ជុំវិញការស្ថាបនាផ្លូវជាតិ៣ខ្សែថ្មី គឺផ្លូវជាតិលេខ៣១ ៣៣ និង៤១ ឯកឧត្តមស៊ុន ចាន់ថុល បានបញ្ជាក់ថា គ្រោងនឹងបើកការដ្ឋាននៅឆ្នាំក្រោយ ជាមួយនឹងទឹកប្រាក់១៨០លានដុល្លារ ដោយមានការរៀបរាប់ដោយខាងក្រោម៖ «ទី១ យើងកំពុងពិនិត្យលើកិច្ចព្រមព្រៀង ហើយយើងបានចរចាចប់គ្រប់សព្វហើយ ទាំងផ្លូវ៤១ ៣៣និង៣១ ហើយក្រុមហ៊ុនចិន គាត់ទៅធ្វើការជាមួយភាគីចិនទៀត ដើម្បីស្នើសុំប្រាក់កម្ចី ក៏ប៉ុន្ដែមិនមានបញ្ហាទេ ខាងភាគីចិនបានឯកភាពជាមួយនីតិវិធីគេក្នុងការមើលប្រាក់កម្ចី យើងសង្ឃឹមថាឆ្នាំក្រោយទៀត អាចបើកការដ្ឋានបានទាំង៣កន្លែងនេះ ទាំង៣៣ ទាំង ៤១ និង ៣១»។នេះជាការលើកឡើងរបស់លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានប្រាប់ក្នុងការផ្សាយផ្ទាល់ ចេញពីគេហទំព័រក្រសួងសាធារណការ ក្នុងការចុះត្រួតពិនិត្យស្ថានភាពផ្លូវដែលរងការគំរាមកំហែងដោយជំនន់ទឹកភ្លៀង តាមបណ្ដោយផ្លូវជាតិលេខ៤១ នាថ្ងៃទី១៦ តុលា ២០២០នេះ។ គួរបញ្ជាក់ផងដែរថា សម្ដេចតេជោ ហ៊ុន សែន នាយករដ្ឋមន្រ្ដីនៃព្រះរាជាណាចក្រកម្ពុជា បានបង្ហើបពីគម្រោងសាងសង់ផ្លូវជាតិ ៣ ខ្សែតភ្ជាប់ផ្លូវជាតិសំខាន់ៗមួយចំនួន ទៅកាន់ខេត្ដកំពត។ ប្រសាសន៍លើកឡើងខាងលើនេះត្រូវបានធ្វើឡើងក្នុងឱកាសដែលសម្ដេចតេជោអញ្ជើញជាអធិបតីក្នុងពិធីសម្ភោធដាក់ឲ្យប្រើប្រាស់នូវមជ្ឈមណ្ឌលកម្សាន្ត ខ្នាតយក្សដំបូងនៅកម្ពុជា «ព្រីនស៍ ម៉ាណ័រ» ដែលមានទីតាំងនៅស្រុកកៀនស្វាយ ខេត្ដកណ្ដាល នៅព្រឹកថ្ងៃទី៧ ខែតុលា ឆ្នាំ២០២០។ យោងតាមការថ្លែងនៅក្នុងពិធីបើកសម្ភោធមជ្ឈមណ្ឌលកម្សាន្ដខាងលើរបស់សម្ដេចតេជោ ហ៊ុន សែន បានមានប្រសាសន៍យ៉ាងដូច្នេះថា “ខ្ញុំសូមជម្រាបឯកឧត្ដម វ៉ាង វិនទៀង ម្សិលមិញខ្ញុំបានសម្រេចគម្រោង៣ ទី១ផ្លូវ៤១តភ្ជាប់ផ្លូវជាតិលេខ ៤ ចុះទៅកំពត អាហ្នឹងទី១ ទី២គឺផ្លូវជាតិលេខ៣១ នៅកំពត ទី៣ ផ្លូវជាតិ ៣៣ នៅកំពតទៀត អាហ្នឹងយើងបានឯកភាពគ្នាចរចាជាគម្រោង ស្ថិតនៅក្នុងគម្រោងហើយបានប្រថាបត្រានឹងចុះហត្ថលេខា ឲ្យ អូន ព័ន្ធមុន្នីរ័ត្ន និងស៊ុន ចាន់ថុល ចុះហត្ថលេខា ហើយចុះហត្ថលេខាហើយគឺធ្វើតែម្ដងផ្លូវហ្នឹង”។