(ស្វាយរៀង)៖ នៅថ្ងៃទី១៩ ខែមករា ឆ្នាំ២០២១ ឯកឧត្តម អៀង វ៉េងស៊ុន រដ្នលេខាធិការ ក្រសួងសាធារណការ និងដឹកជញ្ជូន បានអញ្ជើញចុះពិនិត្យការដ្ឋានជីកស្តារទន្លេវ៉ៃគោដល់ព្រំដែនវៀតណាម និងកំពង់ផែអូស្មាច់ (ក្នុងខេត្តស្វាយរៀង) ដោយមានការចូលរួមអមដំណើរពីថ្នាក់ដឹកនាំ និងក្រុមការងារបច្ចេកទេសពាក់ព័ន្ធផងដែរ។ ការចុះពិនិត្យនេះ គឺដើម្បីពង្រឹងលើកិច្ចការបច្ចេកទេស និងពន្លឿនការងារឱ្យកាន់តែមានប្រសិទ្ធភាព និងស្របតាមផែនការគ្រោងទុក។ ជាមួយគ្នានោះ ឯកឧត្តមបានណែនាំក្រុមការងារត្រូវយកចិត្តទុកដាក់កែលម្អរបច្ចេកទេស និងពន្លឿនការងារសាងសង់ឲ្យរួចរាល់ទាន់ ពេលវេលាកំណត់។ សូមជម្រាបថា គម្រោងកសាងកំពង់ផែ និង​ការស្តា​ទន្លេ​វ៉ៃ​គោប្រវែង ​៦៧០០ម៉ែត្រ ​ជា​គម្រោង​ថវិកាជាតិ ស្ថាបនា​ដោយ​នាយកដ្ឋាន​ដឹកជញ្ជូន​ផ្លូវទឹក នៃ​ក្រសួង​សាធារណការ និង​ដឹកជញ្ជូន។ គម្រោងនេះ នឹងផ្តល់នូវ​អត្ថប្រយោជន៍​យ៉ាងសំខាន់​ទៅលើ​ដំណើរការ​សេដ្ឋកិច្ច ពាណិជ្ជកម្ម ក៏ដូចជា​ការសម្រួល​ដ​ល់​ការដឹកជញ្ជូន​ទំនិញ​តាមផ្លូវ​ទឹក​ទៅមក រវាង​ខេត្តស្វាយរៀង​ប្រទេស​កម្ពុជា និង​ខេត្ត​ឡុង​អាន​ប្រទេស​វៀតណាម​នៅ​ថ្ងៃ​អនាគត​ផងដែរ​៕