វិទ្យាស្ថានតេជោសែន សាធារណការ និងដឹកជញ្ជូននៃក្រសួងសាធារណការ និងដឹកជញ្ជូន ចុះអនុស្សរណៈយោគយល់ជាមួយក្រុមហ៊ុន Phnom Penh Digital Service (PPDS) ក្នុងក្របខណ្ឌអប់រំកម្មវិធីបណ្តុះបណ្តាល និងផ្តល់ជំនួយបច្ចេកទេសផ្នែកព័ត៌មានវិទ្យា ថ្ងៃពុធ ១៣រោច ខែអស្សុជ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី០៣ ខែវិច្ឆិកា ឆ្នាំ២០២១ នៅទីស្ដីការ ក្រសួង ឯកឧត្តម ហឿន សំនៀង នាយកវិទ្យាស្ថានតេជោ សែន សាធារណការ និងដឹកជញ្ជូន នៃក្រសួង សាធារណការ និងដឹកជញ្ជូន បានអញ្ជើញជាអធិបតីក្នុងពិធីចុះហត្ថលេខាលើអនុស្សរណៈនៃការយោគ យល់រវាងវិទ្យាស្ថានតេជោសែន សាធារណការ និងដឹកជញ្ជូន និងក្រុមហ៊ុន Phnom Penh Digital Service (PPDS) ដោយមានការចូលរួមពីថ្នាក់ដឹកនាំក្រសួងទទួលបន្ទុក លោក លី ខេមរា នាយកក្រុមហ៊ុន Phnom Penh Digital Service ភ្ញៀវកិត្តិយស និងមន្រ្តីនៃវិទ្យាស្ថានតេជោសែន សាធារណការ និងដឹកជញ្ជូន។ ថ្លែងទៅកាន់អង្គពិធីនាឱកាសនោះ ឯកឧត្តមនាយកវិទ្យាស្ថាន បានថ្លែងអំណរគុណយ៉ាងជ្រាលជ្រៅជូន ចំពោះលោក លី ខេមរា នាយកក្រុមហ៊ុន Phnom Penh Digital Service ដែលបានព្រមព្រៀងសហប្រតិបត្តិការរួមគ្នាជាមួយវិទ្យាស្ថាន តេជោសែន សាធារណការ និងដឹកជញ្ជូន ក្នុងក្របខណ្ឌអប់រំកម្មវិធីបណ្តុះបណ្តាល និងផ្តល់ជំនួយបច្ចេកទេសផ្នែកព័ត៌មានវិទ្យា ដែលក្នុងនោះក្រុមហ៊ុន PPDS បានយល់ព្រមផ្តល់នូវកម្មវិធីឌីជីថលពាក់ព័ន្ធនឹងការបង្រៀននិងការរៀន ការគ្រប់គ្រងថ្នាក់ និងសកម្មភាពពាក់ព័ន្ធ (School Management System Software) និង Mobile Application ជូនដល់វិទ្យាស្ថានដោយឥតគិតថ្លៃ ក៏ដូចជាការផ្តល់អត្ថប្រយោជន៍ជូនគ្នាទៅវិញទៅមកផងដែរ។ ជាងនេះទៅទៀត ឯកឧត្តមក៏បានគូសបញ្ជាក់ផងដែរនូវការខិតខំប្រឹងប្រែងយ៉ាងសស្រាក់សស្រាំរបស់ ក្រសួងក្នុងការស្ថាបនា ជួសជុល និងកែលម្អហេដ្ឋារចនាសម្ព័ន្ធផ្លូវថ្នល់ ដែលជាសរសៃឈាមនៃការដឹក ជញ្ជូនក្នុងដែនដី នៃព្រះរាជាណាចក្រកម្ពុជា ដើម្បីបម្រើដល់សកម្មភាពសេដ្ឋកិច្ចជាតិ ក្រោមម្លប់សន្តិភាព និងការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និងស្របតាមចក្ខុវិស័យវែងឆ្ងាយ និងមោះមុតរបស់ឯកឧត្ដមទេសរដ្ឋមន្ដ្រី។ ឯកឧត្តមក៏បានបង្ហាញផងដែរនូវការប្តេជ្ញាចិត្តរបស់វិទ្យាស្ថានតេជោសែន ក្នុងការបណ្តុះបណ្តាលកូនខ្មែរឱ្យមានជំនាញច្បាស់លាស់ ចំណេះដឹងទូលំទូលាយ អាចធ្វើការជាមួយអ្នកដទៃបាន និងមានសីលធម៌ គុណធម៌ អត្តចរិត ចរិយាសម្បត្តិ និងគុណតម្លៃត្រឹមត្រូវក្នុងឋានៈជាអ្នកបន្តវេនដ៏មានសក្តានុពលប្រកប ដោយស្មារតីទទួលខុសត្រូវខ្ពស់ចំពោះវាសនាអនាគតរបស់កម្ពុជាលើវិស័យហេដ្ឋារចនាសម្ព័ន្ធផ្លូវថ្នល់ និងដឹកជញ្ជូន។ ជាមួយគ្នានោះផងដែរ លោកនាយកក្រុមហ៊ុន Phnom Penh Digital Service បានគូសបញ្ជាក់អំពីសមិទ្ធផលការងារសម្រេចបានសំខាន់ៗរបស់ខ្លួន រួមមានការបង្កើតប្រព័ន្ធដំណោះស្រាយប្រព័ន្ធបច្ចេកវិទ្យាឆ្លាតវៃមួយចំនួន ដើម្បីបំពេញតម្រូវការប្រើប្រាស់ក្នុងស្រុក ក្នុងនោះរួមមានដូចជា៖ ប្រព័ន្ធគ្រប់គ្រងសាលារៀន ប្រព័ន្ធគ្រប់គ្រងការបណ្ដុះបណ្ដាលអនឡាញ ប្រព័ន្ធរៀនអនឡាញ ប្រព័ន្ធគ្រប់គ្រងការលក់ទំនិញអនឡាញ ប្រព័ន្ធគ្រប់គ្រងការដឹកជញ្ជូន ប្រព័ន្ធគ្រប់គ្រងសេវាថែរក្សាយានយន្ត ប្រព័ន្ធគ្រប់គ្រងមន្ទីរពេទ្យ និងថែទាំអ្នកជំងឺតាមអនឡាញ និងការផ្ដល់សេវាកម្មអភិវឌ្ឍន៍បច្ចេកវិទ្យាសម្រាប់អាជីវកម្មផ្សេងៗទៀតផងដែរ។ គួរកត់សម្គាល់ថា៖ ចាប់តាំងពីការប្រែក្លាយ និងដាក់ឱ្យដំណើរការវិទ្យាស្ថានតេជោសែន សាធារណការ និងដឹកជញ្ជូន នៅដើមឆ្នាំ២០២១ វិទ្យាស្ថានតេជោសែន បាន និងកំពុងបណ្តុះបណ្តាលនិស្សិតជំនាន់ទី១ ចំនួន១៩១នាក់ លើជំនាញសិក្សាចំនួន ៦ ក្នុងដេប៉ាតឺម៉ង់ ចំនួន ៣ រួមមាន៖ ទី១. ដេប៉ាតឺម៉ង់សំណង់ សាធារណការ៖ ជំនាញសំណង់ផ្លូវថ្នល់ ផ្លូវល្បឿនលឿន ស្ពាន ផ្លូវដែក និងកំពង់ផែ, ជំនាញប្រព័ន្ធចម្រោះ ទឹក កខ្វក់, ទី២. ដេប៉ាតឺម៉ង់គ្រប់គ្រងដឹកជញ្ជូន និងភស្តុភារកម្ម (ឡូជីស្ទីក)៖ ជំនាញសេដ្ឋកិច្ចគ្រប់គ្រងនិងដឹកជញ្ជូនផ្លូវគោក និងជំនាញគ្រប់គ្រងភស្ដុភារកម្ម និងខ្សែសង្វាក់ផ្គត់ផ្គង់ និង ទី៣.ដេប៉ាតឺម៉ង់នាវាចរណ៍៖ ជំនាញបរិបាលនាវា និងម៉ាស៊ីននាវា។ ក្នុងនោះផងដែរ វិទ្យាស្ថានតេជោសែន មានសាស្រ្ដាចារ្យសរុបចំនួន ២៦រូប ដែលមានសញ្ញាបត្របណ្ឌិតចំនួន ៧រូប និងបរិញ្ញាបត្រជាន់ខ្ពស់ចំនួន១៩រូប។ បច្ចុប្បន្ននិស្សិតកំពុងសិក្សាតាមប្រព័ន្ធអនឡាញ១០០% ស្របតាមបរិបទកូវីដ-១៩ ការសិក្សាធ្វើឡើងពេញមួយថ្ងៃ (ព្រឹក និង រសៀល) ៥ថ្ងៃក្នុងមួយសប្តាហ៍ (ចន្ទ-សុក្រ) ព្រឹកចាប់ពីម៉ោង ០៧:០០ - ១១:០០ នាទីព្រឹក និងរសៀល ចាប់ពីម៉ោង ០១:០០ - ៥:០០ នាទីល្ងាច។ សូមជម្រាបជូនផងដែរថា៖ វិទ្យាស្ថានគ្រោងបើកការប្រឡងជ្រើសរើសនិស្សិតជំនាន់ទី២ ឱ្យចូលរៀននៅខែមករា ឆ្នាំ២០២២ ហើយវិទ្យាស្ថានតេជោសែន សាធារណការ និងដឹកជញ្ជូន ក៏កំពុងនឹងត្រៀមបើក ដំណើរការរៀននិងការបង្រៀនផ្ទាល់ ដោយគោរពយ៉ាងម៉ត់ចត់ និងអនុវត្តវិធានការណែនាំរបស់ក្រសួងអប់រំ យុវជន និងកីឡា និងវិធានរបស់ក្រសួងសុខាភិបាល នាពេលខាងមុខនេះផងដែរ។ ពិធីចុះអនុស្សរណៈយោគយល់គ្នា រវាងវិទ្យាស្ថានតេជោសែន សាធារណការ និងដឹកជញ្ជូន និងក្រុមហ៊ុន Phnom Penh Digital Service នាពេលនេះ សបញ្ជាក់ឱ្យឃើញពីកិច្ចខិតខំប្រឹងប្រែងរបស់ក្រុមការងារ គ្រប់លំដាប់ថ្នាក់ និងការគាំទ្រពីដៃគូរបស់យើង ក្នុងការបណ្តុះកូនខ្មែរឱ្យមានសមត្ថភាពខ្លាំងលើជំនាញ ក៏ដូចជាការទទួលស្គាល់ និងការគាំទ្រពីដៃគូទាំងក្នុង និងក្រៅប្រទេសរបស់យើង ក្នុងទិសដៅពង្រីកលទ្ធភាពផ្តល់ការបណ្តុះបណ្តាលដល់និស្សិត ឱ្យបានកាន់តែទូលំទូលាយ ជាក់លាក់ និងរឹងមាំលើជំនាញ ចំណេះដឹង និងសីលធម៌ ស្របតាមតម្រូវការរបស់សង្គម។ កន្លងមកវិទ្យាស្ថានតេជោសែន បានចុះអនុស្សរណៈយោគយល់គ្នា ជាមួយបណ្តាដៃគូនានាក្នុង វិស័យពាក់ ព័ន្ធ រួមមាន៖ វិទ្យាស្ថានបច្ចេកវិទ្យាកម្ពុជា (តិចណូ), សាលា Zhejiang Communication of Technology នៃសាធារណរដ្ឋប្រជាមានិតចិន, ក្រុមហ៊ន អ អិម អេ កម្ពុជា, សមាគមភស្តុភារកម្មកម្ពុជា សាលាភូមិន្ទរដ្ឋបាល នៃក្រសួងមុខងារសាធារណៈ។ នៅថ្ងៃខាងមុខនេះ វិទ្យាស្ថានតេជោសែន គ្រោងនឹងចុះ អនុស្សរណៈយោគយល់គ្នាបន្ថែមទៀតជាមួយនឹង៖ សាកលវិទ្យាល័យឆាងអាន (Chang An University) ប្រទេសចិន, ព្រមទាំងបណ្តាដៃគូផ្សេងៗទៀត ក្នុងទិសដៅ “ពង្រីកភាពជាដៃគូខាងក្រៅ ដើម្បីពង្រឹងខាងក្នុង”។ ជាទីបញ្ចប់ ឯកឧត្តមនាយកវិទ្យាស្ថាន បានបង្ហាញសុទិដ្ឋិនិយមថា៖ ការចុះអនុស្សរណៈយោគយល់នាថ្ងៃ នេះ នឹងបើកឱកាសឱ្យមានកិច្ចសហប្រតិបត្តិការកាន់តែជិតស្និទ្ធថែមទៀត ដើម្បីពង្រីកវិសាលភាពនៃការអប់រំឱ្យកាន់តែប្រសើរឡើង ក៏ដូចជាផ្តល់នូវអត្ថប្រយោជន៍ និងបំពេញរាល់កង្វះខាតជូនភាគីទាំងសងខាងទៅវិញទៅមកផងដែរ៕