត្តមានចូលរួមដោយប្រតិភូអមដំណើរដោយលោក តាំង ពៅ ប្រធានលេខាធិការដ្ឋាន នៃគណ:កម្មការសម្របសម្រួលការដេកជញ្ជូនលើសទម្ងន់កម្រិតកំណត់ ព្រមទាំងលោក ឌុច គន្ធា អភិបាលរងខេត្តព្រៃវែងផងដែរ ។ លោក គឹម សាន់ បានឱ្យដឹងថា ដោយអនុវតន៍តាមអនុសាសន៍របស់ទេសរដ្ឋមន្រ្តី ស៊ុន ចាន់ថុល រដ្ឋមន្ត្រីក្រសួងសាធារណៈការក្រុមការងារក្រសួងដឹកនាំដោយលោកផ្ទាល់រួមជាមួយក្រុមការងារក្រសួង បានសហការជាមួយស្ថានីយព្រៃព្នៅ បានដាក់ជញ្ជីងចល័តននៅចំណុចផ្លូនេះ ដើម្បីធ្វើការត្រួតពិនិត្យរថយន្តធំៗ ដែលដឹកទំនិញលើសទម្ងន់កំណត់ ដែលជាហេតុធ្វើឱ្យគុណភាពផ្លូវ មិនអាចទ្រាំទ្រមិនបានធ្វើឱ្យខូចផ្លូវដើម្បីយកទៅធ្វើការផាកពិន័យទៅតាមច្បាប់ដែលក្រសួងបានកំណត់ចំពោះរថយន្តល្មើសដឹកលើសទម្ងន់ ដែលបានកំណត់ ។ ក្នុងនោះលោកអនុរដ្ឋលេខាធិការ ក៏បានអំពាវនាវដល់ម្ចាស់យានយន្តធំៗ ដែលប្រើប្រាស់ផ្លូវថ្នល់ សូមចូលរួមជាមួយក្រសួង ក៏ដូចជាមន្ទីរមេត្តាកុំដឹកលើសទម្ងន់ដែលក្រសួងបានកំណត់ដែលជាហេតុធ្វើឱ្យខូចផ្លូវប្រើប្រាស់ មិនបានយូរអង្វែង។ គួរជម្រាបថា ទេសរដ្ឋមន្ត្រី ស៊ុន ចាន់ថុល ធ្លាប់បានបញ្ជាក់យ៉ាងច្បាស់ៗថា ក្រុមការងារជញ្ជីងចល័តរបស់ក្រសួងនឹងនៅតែបន្តចុះឆ្មក់ចាប់រថយន្តដឹកលើសទម្ងន់កំណត់ដូចភ្លៀងរលឹម មិនបន្ធូរបន្ធយដៃនោះទេ ដើម្បីកាត់បន្ថយ និងទប់ស្កាត់ការដឹកទំនិញលើសទម្ងន់កំណត់ដោយច្បាប់។ ទេសរដ្ឋមន្ត្រី ស៊ុន ចាន់ថុល បានបញ្ជាក់ទៀតថា បើសិនក្រុមការងារជញ្ជីងចល័តរកឃើញឡានដឹកទំនិញណាដែលលើសទម្ងន់២០%ឡើង នោះនឹងរងការពិន័យ ដោយច្បាប់ ហើយត្រូវឃាត់ទុកឡានរយៈពេលមួយឆ្នាំ។ ទេសរដ្ឋមន្ត្រី ក៏បានអំពាវនាវដល់អ្នកដឹកទំនិញទាំងអស់ បញ្ឈប់ការដឹកលើសទម្ងន់កំណត់ដោយច្បាប់ ដែលបំផ្លិចបំផ្លាញផ្លូវ ខណ:ដែលសម្ដេចតេជោ ហ៊ុន សែន ខិតខំប្រឹងប្រែង រកថវិការមកស្ថាបនាផ្លូវ-ស្ពាន ឱ្យមានភាពងាយស្រួល និងស្អាតល្អដូច្នេះសូមរួមគ្នាគោរពតាមច្បាប់ទាំងអស់គ្នា ដើម្បីរក្សាបាននូវគុណភាពផ្លូវឱ្យប្រើប្រាស់បានយូរអង្វែង។ សូមបញ្ជាក់ថា ទេសរដ្ឋមន្ត្រី ស៊ុន ចាន់ថុល ធ្លាប់បានថ្លែងដែរថា ក្រុមការងាររបស់ក្រសួង តែងតែធ្វើសកម្មភាពចុះឆ្មក់ចាប់រថយន្តដឹកទំនិញនៅតាមផ្លូវធំ ដើម្បីធ្វើការផាកពិន័យ និងឃាត់ទុកដោយបានចាប់រថយន្តទុកមួយឆ្នាំ មិនឱ្យបើកបរបានរាប់រយគ្រឿងហើយ ដោយមិនគិតថាជាឡានរបស់អ្នកណា មានខ្នងធំយ៉ាងណានោះ គឺមិនអាចអន្តរាគមន៍ដោះលែងបាននោះទេ៕