ភ្នំពេញ ថ្ងៃទី២០ ខែកុម្ភៈ ឆ្នាំ២០២១ -- ក្លិបកីឡាហែលទឹកក្រសួងសាធារណការ និងដឹកជញ្ជូនឈរនៅចំណាត់ថ្នាក់លេខ១, ក្លិបហែលទឹកក្រសួងព័ត៌មានឈរនៅចំណាត់ថ្នាក់លេខ២ ខណៈក្រសួងសេដ្ឋកិច្ច និងហិរញ្ញវត្ថុ ឈរនៅចំណាត់ថ្នាក់លេខ៣ ដោយក្លិបទាំងបីនេះប្រជែងមេដាយមាសបានច្រើនជាងគេ នៅក្នុងការប្រកួតកីឡាហែលទឹកជ្រើសរើសជើងឯកយុវជន ដណ្ដើមពានរង្វាន់ព្រឹទ្ធាចារ្យហែមថុន លើកទី៤ ឆ្នាំ២០២១ ដែលបានបញ្ចប់ដោយជោគជ័យ នាល្ងាចថ្ងៃទី២០ ខែកុម្ភៈ ឆ្នាំ២០២១ នៅអាងហែលទឹកពហុកីឡដ្ឋានជាតិអូឡាំពិក។ លោក ហែម គីរី អគ្គលេខាធិការ សហព័ន្ធខ្មែរកីឡាហែលទឹកបានបង្ហាញលទ្ធផលបច្ចេកទេសរបស់គណៈកម្មការបច្ចេកទេសថា ក្លិបហែលទឹកក្រសួងសាធារណការ និងដឹកជញ្ជូន ដែលឈរនៅចំណាត់ថ្នាក់លេខ១នេះ គឺដណ្តើមបានមេដាយមាស៨ ប្រាក់៧ និងសំរឹទ្ធ៤ សរុប១៩គ្រឿង, ចំណាត់ថ្នាក់លេខ១ ក្រសួងព័ត៌មាន បានឈ្នះមេដាយមាស ៧ ប្រាក់១ និងសំរឹទ្ធ១ ខណៈក្រសួងសេដ្ឋកិច្ច និងហិរញ្ញវត្ថុ មេដាយមាស៦ ប្រាក់៨ និងសំរឹទ្ធ៥គ្រឿង។ចំពោះក្លិបហែលទឹកនាគរាជកំពង់ចាម លេខ៤ មេដាយមាស១ ប្រាក់៣ និងសំរឹទ្ធ៥ និងលេខ៥ ក្លិប Oasis Swim Academy មេដាយមាស១ ខណៈ២ក្លិបដែលមិនទទួលបានមេដាយសោះ គឺក្លិបសាលាបារំាង Descarte និងសាលាអន្តរជាតិ ISPP។ ព្រឹត្តិការណ៍ហែលទឹកជើងឯកយុវជន ពានរង្វាន់ព្រឹទ្ធាចារ្យហែម ថុន លើកទី៤ ឆ្នាំ២០២១នេះមានកីឡាករ កីឡាការិនីចូលរួមប្រកួតប្រជែងមេដាយចំនួន៩៨នាក់ក្នុងនោះមានកីឡាករ៦៣នាក់ មកពីក្លិបចំនួន៩ ដែលមានរយៈពេល២ថ្ងៃគឺថ្ងៃទី១៩-២០ ខែធ្នូ ឆ្នាំ២០២១។ ការប្រកួតហែលនេះត្រូវបានធ្វើឡើងក្រោមគំនិតផ្តួចផ្តើមរបស់ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន និងជាប្រធានសហព័ន្ធខ្មែរកីឡាហែលទឹក ដើម្បីជាការរម្លឹកគុណូបការៈ និងស្នាដៃរបស់លោក និងបំផុសឱ្យកីឡាករ កីឡាការិនី យុវជនខ្មែរ និងបរទេសចូលរួមក្នុងគោលបំណងពង្រឹងសមត្ថភាព គុណភាពកីឡាករ កីឡាការិនីកម្ពុជាឱ្យកាន់តែល្អប្រសើរបន្ថែមទៀត៕