[Phnom Penh Post] - លោក ហ៊ុន សែន៖ កូវីដ១៩ មិនអាចរារាំងការអភិវឌ្ឍរបស់ កម្ពុជា បានទេ
2020-12-01
ទៅកាន់ទំព័រចុះផ្សាយក្នុង Phnom Penh Post
សៀមរាបៈ លោកនាយករដ្ឋមន្រ្ដី ហ៊ុន សែន អះអាងថា កូវីដ១៩ មិនអាចរារាំងការអភិវឌ្ឍរបស់កម្ពុជាបានទេ ក៏ប៉ុន្តែរដ្ឋាភិបាលនៅតែអាចងើបឈរ និងបញ្ចេញថវិកាជាតិដើម្បីអភិវឌ្ឍហេដ្ឋារចនាសម្ព័ន្ធនានាក៏ដូចនៅតាមបណ្ដាខេត្ដក្នុងការដោះស្រាយបញ្ហាបច្ចុប្បន្ន និងត្រៀមជំរុញកំណើនសេដ្ឋកិច្ចជាតិក្រោយបញ្ចប់បញ្ហាកូវីដ១៩។
ថ្លែងនៅក្នុងពេលធ្វើជាអធិបតីភាពនៃពិធីបើកការដ្ឋានសាងសង់ និងកែលម្អផ្លូវចំនួន ៣៨ ខ្សែក្នុងក្រុងសៀមរាបកាលពីម្សិលមិញ លោកនាយករដ្ឋមន្រ្តីបានលើកឡើងថា ខេត្ដសៀមរាបគឺជាប៉ូលសេដ្ឋកិច្ច ១ របស់កម្ពុជាក្នុងចំណោមខេត្ដព្រះសីហនុ និងរាជធានីភ្នំពេញ។ ខេត្តនេះជាអតីតរាជធានីរបស់កម្ពុជា ហើយបច្ចុប្បន្នគឺជាប៉ូលទេសចរណ៍ដ៏មានសក្ដានុពល និងទាក់ទាញ។ ប៉ុន្តែហេដ្ឋាចនាសម្ព័ន្ធផ្លូវថ្នល់ខេត្ដនេះនៅមានទំហំតូចនៅឡើយទើបរាជរដ្ឋាភិបាលសម្រេចទម្លាក់ប្រាក់សន្សំចំនួន ១៥០ លានដុល្លារ ដើម្បីសាងសង់ និងកែលម្អឡើងវិញ។
លោក ហ៊ុន សែន បានបញ្ជាក់ថា៖ «អ្វីដែលយើងបានធ្វើនៅខេត្ដសៀមរាបក៏ដូចជាខេត្ដព្រះសីហនុ និងខេត្តដទៃទៀតគឺជាការរៀបចំដោះស្រាយបញ្ហាបច្ចុប្បន្នភាពផង ហើយក៏ប្រុងប្រៀបឱ្យជំហានឈានទៅមុខក្នុងការសម្រេចទៅលើការជំរុញកំណើនសេដ្ឋកិច្ចក្រោយដំណាក់កាលកូវីដ១៩»។
លោកបានបន្ថែមថា៖ «កូវីដ១៩បំផ្លាញយើងក៏ពិតមែន ក៏ប៉ុន្ដែយើងនៅតែងើបឈរឡើងអាចដោះស្រាយបានបញ្ហាទាំងនេះតាមរយៈការបញ្ចេញទុនហើយនេះក៏ជាផ្នែកមួយនៃការត្រៀមទុកក្នុងការពន្លឿនសេដ្ឋកិច្ចក្រោយដំណាក់កាលកូវីដ១៩ផងដែរ»។
បើតាមលោកនាយករដ្ឋមន្រ្តី បើកូវីដ១៩មានការថមថយ រាជរដ្ឋាភិបាលអាចនឹងគិតគូររៀបចំព្រឹត្តិការណ៍សង្ក្រាន្តអង្គរឡើងវិញនៅឆ្នាំ ២០២២ ស្របពេលបញ្ចប់ការសាងសង់ហេដ្ឋារចនាសម្ព័ន្ធថ្មីក្នុងខេត្តនេះ។ សាធារណជននឹងបានឃើញទីក្រុងនេះជាទីក្រុងស្អាតមានផ្លូវស្អាត បន្ទាប់ពីទីក្រុងស្អាត និងផ្លូវស្អាតនៅទីក្រុងភ្នំពេញ និងខេត្ដព្រះសីហនុ។
