[Khmer times] - កំពង់ផែអន្តរជាតិកំពត ជាមេដែកដ៏សំខាន់ ដើម្បីទាក់ទាញភ្ញៀវទេសចរណ៍
2021-10-02
ទៅកាន់ទំព័រចុះផ្សាយក្នុង Khmer times
កំពង់ផែទេសចរណ៍អន្តរជាតិខេត្តកំពតរបស់កម្ពុជា នឹងក្លាយជាមេដែកដ៏សំខាន់ក្នុងការទាក់ទាញភ្ញៀវទេសចរមកកាន់ប្រទេសនេះបន្ថែមទៀត។
កំណត់សំគាល់នេះត្រូវបានគូសបញ្ជាក់ដោយ លោកថោងខុន រដ្ឋមន្ត្រីក្រសួងទេសចរណ៍ នៅពេលចុះពិនិត្យការដ្ឋានសាងសង់កំពង់ផែជាមួយថ្នាក់ដឹកនាំខេត្តកំពត នៅស្រុកទឹកឈូ ខេត្តកំពតកាលពីពេលថ្មីៗនេះ។
យោងតាមក្រសួងទេសចរណ៍បានគូសបញ្ជាក់ថា ការសាងសង់កំពង់ផែអន្តរជាតិកំពតបានចាប់ផ្តើមនៅថ្ងៃទី៨ ខែសីហា ឆ្នាំ២០១៨ ហើយបច្ចុប្បន្នសម្រេចបានប្រមាណ ៨៤ភាគរយ ហើយការសាងសង់អគារអ្នកដំណើរបានបញ្ចប់ប្រមាណ ៧៣ភាគរយ។
ប្រភពបន្តថាការសាងសង់កំពង់ផែនេះត្រូវបានគេរំពឹងថានឹងបញ្ចប់នៅចុងឆ្នាំ២០២១ ។
ការស្ថាបនាកំពង់ផែទេសចរណ៍អន្តរជាតិកំពតគឺជាហិរញ្ញប្បទានរបស់ ធនាគារ ADB ដែលជាផ្នែកមួយនៃគម្រោងអភិវឌ្ឍន៍ហេដ្ឋារចនាសម្ព័ន្ធទេសចរណ៍សម្រាប់ការរីកចម្រើនប្រកបដោយចីរភាពនៅក្នុងមហាអនុតំបន់មេគង្គ (GMS) ។
កំពង់ផែអន្តរជាតិនេះ នឹងក្លាយជាច្រកចូលសមុទ្រអន្តរជាតិដ៏សំខាន់មួយ ដែលតភ្ជាប់ផ្នែកឆ្នេរសមុទ្រភាគខាងត្បូងរបស់ប្រទេស និងខេត្តកំពតទៅកាន់ពិភពលោក។
នៅពេលរួចរាល់វាមានសមត្ថភាព ទទួលអ្នកដំណើរនិងអ្នកទេសចរប្រមាណ ១លាននាក់។
អត្ថិភាពនៃកំពង់ផែនេះនឹងលើកស្ទួយ វិស័យទេសចរណ៍របស់កម្ពុជាបន្ថែមទៀត ជាពិសេស រមណីយដ្ឋានបូកគោ ក្នុងខេត្តនិងទិសដៅតំបន់ឆ្នេរផ្សេងទៀត។
