(កំពង់ចាម)៖ អាជ្ញាធរខេត្តកំពង់ចាម ក្រោមអធិបតីភាព ឯកឧត្តមអ៊ុន ចាន់ដា អភិបាលខេត្ត នៅថ្ងៃទី ២២ ខែមករា ឆ្នាំ ២០២១ បានរៀបចំពិធីបើកការដ្ឋានស្ថាបនាផ្លូវក្រាលកៅស៊ូ DBST ប្រវែង ៦.៥៥០ម៉ែត្រ ពីភូមិបឹងបាសាក់ សង្កាត់សំបួរមាស ក្រុងកំពង់ចាម ដល់ភូមិអូរឈ្លើង ឃុំកោះរកា ស្រុកកំពង់សៀម និងសម្ភោធដាក់ឲ្យប្រើប្រាស់ផ្លូវកៅស៊ូAC ៤ខ្សែ ក្នុងក្រុងកំពង់ចាមប្រវែង ៤.៤១៥ ម៉ែត្រ ផងដែរ ។ ឯកឧត្តមអភិបាលខេត្ត បានថ្លែងក្នុងឱកាសនោះថា ការស្ថាបនាផ្លូវមួយខ្សែថ្មី ក្រាលកៅស៊ូ DBST ដែលមានប្រវែង ៦.៥៥០ ម៉ែត្រនោះ ទទឹងប្រវែង៧ ម៉ែត្រ គឺអាជ្ញាធរខេត្តមានគោលបំណងចង់ឲ្យប្រជាពលរដ្ឋក្នុងក្រុងកំពង់ចាម ទាំង៤ សង្កាត់ មានឱកាសលើកកម្ពស់ជីវភាព រស់នៅមានភាពស៊ីវីល័យដូចៗគ្នា ដូច្នេះអត្ថិភាពក្នុងការអភិវឌ្ឍដំបូងគឺការស្ថាបនាផ្លូវមុនគេ ។ ម្យ៉ាងទៀត អាជ្ញាធរខេត្តបានខិតខំប្រឹងប្រែងអភិវឌ្ឍបន្តពីថ្នាក់ដឹកនាំមុនៗ ដើម្បីលើកកម្ពស់សោភ័ណភាពរបស់ខេត្ត និងអាច ឈានទៅដណ្ដើមជ័យលាភី រំដួល ៣ទង នៃទីក្រុងស្អាត ដែលនឹងត្រូវវាយតម្លៃ ដាក់ពិន្ទុដោយក្រសួងទេសចរណ៍ ។ ឯកឧត្តមអភិបាលខេត្តបានបញ្ជាក់ថា ផ្លូវមួយខ្សែនេះផងដែរ ការស្ថាបនាមានទុកចំណីផ្លូវ ទៅតាមគំនូសប្លង់របស់មន្ទីរដែនដី នគររូបនីយកម្ម ហេតុដូច្នេះក្នុងការស្ថាបនា សូមបងប្អូនប្រជាពលរដ្ឋនៅតាមដងផ្លូវ ចូលរួមសហការជាមួយនឹងអាជ្ញាធរ និង ក្រុមការងារសាងសង់ផ្លូវ ដើម្បីរៀបចំឲ្យមានសណ្ដាប់ធ្នាប់ នឹងមានសោភ័ណភាព នៅក្នុងមូលដ្ឋានក៏ដូចជាក្នុងក្រុងកំពង់ចាម របស់យើង ។ ឯកឧត្តមអភិបាលខេត្តបានឱ្យដឹងទៀតថា ផ្លូវមួយខ្សែនេះ គឺជាផ្លូវខ្សែក្រវាត់ក្រុង និងជាផ្លូវប្រវត្តិសាស្រ្ត ដែលបងប្អូនប្រជាពលរដ្ឋចង់បាន និងទន្ទឹងរង់ចាំជាយូរមកហើយ ។ ដូច្នេះការស្ថាបនាផ្លូវនេះ អាចរួចរាល់ជាស្ថាពរក្នុង រយៈពេលយ៉ាងយូរ ៦ខែប៉ុណ្ណោះ បងប្អូនប្រជាពលរដ្ឋយើង នឹងអាចប្រើប្រាស់ផ្លូវនេះបានហើយ ៕