[Thmey Thmey] - លោក ស៊ុន ចាន់ថុល៖ ផ្លូវជាតិលេខ១១ ធ្វើតាមស្ដង់ដា មិនមែនចាក់ស្ដើងស៊ីក្រាស់ ចាក់ក្រាស់ស៊ីស្ដើងឡើយ
2020-05-05
ទៅកាន់ទំព័រចុះផ្សាយក្នុង Thmey Thmey
ភ្នំពេញ៖ លោក ស៊ុន ចាន់ ថុល រដ្ឋមន្ត្រីក្រសួងសាធារណការនិងដឹកជញ្ជូន បានចុះត្រួតពិនិត្យការងារសាងសង់ផ្លូវជាតិលេខជាតិលេខ១១ នៅថ្ងៃទី៤ ខែឧសភា ឆ្នាំ២០២០ ក្នុងគោលបំណងជំរុញក្រុមហ៊ុនម៉ៅការសាងសង់ កែសម្រួលនិងបំពេញបន្ថែមនូវលក្ខណបច្ចេកទេស ដើម្បីឲ្យគុណភាពរឹងមាំ និងអាចប្រើប្រាស់ជាប់បានយូរអង្វែង។លោក ស៊ុន ចាន់ថុល ប្រាប់ក្រុមអ្នកសារព័ត៌មានថា ទោះជំងឺកូវីដ-១៩ កំពុងក្លាយជាបញ្ហាសាកលក្តី តែសកម្មភាពសាងសង់ហេដ្ឋារចនាផ្លូវថ្នល់ និងស្ពាននៅកម្ពុជា នៅតែដំណើរការជាធម្មតា។ គេហទំព័ររបស់ក្រសួងសាធារណការ បានស្រង់សម្តីរបស់លោករដ្ឋមន្ត្រី ទៅចុះផ្សាយថា៖«ឆ្លងកាត់ការត្រួតពិនិត្យគុណភាពផ្លូវមួយរយៈកន្លងមក ផ្លូវជាតិលេខ១១ និងផ្លូវជាតិលេខ៣ ជាដើម មានគុណភាពតាមស្តង់ដា និងគោរពតាមលក្ខណបច្ចេកទេស គឺមិនមែនចាក់ស្ដើងស៊ីក្រាស់ ចាក់ក្រាស់ស៊ីស្តែងឡើយ»។
ជាមួយគ្នានេះ លោក បានផ្ញើសារជូនក្រុមហ៊ុនសាងសង់ទាំងអស់ថា បើមិនចង់សាងសង់ឡើងវិញ ឬមិនចង់ស្ថិតក្នុងបញ្ជីខ្មៅទេ ការសាងសង់ គឺត្រូវគោរពតាមបទដ្ឋានបច្ចេកទេសជាដាច់ខាត។ លើសពីនេះ លោក ស្នើដល់អ្នកប្រើប្រាស់ផ្លូវថ្នល់ទាំងអស់ ឲ្យចូលរួមជាមួយរដ្ឋាភិបាល ក្នុងការថែរក្សាសម្បត្តិជាតិ ជាពិសេសអ្នកដែលមានលំនៅដ្ឋាននៅតាមបណ្ដោយផ្លូវជាតិ ហើយមិនត្រូវបំពានដីចំណីផ្លូវឡើយ និង មិនត្រូវដឹកជញ្ជូនលើសទម្ងន់កម្រិតនោះទេ។
ផ្លូវជាតិលេខ១១ មានប្រវែង៩៦គីឡូម៉ែត្រ តភ្ជាប់រវាងខេត្តព្រៃវែង ត្រង់ចំណុចប្រសព្វផ្លូវជាតិលេខ១ (អ្នកលឿង) និងខេត្តត្បូងឃ្មុំ ត្រង់ចំណុចប្រសព្វផ្លូវជាតិលេខ៧ (ថ្នល់ទទឹង)។ មកដល់ពេលនេះ ការសាងសង់ផ្លូវជាតិលេខ១១ ដែលក្រាលបេតុងកៅស៊ូ AC សម្រេចបានជាង៩១ ភាគរយហើយ។
ការសាងសង់ផ្លូវជាតិលេខ១១ ត្រូវចំណាយទឹកប្រាក់ជាង៩៨លានដុល្លារ ដែលជាហិរញ្ញប្បទានពីប្រទេសចិន។ ការសាងសង់ផ្លូវជាតិលេខ១១ គឺចាប់ខែធ្នូ ឆ្នាំ២០១៧មក និងគ្រោងបញ្ចប់ នៅចុង ឆ្នាំ២០២០នេះ៕
