មន្ត្រីជាន់ខ្ពស់ក្រសួងសាធារណការ និងដឹកជញ្ជូនបានប្រើវិធានការក្តៅ ចំពោះរថយន្តដឹកលើសទម្ងន់កម្រិតកំណត់ និងត្រូវផាកពិន័យតាមច្បាប់ស្តីពីផ្លូវថ្នល់ ខណៈក្រុមការងារចម្រុះឆ្មក់ចាប់រថយន្តចំនួន ១៥គ្រឿង ផ្ទុកលើទម្ងន់​នៅផ្លូវជាតិលេខ៤៤ ក្នុងខេត្តកំពង់ស្ពឺ កាលពីម្សិលមិញនេះ ។ នៅថ្ងៃទី២៧ ខែកុម្ភៈ ឆ្នាំ២០២០​ លោក សេង ឈួន រដ្ឋលេខាធិការ​ ក្រសួងសាធារណការ និងដឹកជញ្ជូន ជាប្រធានគណៈកម្មាធិការសម្របសម្រួល បានដឹកនាំក្រុមការងារត្រួតពិនិត្យយានយន្តធំៗ ដែលដឹកជញ្ជូនលើសទម្ងន់កំណត់ នៅលើផ្លូវជាតិលេខ៤៤ ក្នុងឃុំតាំងក្រូច ស្រុកសំរោងទង ខេត្តកំពង់ស្ពឺ។ សកម្មភាពឆ្មក់ចាប់រថយន្តដឹកលើសទម្ងន់ខាងលើនេះ គឺធ្វើឡើងតាមការបទបញ្ជាររបស់លោក ស៊ុន ចាន់ថុល​ ទេសរដ្ឋមន្ត្រីរដ្ឋមន្ត្រី​ ក្រសួងសាធារណការ និងដឹកជញ្ជូន​ សហការជាក្រុមការងារជញ្ជីងចល័ត មន្ទីរសាធារណការ និងដឹកជញ្ជូនខេត្តកំពង់ស្ពឺ និងអាជ្ញាធរផងដែរ ។ ក្រុមការងារបានឃាត់រថយន្តដើម្បីធ្វើការត្រួតពិនិត្យរថយន្តខ្សាច់ និងដឹកទំនិញផ្សេងៗបានចំនួន​ ១៥គ្រឿង ក្នុងនោះរកឃើញថាមានរថយន្តចំនួន ១២គ្រឿង ផ្ទុកលើសទម្ងន់កំណត់ដោយច្បាប់ ។ ដោយចំណោមរថយន្តទាំង ១២គ្រឿង ដែលដឹកលើចំណុះ រួមមាន៖ រថយន្ត ០១គ្រឿង ផ្ទុកលើសទម្ងន់កំណត់ ៦តោន និង​ ១១គ្រឿងទៀត ផ្ទុកលើសទម្ងន់លើសពី ២០តោន ដល់ ៣០តោន ដែលផ្ទុយលើសពីច្បាប់បានកំណត់។ លោក សេង ឈួន បានឱ្យដឹងថា ក្នុងចំណោមរថយន្តដែលដឹកលើសទម្ងន់កម្រិតកំណត់ទាំង ១២គ្រឿងនោះ មានរថយន្តដែលដឹកលើសទម្ងន់កំណត់ចន្លោះពី ៥%ទៅ២០% ហើយតម្រូវឱ្យទំលាក់ទំនិញចុះ​ និងចាក់ខ្សាច់ចោលចេញ ។ លោកបន្ថែមថា បន្ទាប់ពីរើឥវ៉ាន់ចុះក្រុមការងារផាកពិន័យ ទៅតាមច្បាប់ ។ ចំពោះរថយន្តដែលផ្ទុកដឹកលើស ទម្ងន់ លើសចាប់ពី២០%ត្រូវផាកពិន័យហើយឃាត់រថយន្តទុករយៈពេលពេញមួយឆ្នាំយោងតាមមាត្រា៦០ នៃច្បាប់ស្តីពីផ្លូវថ្នល់ ។