ភ្នំពេញ ថ្ងៃទី២៦ ខែ​កុម្ភៈ ឆ្នាំ​២០២១ – ឯកឧត្តម យិត បុណ្ណា រដ្ឋលេខាធិការក្រសួងសាធារណការ និងដឹកជញ្ជូនបានដឹក​នាំកិច្ចប្រជុំត្រៀមរៀបចំពិធីបើកបវេសនកាលចូលរៀនថ្នាក់ឆ្នាំសិក្សាមូលដ្ឋាន នៅវិទ្យា ស្ថានតេជោសែនសាធារណការ និងដឹកជញ្ជូន តាមរយៈប្រព័ន្ធវីដេអូពីចម្ងាយ ដើម្បី​ពិភាក្សាលើរបៀបវារៈមួយចំនួនរួមមានការប្រកាសសមាសភាពសមាជិកសមាជិកាគណៈកម្មការសម្រាប់ដឹកនាំគ្រប់គ្រង ចាត់ចែង និងសម្របសម្រួលក្នុងការរៀបចំពិធីបើក​បវេស​ន​កាលចូលរៀនថ្នាក់ឆ្នាំសិក្សាមូលដ្ឋាននៅវិទ្យាស្ថានតេជោសែនសាធារណការ និងដឹកជញ្ជូន។ កិច្ចប្រជុំនេះ ធ្វើឡើង កាលពី​ថ្ងៃ១៤កើត ខែផល្គុន ឆ្នាំជូត ទោស័ក ព.ស.២៥៦៤ ត្រូវនឹងថ្ងៃ​ព្រហស្បតិ៍ ទី២៥ ខែកុម្ភៈ ឆ្នាំ២០២១ នៅទីស្តីការក្រសួងសាធារណការ។ ឯកឧត្តម យិត បុណ្ណា​ បានស្នើឱ្យសមាជិកសមាជិកាគណៈកម្មការសម្រាប់ដឹកនាំ គ្រប់គ្រង ចាត់ចែង និងសម្របសម្រួលក្នុងការរៀបចំពិធី ខិតខំប្រឹងប្រែងបំពេញការងារ​របស់ខ្លួនទៅតាមការបែងចែកភារកិច្ច និងការទទួលខុសត្រូវឱ្យបានម៉ត់ចត់ ដើម្បីត្រៀម​រៀបចំពិធីនេះឱ្យដំណើរការទៅដោយរលូនតាមផែនការដែលបានគ្រោងទុក។ ជាមួយគ្នានេះដែរ អង្គប្រជុំបានពិភាក្សាលើនីតិវិធីនៃការត្រៀមរៀបចំការ​ប្រឡង​ជ្រើសរើសសិស្ស និស្សិតចូលរៀនដោយតម្លាភាព លទ្ធភាពនៃការប្រឡងជ្រើសរើស​តាម​អនឡាញ ដើម្បីចូលរួមបង្ការនិងទប់ស្កាត់ការរីករាលដាលជំងឺកូវីដ-១៩ ការដាក់ពាក្យ​ប្រឡង កាលបរិច្ឆេទឈប់ទទួលពាក្យប្រឡង និងការប្រកាសលទ្ធផលប្រឡងផងដែរ។ សូមបញ្ជាក់ថា វិទ្យាស្ថានតេជោសែនសាធារណការ និងដឹកជញ្ជូន ត្រូវបានសម្ពោធ​ដាក់​ឱ្យប្រើប្រាស់ជាផ្លូវការកាលពីថ្ងៃទី២២ ខែមករា ឆ្នាំ២០២១ និង​ទទួលបាន​ការអនុញ្ញាត​ពីក្រសួងអប់រំ យុវជន និងកីឡា ក្នុងការផ្តល់ការបណ្តុះបណ្តាលគ្រប់កម្រិត ចាប់ពីកម្រិត​ជំនាញបច្ចេកទេស (វគ្គខ្លីៗរយៈពេលសិក្សាក្រោម១ឆ្នាំ ឬ១ឆ្នាំកន្លះ) កម្រិតមធ្យមបច្ចេក​ទេស​ជាន់ខ្ពស់ បរិញ្ញាបត្រ (វិស្វករ បញ្ញាបត្រ+១) និងបរិញ្ញាបត្រជាន់ខ្ពស់ ដោយមានកិច្ច​សហការជាមួយវិទ្យាស្ថានបច្ចេកវិទ្យាកម្ពុជា ក្នុងគោលដៅរួមគ្នាជំរុញលើកកម្ពស់​ការ​អភិវឌ្ឍ​ធនធានមនុស្ស និងធ្វើការចែករំលែកចំណេះដឹងប្រកបដោយចីរភាពដល់សិស្ស និស្សិត និងបញ្ញវន្ត៕