តាមរយៈសេចក្តីជូនដំណឹង នៅថ្ងៃទី២៥ ខែកញ្ញា ឆ្នាំ២០២០ លោក ទៀ សីហា អះអាងថា មន្រ្តីជំនាញ នឹងចុះជួយវាស់វែងជូនប្រជាពលរដ្ឋ ក្នុងការរុះរើសំណង់ខុសច្បាប់ទាំងនោះ ដើម្បីសម្រួលដល់ការងារស្ថាបនាផ្លូវទាំង៣៨ខ្សែ។ លោក សង្កត់ធ្ងន់ដូច្នេះថា៖«ក្នុងករណីពុំបានរុះរើតាមការកំណត់ រដ្ឋបាលខេត្ត នឹងចាត់វិធានការរុះរើតាមនីតិវិធីនិងច្បាប់ជាធរមាន ដោយមិនទទួលខុសត្រូវរាល់ការខូចខាតនិងការបាត់បង់ទ្រព្យសម្បតិ្តរបស់បងប្អូនប្រជាពលរដ្ឋឡើយ»។ យ៉ាងណា លោកអភិបាលខេត្ត សង្ឃឹមថា ប្រជាពលរដ្ឋ នឹងរុះរើសំណង់ខុសច្បាប់ទាំងនោះ ដោយស្មារតីទទួលខុសត្រូវ តាមពេលវេលាដែលបានកំណត់។ សម្តេចឧបនាយករដ្ឋមន្រ្តី ទៀ បាញ់ រដ្ឋមន្រ្តីក្រសួងការពារជាតិ និងជាប្រធានគណៈកម្មការសាងសង់ផ្លូវ៣៨ខ្សែ មានប្រសាសន៍ថា ប្រជាពលរដ្ឋ នឹងមិនទទួលបានសំណងអ្វីទាំងអស់ ដោយសារតែសំណង់ទាំងនោះ រំលោភចូលចំណីផ្លូវ។ រដ្ឋាភិបាល ចំណាយថវិកា១៥០លានដុល្លារ សម្រាប់ការសាងសង់ផ្លូវ៣៨ខ្សែក្នុងទីរួមខេត្តសៀមរាប ដោយរំពឹងថា នឹងរួចរាល់ទាំងស្រុងនៅត្រឹមឆ្នាំ២០២១។ នៅ​ពាក់កណ្តាល​ខែវិច្ឆិកា ឆ្នាំ​២០២០ អាជ្ញាធរ នឹង​រៀបចំ​ពិធីបើកការដ្ឋាន​សាងសង់​ផ្លូវ​ទាំង​៣៨​ខ្សែ ដោយមាន​សម្តេចនាយក​រដ្ឋមន្ត្រី ហ៊ុន សែន នឹង​ទៅធ្វើជា​អធិបតី​។