ថ្ងៃសុក្រ ៣កើត ខែមិគសិរ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី២៩ ខែវិច្ឆិកា ឆ្នាំ២០១៩ ឯកឧត្តម ឈៀង ពេជ្រ អគ្គនាយក នៃអគ្គនាយកដ្ឋានភស្តុភារកម្ម ក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំប្រចាំខែ ស្តីអំពីការសិក្សាបុរេសមិទ្ធិលទ្ធភាពលើគម្រោងអភិវឌ្ឍន៍មជ្ឈមណ្ឌលភស្តុភារកម្មក្រុងព្រះសីហនុ ជាមួយក្រុមទីប្រឹក្សារបស់ស្ថាប័នសាជីវកម្មហិរញ្ញវត្ថុ ( International Finance Corporation) របស់ធនាគារពិភពលោក (World Bank) ដោយមានការចូលរួមពី មន្ត្រីជាន់ខ្ពស់ក្រសួង និងភាគីពាក់ព័ន្ធផងដែរ។ ជាកិច្ចចាប់ផ្តើម ក្រុមទីប្រឹក្សារបស់ស្ថាប័នសាជីវកម្មហិរញ្ញវត្ថុ (IFC) របស់ធនាគារពិភពលោក បានធ្វើបទបង្ហាញអំពីបច្ចុប្បន្នភាពគម្រោងអភិវឌ្ឍន៍មជ្ឈមណ្ឌលភស្តុភារកម្មក្រុងព្រះសីហនុ ដោយផ្តោតជាសំខាន់លើការវិភាគស្ថានភាពច្បាប់ និងស្ថាប័នដែលគាំទ្រដល់រចនាសម្ព័ន្ធភាពជាដៃគូរដ្ឋ និងឯកជន (Public-Private Partnership) និងស្ថានភាពទីតាំងសមស្របមួយ ដែលជាទីតាំងសម្រាប់មជ្ឈមណ្ឌលភស្តុភារកម្មក្រុងព្រះសីហនុ។ គម្រោងនេះមានគោលបំណងក្នុងការអភិវឌ្ឍក្រុងព្រះសីហនុក្លាយជាមជ្ឈមណ្ឌលភស្តុភារកម្មដ៏ធំមួយនៅកម្ពុជា ធានាដល់ការអភិវឌ្ឍសេដ្ឋកិច្ច ប្រកបដោយចីរភាព ធានាឱ្យមានការគាំទ្រផ្នែកហេដ្ឋារចនាសម្ព័ន្ធចាំបាច់ដើម្បីជំរុញការប្រកួតប្រជែងក្នុងការដឹកជញ្ជូន។ ឯកឧត្តមអគ្គនាយក បានជំរុញឱ្យសមាជិកសមាជិកានៃគណៈកម្មាធិការជាតិភស្តុភារកម្ម និងភាគីពាក់ព័ន្ធ ធ្វើការសិក្សា និងអនុវត្តគម្រោងនេះក្នុងពេលឆាប់ៗឱ្យទទួលបានលទ្ធផលល្អប្រសើរ និងដាក់ជូនថ្នាក់ដឹកនាំក្រសួងធ្វើការពិនិត្យ ឈានទៅបង្កើតមជ្ឈមណ្ឌលភស្តុភារកម្មក្រុងព្រះសីហនុប្រកបដោយជោគជ័យ៕