​ភ្នំពេញៈ ​ផ្លូវថ្នល់​ទាំង​នៅក្នុង​រាជធានី​ភ្នំពេញ និង​នៅតាម​បណ្តា​ខេត្ត​ដែល​ទទួលរង​ការខូចខាត​នឹងត្រូវ​បានចាប់ផ្តើម​ជួសជុល​ក្នុងពេល​ឆាប់ៗ​ខាងមុខនេះ​។​នេះ​បើតាម​ប្រភព​របស់​ក្រសួង​សាធារណការ​និង​ដឹកជញ្ជូន​។​ ​សូមជម្រាបថា​ក្រោយពី​ស្ថានភាព​ជំនន់​ទឹកភ្លៀង​បាន​ធូរស្រាល ថ្នាក់ដឹកនាំ​របស់​ក្រសួង​សាធារណការ និង​ដឹកជញ្ជូន មន្ទីរ​សាធារណការ និង​ដឹកជញ្ជូន​តាម​បណ្តា​ខេត្ត បាន​សហការ​ជាមួយ​អង្គភាព និង​ស្ថាប័ន​ពាក់ព័ន្ធ បាននិងកំពុង​ចុះ​ពិនិត្យ​ស្ថានភាព និង​វាយតម្លៃ​ផលប៉ះពាល់​ផ្លូវថ្នល់ ដែល​រងគ្រោះ​ពី​ជំនន់​ទឹកភ្លៀង​។​ ​ការចុះ​ត្រួតពិនិត្យ​នេះ ដើម្បី​ចាត់វិធានការ​ដោះស្រាយ​បន្ទាន់ ការលើក​គម្រោង​ស្ដារ ជួសជុល លើក​កម្រិត​ផ្លូវថ្នល់ សម្រួលការ​ធ្វើដំណើរ​រ​បស់បង​ប្អូន​ប្រជាពលរដ្ឋ និង​ការដឹកជញ្ជូន​ទំនិញ​គ្រប់​ប្រភេទ ក៏ដូចជា បង្ការ​ហានិភ័យ ដែល​អាច​កើតមាន​ដោយ​ជំនន់​ទឹកភ្លៀង​បង្កដោយ​បម្រែបម្រួល​អាកាសធាតុ នៅពេល​អនាគត​ខាងមុខ​។​ ​ថ្នាក់ដឹកនាំ​ក្រសួង​សាធារណការ​និង​ដឹកជញ្ជូន​ជាច្រើនរូប​ដោយមាន​ការចូលរួម​ពី​មន្ត្រី​ជំនាញ​ផង​នោះ បាន​ចុះ​ពិនិត្យ​កំណាត់​ផ្លូវ​ក្នុង​ខេត្តបាត់ដំបង ខេត្តបន្ទាយមានជ័យ ខេត្តកំពង់ឆ្នាំង និង​ខេត្តពោធិ៍សាត់ ខេត្តកំពង់ធំ ខេត្តព្រះវិហារ ខេត្តកណ្តាល និង​ខេត្ត​មួយចំនួនទៀត​៕​