បាត់ដំបង៖ កំណាត់ផ្លូវជាតិពីរខ្សែ មានប្រវែងជាង ៧គ.ម តភ្ជាប់ពី​ផ្លូវជាតិលេខ៥ សំដៅចូលក្រុងបាត់ដំបង ចាប់ពីរង្វង់មូលព្រះនរាយណ៍ ដល់រង្វង់មូលយាយទេព ស្ថិតក្នុងសង្កាត់អូរចារ ក្រុងបាត់ដំបង ខេត្តបាត់ដំបង ដែលធ្លាប់ទទួលរងនូវការខូចខាតដោយជំនន់ទឹកស្ទឹងសង្កែ នាពេលកន្លងនោះ ត្រូវបានមន្ទីរសាធារណ ការនិងដឹកជញ្ជូនខេត្តបាត់ដំបង ធ្វើការជួសជុលស្ថាបនាចាក់កៅស៊ូប្រភេទបេទីមីន័រឬហៅកាត់ថា AC ដែលជាប្រភេទផ្លូវមានគុណភាពល្អជាប់បានយូរ ដើម្បីដាក់ជូនប្រជាពលរដ្ឋបានប្រើប្រាស់កាន់តែមានភាពងាយស្រួល ។ ប្រធានមន្ទីរសាធារណៈការ និងដឹកជញ្ជូនខេត្តបាត់ដំបង លោក ចាន់ សំបូរ បានមានប្រសាសន៍ថា កំណាត់ផ្លូវទាំងពីរខ្សែ​ដែលត្រូវស្ថាបនាថ្មីនេះ​ដោយសារតែរងគ្រោះខ្លាំងពីជំនន់ទឹកភ្លៀងធ្វើឲ្យផ្លូវរមួលខ្លាំង ហើយផ្លូវនៅតំបន់នេះ កន្លងមកមិនដែលមានការវាយប្រហារពីជំនន់ទឹកភ្លៀង​បានយូរទេ ទើបតែនៅចុងរដូវវស្សាឆ្នាំ២០២០នេះតែប៉ុណ្ណោះ ដែលមានការលិចច្រើន និងមានរយៈពេលយូរទៀត ទើបក្រុមការងារបច្ចេកទេសរបស់មន្ទីរសាធារណការ និងដឹកជញ្ជូនខេត្តបាត់ដំបង ធ្វើការជួសជុលនិងស្ថាបនាឡើងវិញ ដោយប្រើបច្ចេកទេសចាក់ផ្លូវប្រភេទអូវ៉ាឡេ AC នេះ ដើម្បីជាប់បានយូរ និងអាចធ្វើដំណើរបានស្រួល ។ លោក បញ្ជាក់ថា ការចំណាយថវិកាស្ថាបនានេះ ជាគម្រោងរបស់រាជរដ្ឋាភិបាល តាមរយៈក្រសួងសាធារណការ និងដឹកជញ្ជូន ចំណែកមន្ទីរ ជាអ្នកអនុវត្តផ្ទាល់ ។ លោកបញ្ជាក់ថា កំណាត់ផ្លូវពីរខ្សែរនេះ គឺផ្លូវទី១ ចាប់ពីចំណុចដៃប្រាំបី ដល់ រង្វង់មូលយាយទេព ប្រវែង ២២០០ ម៉ែត្រ ជាប្រភេទផ្លូវភ្លោះដែលមួយចំហៀង ៩ម៉ែត្រ និង ផ្លូវទោលមួយ ខ្សែទៀត ប្រវែង ៥គីឡូម៉ែត្រ គុណនឹង ១០ម៉ែត្រ ចាប់ពីចំណុចពុកឆ្មារ ដល់រង្វង់មូលព្រាបសរ ។ លោកប្រធានមន្ទីរសាធារណការ និងដឹកជញ្ជូនខេត្តបាត់ដំបង បញ្ជាក់ថា ក្រៅពីផ្លូវពីរខ្សែ ខាងលើ នេះ នៅមានគម្រោងចាក់ផ្លូវប្រភេទគុណភាពខាងលើក្នុងក្រុងបាត់ដំបងបន្ថែមទៀតផងដែរ ជាគម្រោងរបស់រដ្ឋបាលខេត្តបាត់ដំបង ចាប់ពីចំណុចមុខសាលាខេត្ត ដល់ផ្សាលើ និង ផ្លូវលេខពីរ ចាប់ពីចំណុចវត្តដំរីសរ ដល់ ផ្លូវជាតិលេខប្រាំ៕