ថ្ងៃអង្គារ ១៥កើត ខែបុស្ស ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២៩ ខែធ្នូ ឆ្នាំ២០២០ នៅទីស្ដីការក្រសួងសាធារណការ និងដឹកជញ្ជូន ឯកឧត្ដម ម៉ក់ ស៊ីដេត អគ្គនាយកនៃអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ បានអញ្ជើញដឹកនាំកិច្ចប្រជុំស្ដីពីវឌ្ឍនភាពប្រចាំខែនៃគម្រោងប្រព័ន្ធផ្លាស់ប្ដូរទិន្នន័យអេឡិចត្រូនិកនៅកំពង់ផែ (Port EDI) តាមរយៈប្រព័ន្ធវីដេអូពីចម្ងាយ ដោយមានការអញ្ជើញចូលរួមពីក្រសួង-ស្ថាប័ន និងភាគីពាក់ព័ន្ធ។ កិច្ចប្រជុំនេះធ្វើឡើងដើម្បីពិនិត្យលើវឌ្ឍនភាពនៃការរៀបចំគម្រោង Port EDI ក៏ដូចជាដើម្បីរៀបចំរបៀបវារៈសម្រាប់កិច្ចប្រជុំក្នុងខែបន្តបន្ទាប់ សំដៅឱ្យការអភិវឌ្ឍគម្រោងនេះប្រព្រឹត្តទៅដោយរលូន និងទទួលបានលទ្ធផលជាផ្លែផ្កាតាមការគ្រោងទុក។ ឯកឧត្ដមអគ្គនាយកបានមានប្រសាសន៍ថា ការរៀបចំកិច្ចប្រជុំជាមួយក្រសួង-ស្ថាប័ន និងភាគីពាក់ព័ន្ធដោយមានរបៀបវារៈច្បាស់លាស់ ជាក់លាក់ និងស៊ីជម្រៅ គឺជាកម្លាំងចលករមួយដ៏សំខាន់ក្នុងការពន្លឿនការប្រមូលធាតុចូលបន្ថែមទៀតឱ្យបានគ្រប់ជ្រុងជ្រោយ ដើម្បីឱ្យការអភិវឌ្ឍគម្រោងនេះមានប្រសិទ្ធភាព គុណភាព និងសុក្រិតភាពខ្ពស់ ជាពិសេសអាចប្រើប្រាស់បានគ្រប់កាលៈទេសៈ ទាំងបរិបទជាតិ និងអន្តរជាតិ និងស្របតាមចក្ខុវិស័យរបស់រាជរដ្ឋាភិបាលក្នុងការវិវត្តខ្លួនទៅជារាជរដ្ឋាភិបាលអេឡិចត្រូនិក (e-government) ក្នុងយុគសម័យបដិវត្តន៍ឧស្សាហកម្ម ៤.០។ ឯកឧត្ដមអគ្គនាយកបានសម្ដែងនូវការកោតសរសើរ និងអរគុណជាអនេកចំពោះសមាជិកអង្គប្រជុំទាំងមូល និងបានស្នើឱ្យក្រុមការងារពាក់ព័ន្ធទាំងអស់យកចិត្តទុកដាក់ក្នុងការចូលរួមសហការអនុវត្តតាមរបៀបវារៈ ក៏ដូចជាកម្មវិធីប្រជុំនានា ឱ្យកាន់តែប្រសើរថែមទៀត ដើម្បីឱ្យគម្រោងនេះបានចប់សព្វគ្រប់តាមការគ្រោងទុក៕