[AKP] - ក្រសួងសាធារណការបណ្ដុះបណ្ដាលស្ដីពីវិធានជួយសង្គ្រោះជនរងគ្រោះ និងហានិភ័យ នៃការបើកបរក្រោមឥទ្ធិពលនៃគ្រឿងស្រវឹង ដល់សិស្សានុសិស្ស ក្នុងខេត្ដបាត់ដំបង
2019-12-12
Go to the website published AKP
AKP បាត់ដំបង ថ្ងៃទី១២ ខែធ្នូ ឆ្នាំ ២០១៩ -- ក្រុមការងារនាយកដ្ឋានសុវត្ថិភាពចរាចរចណ៍ផ្លូវគោក នៃអគ្គនាយកដ្ឋានដឹកជញ្ជូនផ្លូវគោក របស់ក្រសួងសាធារណការ និងដឹកជញ្ជូន បានសហការជាមួយអគ្គលេខាធិការដ្ឋានគណៈកម្មាធិការជាតិសុវត្ថិភាពចរាចរណ៍ផ្លូវគោក មន្ទីរសាធារណរការ និងដឹកជញ្ជូនខេត្តបាត់ដំបង កាកបាទក្រហមកម្ពុជា ក្រុមហ៊ុនម៉ូតូហុងដា និងអង្គការខេមសែហ្វ (CAMSAFE) រួមជាមួយដៃគូពាក់ព័ន្ធ បានរៀបចំវគ្គបណ្តុះបណ្តាលស្តីពី “ការបើកបរប្រកបដោយសុវត្ថិភាព វិធានជួយសង្គ្រោះជនរងគ្រោះ និងហានិភ័យនៃការបើកបរក្រោមឥទ្ធិពលនៃគ្រឿងស្រវឹង” ដល់សិស្សានុសិស្ស នៃវិទ្យាល័យនេតយ៉ង់។ វគ្គបណ្តុះបណ្តាលនេះ បានធ្វើឡើង នៅវិទ្យាល័យនេតយ៉ង់ ស្ថិតក្នុងភូមិព្រែកព្រះស្តេច សង្កាត់ព្រែកព្រះស្តេច ក្រុងបាត់ដំបង ខេត្តបាត់ដំបង។ ទន្ទឹមនេះ វគ្គបណ្តុះបណ្តាលនេះ សម្រាប់ខេត្តបាត់ដំបង នឹងធ្វើឡើងនៅគ្រឹះស្ថានសិក្សាចំនួន៣ទីតាំង រួមមាន វិទ្យាល័យនេតយ៉ង សាកលវិទ្យាល័យបាត់ដំបង និងសាកលវិទ្យាល័យUME ចាប់ពីថ្ងៃទី១២ ដល់ថ្ងៃទី១៤ ខែធ្នូ ឆ្នាំ២០១៩ ផងដែរ។
លោក ព្រំ វន្ថា ប្រធាននាយកដ្ឋានសុវត្ថិភាពចរាចរណ៍ផ្លូវគោក នៃក្រសួងសាធារណការ និងដឹកជញ្ជូនបានគូសបញ្ជាក់ថា សុវត្ថិភាពចរាចរណ៍គឺជាបញ្ហាសុខភាពសាធារណៈ និងការងារអភិវឌ្ឍន៍ដ៏ចម្បង ដែលទាមទារឱ្យមាន ការដោះស្រាយបន្ទាន់ ខណៈចំនួនអ្នកស្លាប់ដោយគ្រោះថ្នាក់ចរាចរលើពិភពលោក នៅតែមានចំនួនខ្ពស់ និងបន្ដកើនឡើងយ៉ាងខ្លាំងដែលមានចំនួនប្រមាណ១,៣៥លាននាក់ ជារៀងរាល់ឆ្នាំ។ លោកបានបន្ដថា គ្រោះថ្នាក់ចរចរបានក្លាយជាបញ្ហាចម្បងទី១ក្នុងសកលលោក ដោយបានឆក់យកជីវិតមនុស្សមានអាយុចន្លោះពី៥-២៩ឆ្នាំ។ ជាមួយគ្នានេះ ប្រមាណ៥០ភាគរយ នៃអ្នកស្លាប់ដោយគ្រោះថ្នាក់ចរាចរ គឺជាអ្នកបើកបរទោចក្រយានយន្ដ អ្នកថ្មើរជើង និងអ្នកជិះកង់។ លោកក៏បានអំពាវនាវដល់យុវជនទាំងអស់ ត្រូវធ្វើជាគំរូក្នុងការគោរពច្បាប់របស់ប្រទេសជាតិយើងដែលផ្តើមពីច្បាប់ស្តីពីចរាចរណ៍ផ្លូវគោកចាប់ពីពេលនេះទៅ ព្រោះថាសកម្មភាពរបស់យើងក្នុងការគោរព និងអនុវត្តន៍ច្បាប់ គឺបានបង្ហាញយ៉ាងច្បាស់អំពី ឥរិយាបថ និងស្មារតីទទួលខុសត្រូវយ៉ាងជាក់ស្តែង។
