រដ្ឋាភិបាលជប៉ុននឹងផ្តល់ជំនួយអភិវឌ្ឍន៍ចំនួន ១៣,៩ លានដុល្លារដល់កម្ពុជា សម្រាប់រួមចំណែកអភិវឌ្ឍកំពង់ផែស្វយ័តក្រុងព្រះសីហនុ ក្នុងខេត្តព្រះសីហនុ។ ការផ្លាស់ប្តូរពិធីសារ និងឯកសារពាក់ព័ន្ធស្តីពីការបន្តផ្តល់ជំនួយ នឹងត្រូវចុះហត្ថលេខានៅថ្ងៃទី១៦ ខែធ្នូ ដោយលោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ និងឯកអគ្គរាជទូតជប៉ុនប្រចាំកម្ពុជា លោក មីកាមិ ម៉ាសាហ៊ីរ៉ុ (Mikami Masahiro) នេះបើយោងតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ ចេញផ្សាយកាលពីថ្ងៃពុធ។ ក្រោមគម្រោងអភិវឌ្ឍន៍សេដ្ឋកិច្ច និងសង្គម ជំនួយនេះនឹងត្រូវប្រើប្រាស់សម្រាប់អនុវត្តដងស្ទូចចល័តក្នុងកំពង់ផែ ។ ក្រសួងបានអោយដឹងនៅក្នុងសេចក្តីថ្លែងការណ៍ថា ជំនួយអភិវឌ្ឍន៍របស់ប្រទេសជប៉ុននឹងរួមចំណែកជាចម្បងដល់កិច្ចខិតខំប្រឹងប្រែងរបស់រដ្ឋាភិបាលកម្ពុជាក្នុងការពន្លឿនការអភិវឌ្ឍន៍សេដ្ឋកិច្ច និងសង្គម ក៏ដូចជាការពង្រឹងបន្ថែមទៀតនូវកិច្ចសហប្រតិបត្តិការទ្វេភាគីដែលមានស្រាប់ និងមិត្តភាពប្រពៃណីនៃប្រទេសទាំងពីរ។ រដ្ឋាភិបាលជប៉ុន តាមរយៈការិយាល័យ JICA ប្រចាំកម្ពុជា កាលពីថ្ងៃអង្គារ បានផ្តល់ជំនួយចំនួន ១២.២លានដុល្លារ ក្នុងការដំឡើងច្រកផ្លាស់ប្តូរទិន្នន័យអេឡិចត្រូនិក (Port EDI) នៅកំពង់ផែចំនួនពីរ គឺកំពង់ផែស្វយ័តភ្នំពេញ និងកំពង់ផែស្វយ័តក្រុងព្រះសីហនុ។ ពិធីប្រគល់នេះ ធ្វើឡើងក្រោមអធិបតីភាព លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន និងតំណាងអង្គការ JICA ។