រាជធានីភ្នំពេញ៖ អនុវត្តតាមការណែនាំរបស់ ឯកឧត្តម ឃួង ស្រេង អភិបាលរាជធានីភ្នំពេញ ផ្លូវចំនូន៣ខ្សែ នៅក្នុង មូលដ្ឋានខណ្ឌចំការមន នឹងត្រូវធ្វើការជួសជុលឡើងវិញ ក្រោយទទួលរងការខូចខាតដោយជំនន់ទឹកភ្លៀងកន្លងមក ដើម្បីសម្រួលចរាចរណ៍ជូនប្រជាពលរដ្ឋ ។ ជាក់ស្តែងនៅព្រឹកថ្ងៃសុក្រ ទី២៥ ខែធ្នូ ឆ្នាំ២០២០នេះ លោក ថេង សុថុល អភិបាលខណ្ឌចំការមន និង មន្ត្រីពាក់ព័ន្ធ ក្រោម ឱវាទ បានចុះត្រួតពិនិត្យការដ្ឋាន ជួសជុលអ៊ុតកៅស៊ូACនៅកំណាត់ផ្លូវលេខ៩៩ ចាប់ពីផ្លូវលេខ ៤៣២ដល់ផ្លូវលេខ ៤៨៤ ក្នុងសង្កាត់បឹងត្របែក ខណ្ឌចំការមន ដែលជាគម្រោងថវិកាផ្ទាល់របស់រដ្ឋបាលរាជធានីភ្នំពេញ។ លោក ថេង សុថុល បានឲ្យដឹងថា គម្រោងជួសជុលផ្លូវឡើងវិញនៅក្នុងមូលដ្ឋានខណ្ឌចំការមន មានចំនួន៣ខ្សែ ក្នុងនោះមានផ្លូវលេខ៩៩ ផ្លូវលេខ២៩៤និងផ្លូវ៤៣២ជាប់ភូមិសាស្ត្របឹងត្របែក ទួលទំពូងទី១ ទួលទំពូងទី២ និង សង្កាត់ទន្លេបាសាក់ ។ សម្រាប់ថ្ងៃទី២៥ធ្នូនេះ ក្រុមការងារបាននិងកំពុងជួសជុល ដោយអ៊ុតកៅស៊ូAC កម្រាស់៥សង់ទីម៉ែត្រនៅលើកំណាត់ផ្លូវលេខ៩៩ ប្រវែង៩៤០ម៉ែត្រទទឹង៩ម៉ែត្រដោយចាប់ពីផ្លូវលេខ ៤៣២ដល់ផ្លូវលេខ ៤៨៤ ក្នុងសង្កាត់បឹងត្របែក ខណ្ឌចំការមន ។ លោកបន្តថា កន្លងមកឱ្យតែបើកការដ្ឋានជួសជុល ឬស្ថាបនាផ្លូវនានានៅក្នុងមូលដ្ឋានខណ្ឌចំការមន ក្នុងនាមលោក ជាអភិបាលខណ្ឌ លោកតែងតែផ្សព្វផ្សាយឱ្យប្រជាពលរដ្ឋបានដឹងជាមួយនិងការបើកវេទិកាសាធារណៈផងដែរ ដើម្បីឱ្យបងប្អូនប្រជាពលរដ្ឋបានចូលរួមសហការនិងលើកឡើងពីបញ្ហាផ្សេងៗដែលពួកគាត់ចង់បាន។ លោកអភិបាលខណ្ឌក៏បានសំណូមពរដល់បងប្អូនប្រជាពលរដ្ឋដែលរស់នៅអមសងខាងផ្លូវដែលកំពុងតែដំណើរការ ជួសជុលនេះ សូមមានការចូលរួមសហការ ដើម្បីទុកលទ្ធភាពឲ្យដំណើរការការដ្ឋាន ប្រព្រឹត្តទៅដោយរលូន និងបានរួចរាល់ តាមការគ្រោងទុក។ ក្នុងនាមប្រជាពលរដ្ឋក្នុងខណ្ឌចំការមន លោកថេង សុថុលបានថ្លែងអំណរគុណយ៉ាងជ្រាលជ្រៅ ចំពោះសម្តេចអគ្គមហា សេនាបតីតេជោហ៊ុន សែននាយករដ្ឋមន្ត្រីនៃព្រះរាជាណាចក្រកម្ពុជានិងឯឧត្ត ឃួង ស្រេង អភិបាលរាជធានីដែលបានណែនាំ ឲ្យមានការជួសជុល និងស្តារឡើងវិញ នូវហេដ្ឋារចនាសម្ពន្ធ័ដែលខូចខាតក្រោយជំនន់ទឹកភ្លៀងតាមបណ្តាខណ្ឌ ក្នុងរាជធានី ភ្នំពេញ៕