[Phnom Penh Post] - សាលាក្រុងប្រជុំពង្រឹងការត្រួតពិនិត្យអាវុធ និងអនុវត្តច្បាប់ចរាចរណ៍ឱ្យបានប្រសើរជាងមុន
2021-01-12
ទៅកាន់ទំព័រចុះផ្សាយក្នុង Phnom Penh Post
ភ្នំពេញៈ អភិបាលរាជធានីភ្នំពេញលោក ឃួង ស្រេង ជួបប្រជុំលើកទី១ ជាមួយសមត្ថកិច្ចនគរបាល និងអាវុធហត្ថក្រុងដើម្បីពិនិត្យ និងពង្រឹងកិច្ចការត្រួតពិនិត្យអាវុធជាតិផ្ទុះគ្រឿងញៀន គ្រឿងស្រវឹង និងការអនុវត្តច្បាប់ស្ដីពីចរាចរណ៍ផ្លូវគោកដែលនៅមានចន្លោះប្រហោង និងបន្តអនុវត្តកិច្ចការដែលធ្វើបានល្អនៅឆ្នាំកន្លងទៅ។
លោក មេត មាសភក្ដី អ្នកនាំពាក្យសាលារាជធានីភ្នំពេញបានប្រាប់ ភ្នំពេញ ប៉ុស្តិ៍ ពីម្សិលមិញថា កិច្ចប្រជុំនេះបានស្ដាប់របាយការណ៍ និងការលើកជាមតិពីអ្នកអនុវត្តច្បាប់រួមមាននគរបាល និងអាវុធហត្ថ ហើយបន្ទាប់មកលោក ឃួង ស្រេង បានដាក់ទិសដៅអនុវត្តបន្តទៀតរួមមាន ការបន្តអនុវត្តកិច្ចការដែលធ្វើបានល្អ និងបន្តធ្វើឱ្យប្រសើរនូវចំណុចខ្វះខាត។
លោកថ្លែងថា កាលពីឆ្នាំ ២០២០ បើទោះបីជាមានបញ្ហាកូវីដ ១៩ ក្ដីក៏សមត្ថកិច្ចមិនរយាលដៃដែរ ក្នុងការទប់ស្កាត់បទល្មើសពាក់ព័ន្ធនឹងគ្រឿងស្រវឹង អាវុធជាតិផ្ទុះ ច្បាប់ចរាចរណ៍ ឬក្មេងទំនើង។ នៅឆ្នាំនេះ សមត្ថកិច្ចនឹងប្រឹងប្រែងលើចំណុចចន្លោះប្រហោង។
លោកថា៖ «យើងក៏អាចវាយតម្លៃបានថា យើងអាចនៅមានចំណុចឆកល្វែងនៅសេសសល់។
ឥឡូវនេះប្រព័ន្ធផ្សព្វផ្សាយយើងទំនើប យើងអាចឃើញគេបង្ហោះក្នុងបណ្ដាញសង្គមអំពីបញ្ហាខ្វះខាត ចន្លោះប្រហោងតាមមូលដ្ឋាន ការបន្តលេងល្បែងស៊ីសងខុសច្បាប់ជល់មាន់ អាប៉ោង អ៊ីនធឺណិតអនឡាញទាំងនេះហើយដែលយើងនិយាយថា ជាចំណុចដែលយើងត្រូវបន្តលុបបំបាត់...»។
ទោះយ៉ាងណាលោកថា បញ្ហាចន្លោះប្រហោង និងទិសដៅអនុវត្តជាក់ស្ដែងនឹងត្រូវលើកឡើងពេលក្រោយទៀតនៅប្រជុំត្រួតពិនិត្យលទ្ធផលនៃការអនុវត្តការងារប្រចាំឆ្នាំ ២០២០ និងលើកទិសដៅសម្រាប់ឆ្នាំ ២០២១។
លោក ប៉ា ច័ន្ទរឿន ប្រធានវិទ្យាស្ថានប្រជាធិបតេយ្យកម្ពុជាបានថ្លែងថា ក្រៅពីខ្លាចជំងឺកូវីដ ១៩ ពលរដ្ឋនៅរាជធានីភ្នំពេញក៏បារម្ភពីការប្រើអាវុធជាតិផ្ទុះ គ្រឿងញៀន និងបញ្ហាអសន្តិសុខមួយចំនួនបណ្ដាលមកពីគ្រឿងស្រវឹងផងដែរ ជាពិសេសបន្ទាប់ពីមានការបាញ់បោះក្នុងរាជធានីភ្នំពេញប៉ុន្មានករណីថ្មីៗនេះ។
បើតាមលោក ច័ន្ទរឿន គ្រឿងស្រវឹងក៏ជាបញ្ហាចម្បងមួយដែលបង្កឱ្យមានគ្រោះថ្នាក់ចរាចរណ៍ និងការបំពុលដោយសំឡេងខារ៉ាអូខេ ដែលបញ្ហានេះបន្តកើតមានទាំងនៅក្រុងភ្នំពេញ និងតាមជនបទ។
លោកថ្លែងថា៖ «ហេតុដូច្នេះមានតែសមត្ថកិច្ចបន្តអនុវត្តច្បាប់ស្ដីពីការគ្រប់គ្រងអាវុធជាតិផ្ទុះ ការប្រយុទ្ធប្រឆាំងនឹងគ្រឿងញៀន និងទប់ស្កាត់ការប្រើប្រាស់គ្រឿងស្រវឹងហួសប្រមាណ ការបំពុលសំឡេងតាមភូមិ កាត់បន្ថយការផ្សាយពាណិជ្ជកម្មគ្រឿងស្រវឹង រួមមានទាំងការផ្សាយទាក់ទាញតាមរយៈការផ្ដល់រង្វាន់»។
ចំពោះការឆែកឆេរចរាចរណ៍ដើម្បីទប់ស្កាត់ការប្រើអាវុធជាតិផ្ទុះខុសច្បាប់ និងគ្រឿងញៀននៅតាមដងផ្លូវលោក ច័ន្ទរឿន ស្នើឱ្យសមត្ថកិច្ចធ្វើឡើងដោយយុត្តិធម៌ ចៀសវាងការគាបសង្កត់ពលរដ្ឋស្លូតត្រង់ ខណៈពលរដ្ឋកំពុងរងការយាយីពីកូវីដ ១៩ និងមានបញ្ហាជីវភាព។
លោកបន្តថា៖ «ក្រៅពីការពង្រឹងច្បាប់ក៏ស្នើសុំឱ្យអាជ្ញាធរមានសមត្ថកិច្ចបង្កើនការពង្រឹងការអប់រំដល់ពលរដ្ឋអំពីសីលធម៌ និងស្មារតីជាពលរដ្ឋល្អ និងពលរដ្ឋសកម្មនៅក្នុងសង្គម»៕
