[Bayon TV] - មន្ទីរសារធារណៈការខេត្តកណ្តាល អំពាវនាវឲ្យពលរដ្ឋ ចូលរៀនវគ្គបណ្ដុះបណ្ដាលខ្លី ដើម្បីប្រើប្រាស់យានយន្ត ឲ្យស្របទៅតាមច្បាប់ចរាចរណ៍ផ្លូវគោក
2019-07-05
Go to the website published Bayon TV
កណ្ដាល ៖ ប្រធានមន្ទីរសារធារណៈការ និងដឹកជញ្ជូនខេត្តកណ្តាល អំពាវនាវដល់បងប្អូនប្រជាពលរដ្ឋ ដែលប្រើប្រាស់ទោចក្រយានយន្ត និងត្រីចក្រយានយន្ត មកចូលរៀននៅក្នុងវគ្គបណ្ដុះបណ្ដាលខ្លី ដោយមិនគិតថ្លៃ ដើម្បីប្រើប្រាស់យានយន្ត ឲ្យស្របទៅតាមច្បាប់ចរាចរណ៍ផ្លូវគោកជាធរមាន។
លោក ម៉ឹង យូឡេង ប្រធានមន្ទីរសារធារណៈការ និងដឹកជញ្ជូនខេត្តកណ្តាល ថ្លែងក្នុងវគ្គបណ្តុះបណ្តាលច្បាប់ស្តីពីចរាចរណ៍ផ្លូវគោក នៅថ្ងៃទី៤ ខែកក្កដា ឆ្នាំ២០១៩ នេះថា មន្ទីរសារធារណៈការខេត្តកណ្តាល បានចាប់ផ្តើមបើកវគ្គបណ្តុះបណ្តាលច្បាប់ ស្តីពីចរាចរណ៍ផ្លូវគោក គឺសម្រាប់បងប្អូនប្រជាពលរដ្ឋ ធ្វើអាជីវកម្មលើមធ្យោបាយត្រីចក្រយានយន្ត (ម៉ូតូកង់បី Passapp) ទោចក្រយានយន្តសណ្តោងរ៉ឺម៉ក និងទោចក្រយានយន្ត ដែលមានកម្លាំង លើសពី១២៥ សេសេឡើង ដោយឥតគិតថ្លៃ ក្នុងគោលបំណងឱ្យបងប្អូនប្រជាពលរដ្ឋ ដែលកំពុងធ្វើអាជីវកម្ម លើមធ្យោបាយយានយន្តទាំងនោះ បើកបរត្រូវគោរពច្បាប់ចរាចរណ៍ គោរពសិទ្ធិអាទិភាព គោរពផ្លាក សញ្ញា គំនូសសញ្ញា និងភ្លើងសញ្ញាចរាចរណ៍ មិនត្រូវបើកបរលើសល្បឿនកំណត់ និងបើកបរស្ថិតក្នុងស្ថានភាពស្រវឹងឡើយ។
លោកប្រធានមន្ទីររូបនេះ បានបន្តថា ទាក់ទងការបើកវគ្គបណ្តុះបណ្តាល នេះគឺជាលើកទី១ហើយ ដែលមន្ទីរបាន រៀបចំឡើង ក្នុងនោះ មន្ទីរនឹងបន្តនូវការបើកវគ្គបណ្តុះបណ្តាលជាបន្តបន្ទាប់ទៀត រហូតទាល់តែ អស់នៃចំនួនអ្នកដែលបញ្ជាទោចក្រយានយន្ត ត្រីចក្រយានយន្ត និងរ៉ឺម៉កសណ្ដោងនៅក្នុងទឹកដីខេត្តកណ្ដាល ដូច្នេះ ចំពោះបងប្អូនប្រជាពលរដ្ឋ ដែលប្រើប្រាស់ទោចក្រយានយន្ត និងត្រីចក្រយានយន្ត អញ្ជើញមកចុះចូលរៀន ក្នុងវគ្គបណ្ដុះបណ្ដាលខ្លី នៅមន្ទីរសាធារណៈការ និងដឹកជញ្ជូនខេត្តកណ្តាល ដើម្បីប្រើប្រាស់យានយន្តឲ្យស្របទៅតាមច្បាប់ចរាចរណ៍ផ្លូវគោកជាធរមាន។
ពាក់ព័ន្ធ និងការបើកវគ្គបណ្តុះបណ្តាលចរាចរណ៍ផ្លូវគោកនេះ លោក ម៉ឹង យូឡេង បានអំពាវនាវដល់អ្នកដែលប្រើប្រាស់ត្រីចក្រយានយន្តទាំងអស់ ជាពិសេសគឺ (passapp) ឬ ម៉ូតូកង់បី ដែលដឹកអ្នកដំណើរ សូមបងប្អូនទាំងអស់ត្រូវរក្សានូវសេចក្ដីថ្លៃថ្នូរ ក្នុងនោះមុននឹងចេញដំណើរ ត្រូវពិនិត្យមើលនូវយានជំនិះរបស់យើង ពីលក្ខណៈបច្ចេកទេសឲ្យបានត្រឹមត្រូវ ពិសេស ប្រាំង ភ្លើងសញ្ញា និងសំបកកង់ ដើម្បីធានា នៅពេលធ្វើដំណើរ៕
