អគ្គនាយកដ្ឋានប្រព័ន្ធចម្រោះទឹកកខ្វក់ នៃក្រសួងសាធារណការ និងដឹកជញ្ជូន បានបើកកិច្ចប្រជុំពង្រឹងយុទ្ធស្រាស្តរួមចំណែកការធានាបាននូវការថែទាំប្រព័ន្ធចម្រោះទឹកកខ្វក់ ដើម្បីឈានទៅដល់ការផ្គត់ផ្គង់ទឹកស្អាត ប្រកបដោយសមធម៌ និងនិរន្តរភាព។ នេះបើតាមកិច្ចប្រជុំស្តីពី វឌ្ឍនភាពការងារ និងផ្សព្វផ្សាយពីក្រមសីលធម៌របស់មន្រ្តី នៃគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ ក្រោមហិរញ្ញប្បទានឥណទានសម្បទានរបស់ធនាគារពិភពលោក(World Bank)កាលពីថ្ងៃទី១៧ ខែកញ្ញា ឆ្នាំ២០២១។ នាឪកាសនោះ លោក ចៅ សុភៈភិបាល អគ្គនាយករង នៃអគ្គនាយកដ្ឋានប្រព័ន្ធចម្រោះទឹកកខ្វក់ក្រសួងសាធារណការ និងដឹកជញ្ជូន និងជានាយកគម្រោង បានឲ្យដឹងថា កិច្ចប្រជុំនេះធ្វើឡើង ក្នុងគោលបំណង ពង្រឹងកិច្ចការងារ ដើម្បីធានាប្រតិបត្តិការ និងថែទាំប្រព័ន្ធចម្រោះទឹកកខ្វក់ ប្រកបដោយសមធម៌ និរន្តរភាព ជាពិសេសចូលរួមថែរក្សាអនាម័យ សុខភាពសាធារណៈ ព្រមទាំងលើកកម្ពស់សោភ័ណភាព និង កែលម្អបរិស្ថានធម្មជាតិ ។ លោកបានបន្តដូច្នេះថា«មិនតែប៉ុណ្ណោះ កិច្ចប្រជុំក៏ពិនិត្យ និងពិភាក្សាលើលទ្ធផលការងារបច្ចេកទេស កិច្ចលទ្ធកម្ម កិច្ចការហិរញ្ញវត្ថុ ការធ្វើសវនកម្មគម្រោង កិច្ចគាំពារបរិស្ថាន និងសង្គម ដែលបានអនុវត្តកន្លងមក និងយុទ្ធវិធីបន្តសកម្មភាពទៅថ្ងៃមុខ ដោះស្រាយបញ្ហាប្រឈម ព្រមទាំងជំរុញការអនុវត្តនូវសកម្មភាពការងារនៃគម្រោងលើកកម្ពស់ការផ្គត់ផ្គង់ទឹកស្អាតនិងអនាម័យទៅតាមផែនការដែលបានគ្រោងទុក»។ គួរបញ្ជាក់ថា គម្រោងលើកកម្ពស់ការផ្គត់ផ្គង់ទឹកស្អាត និងអនាម័យ គឺក្រោមហិរញ្ញប្បទានឥណទានសម្បទានរបស់ធនាគារពិភពលោក (World Bank)។ តាមរយៈគម្រោងនេះ គឺបានជំរុញលើកទឹកចិត្តឱ្យក្រុមការងារអនុវត្តគម្រោងស្វែងយល់ពីវិធានប្រតិបត្តិគោលការណ៍គ្រឹះនៃក្រមសីលធម៌ សិក្សាពីការរៀបចំគម្រោងហេដ្ឋារចនាសម្ព័ន្ធរូបវន្តសាធារណៈ ដើម្បីធានាបាននូវនិរន្តរភាព និងប្រសិទ្ធភាព៕