លោកនាយករដ្ឋមន្រ្តីបញ្ជាក់ថា៖ «បើទោះបីជាកូវីដ១៩បានកើតឡើងក៏ប៉ុន្ដែវាមិនអាចរារាំងនូវការអភិវឌ្ឍរបស់យើងបាននោះទេ ដូចជាគម្រោងនៅខេត្ដព្រះសីហនុ គម្រោងផ្សេងៗដទៃទៀត រាប់ទាំងគម្រោងនៅទីនេះ (ខេត្ដសៀមរាប) ដែលយើងបានបញ្ចេញថវិកានៅក្នុងកាលៈទេសៈដែលកូវីដ១៩បានយាយីពិភពលោកក៏ដូចជាកម្ពុជាយើងផ្ទាល់»។
យោងតាមរបាយការណ៍បង្ហាញដោយលោក ស៊ុន ចាន់ថុល រដ្ឋមន្ដ្រីក្រសួងសាធារណការ និងដឹកជញ្ជូន ក្នុងពេលបើកការដ្ឋាននេះដែរ ផ្លូវទាំង ៣៨ ខ្សែនេះគឺមានប្រវែង ១០៨,៧៤ គីឡូម៉ែត្រគ្រោងប្រើប្រាស់ថវិកាជាតិសរុបប្រមាណ ១៤០ លានដុល្លារអាមេរិក និងថវិកាប្រមាណជាង ៩ លានដុល្លារអាមេរិកទៀត សម្រាប់ស្ថាបនាប្រព័ន្ធបង្ហូរទឹកភ្លៀង និងទឹកកខ្វក់។
លោកបានឱ្យដឹងថា៖ «គម្រោងនេះនឹងប្រើប្រាស់រយៈពេល ១៣ ខែគិតចាប់ពីថ្ងៃបើកការដ្ឋានដែលគ្រោងនឹងបញ្ចប់ការសាងសង់នៅចុងឆ្នាំ ២០២១ ខាងមុខនេះ»។
បើតាមលោក ស៊ុន ចាន់ថុល គម្រោងនេះដើរតួនាទីជាហេដ្ឋារចនាសម្ព័ន្ធប្រទាក់ក្រឡាគ្នាតភ្ជាប់ទីប្រជុំជនទៅជាយក្រុង និងតភ្ជាប់ទៅកាន់តំបន់ទេសចរណ៍សំខាន់ៗ និងបណ្តាញខ្សែផ្លូវជាតិនានាសំដៅកាត់បន្ថយការកកស្ទះចរាចរណ៍ក្នុងទីក្រុងដែលនឹងជំរុញកំណើនដឹកជញ្ជូន។ គម្រោងនេះក៏នឹងទាក់ទាញវិនិយោគិន ធុរជន និងភ្ញៀវទេសចរជាតិ អន្តរជាតិក្នុងការរួមចំណែកជំរុញកំណើនសេដ្ឋកិច្ចជាតិ ក្រោយវិបត្តិកូវីដ១៩ផងដែរ។
លោកបានបន្ថែមថាដើម្បីធានាគុណភាពនៃការសាងសង់ផ្លូវទាំង ៣៨ ខ្សែនេះឱ្យស្របតាមបទដ្ឋាន និងលក្ខណៈបច្ចេកទេសតាមប្រភេទខ្សែផ្លូវនីមួយៗ គណៈកម្មការអន្តរក្រសួងបានសម្រេចបង្កើតក្រុមការងារត្រួតពិនិត្យ និងវាយតម្លៃការងាររបស់អ្នកអនុវត្តគម្រោង និងមានក្រុមការងារត្រួតពិនិត្យបច្ចេកទេសអន្តរក្រសួងចំនួន ៩ ទៀតជាសេនាធិការដែលមានភារកិច្ចប្រចាំការនៅតាមការដ្ឋាននីមួយៗផងដែរ៕