បើតាមរបាយការណ៍នៃគណៈកម្មាធិការជាតិសុវត្ថិភាពចរាចរណ៍ផ្លូវគោក បានបង្ហាញថា នៅក្នុងត្រីមាសទី៣ នៃឆ្នាំ២០១៩នេះ គ្រោះថ្នាក់ចរាចរណ៍កើតឡើងចំនួន ៩៨៨លើកនៅលើដងផ្លូវនៃព្រះរាជាណាចក្រកម្ពុជាដែលបណ្តាលឱ្យមានអ្នកស្លាប់ចំនួន៤៨៨នាក់ និងរបួសចំនួន១,៤៩៤នាក់។ មូលហេតុដែលបង្កឱ្យមានគ្រោះថ្នាក់ គឺនៅតែបណ្តាលមកពីបើកបរល្មើសល្បឿនកំណត់ ៣៣ភាគរយ, ការមិនគោរពសិទ្ធិអាទិភាព ២៧ភាគរយ, ការមិនប្រកាន់ស្តាំ ១៣ភាគរយ, ការវ៉ាជែង ១០ភាគរយ, ការបត់ ៩ភាគរយ, ស្រវឹង ៤ភាគរយ, កត្តាយាន្តយន្ដ ៣ភាគរយ និងងងុយ១ភាគរយ។ បើប្រៀបធៀបនឹងឆមាសទី៣ ឆ្នាំ២០១៨ គ្រោះថ្នាក់ចរាចរណ៍កើនឡើងចំនួន៣២ភាគរយ ដែលក្នុងចំណោមអ្នកស្លាប់ដោយគ្រោះថ្នាក់ចរាចរណ៍ ៨០ភាគរយ គឺជាអ្នកបើកបរម៉ូតូ។
ក្រៅពីនេះ ដើម្បីចូលរួមកាត់បន្ថយគ្រោះថ្នាក់ចរាចរនៅក្នុងប្រទេសកម្ពុជា អង្គការ APISWA ក្រសួងសាធារណការ និងដឹកជញ្ជូន ក្រុមហ៊ុន HONDA អង្គការខេមសែហ្វ ជាមួយនឹងដៃគូសំខាន់នានា រួមសហការរៀបចំឡើងនៅយុទ្ធនាការអប់រំផ្សព្វផ្សាយ និងវគ្គបណ្ដុះបណ្ដាលដ៏សំខាន់ទាំងនេះឡើងផ្ដោតសំខាន់លើអ្នកប្រើប្រាស់ផ្លូវដែលងាយរងគ្រោះ ដូចជា យុវជន អ្នកបើកបរទោចក្រយានយន្ដ។ល។ យុទ្ធនាការអប់រំផ្សព្វផ្សាយ និងវគ្គបណ្ដុះបណ្ដាលស្ដីពីការបើកបរម៉ូតូប្រកបដោយសុវត្ថិភាព ការសង្រ្គោះជនរងគ្រោះ ដោយគ្រោះថ្នាក់ចរាចរណ៍ និងកត្តាហានិភ័យនៃការបើកបរក្រោមឥទ្ធិពលនៃគ្រឿងស្រវឹង សម្រាប់សិស្សនិស្សិត វិទ្យាល័យ និងសាកលវិទ្យាល័យតាមបណ្ដាដងផ្លូវសំខាន់ៗ គឺជាកិច្ចគាំទ្រដល់ការប្តេជ្ញាចិត្តរបស់រាជរដ្ឋាភិបាលកម្ពុជាក្នុងការសម្រេចឱ្យបាននូវផែនការសកម្មភាពជាតិសុវត្ថិភាពចរាចរណ៍ផ្លូវគោក២០១១-២០២០ សំដៅកាត់បន្ថយចំនួនអ្នកស្លាប់ដោយគ្រោះថ្នាក់ចរាចរលើដងផ្លូវក្នុងប្រទេសកម្ពុជា៕
ដោយ ប៊ុនរិទ្ធ
